Imisebenti yebaPhostoli 3 - Siswati 1996 Bible

Kuphiliswa kwesishosha

¹ Ngalelinye lilanga boPhetro naJohane baya ethempelini ntsambama ngeli-awa lesitsatfu, ngesikhatsi semkhuleko.

² Kwakukhona indvodza letsite leyayisishosha seloku yatalwa. Yayihleti endzaweni lekutsiwa “Intfunja Lenhle”. Yayetfwalwa onkhe emalanga ibekwe ngasentfunjeni yentele kucela kubantfu lababengena ethempelini.

³ Yatsi nayibona boPhetro naJohane bangena, yacela kutsi bayiphe noma ngayini lababengahle bayiphe kona.

⁴ Bayibukisisa, Phetro watsi kuyo: “Ase ubuke ngala ngakitsi.”

⁵ Yababuka, seyilindzele kutsi bayiphe lutfo.

⁶ Phetro watsi kuyo: “Anginamali, kodvwa ngitakunika loko lenginako: Ngelibito laJesu Khristu waseNazaretha ngitsi kuwe: Sukuma uhambe!”

⁷ Wase uyibamba ngesandla sangasekudla ayisita kutsi isukume. Masinyane tinyawo tayo nemacakala ayo acina.

⁸ Yesuka emankayi yaya etulu, yema ngetinyawo tayo, yahamba, yangena ethempelini kanye nabo, ihamba isuka emankayi idvumisa Nkulunkulu.

⁹ Bonkhe bantfu bayibona seyihamba idvumisa Nkulunkulu;

¹⁰ batsi nase babone kahle kutsi ngiyo lendvodza lebeyihlala ngase “Ntfunjeni Lenhle” yelithempeli, bamangala kakhulu ngaloko lokwase kwentekile.

Inshumayelo yaPhetro ethempelini

¹¹ Lendvodza yalandzela boPhetro naJohane, bonkhe bantfu bamangala bagijima baya endzaweni leyayibitwa ngekutsi: “NguMhubhe waSolomoni”.

¹² Nakabona labantfu Phetro, watsi kubo: “Madvodza aka-Israyeli, kunimangaliselani loku, nisigolotelelani kangaka? Nicabanga kutsi kungebungcwele betfu yini nome ngemandla etfu yini kutsi sente lomuntfu wahamba?

¹³ Nkulunkulu wa-Abrahama na-Isaka naJakobe, Nkulunkulu wabokhokho, usikhatimulisile Sisebenti sakhe lesinguJesu, lenamniketa etiphatsimandleni, namlahla embikwaPhilatu, namala nome Philatu asatimisele kumkhulula.

¹⁴ Abengcwele alungile, kodvwa namala, namlahla, esikhundleni sakhe nacela Philatu kutsi anikhululele sigelekece.

¹⁵ Ngako nabulala uMtfombo Wemphilo. Kodvwa Nkulunkulu wamvusa kulabafile, tsine-ke sibofakazi baloko.

¹⁶ Ligama laJesu nekukholwa egameni lakhe lokucinise lendvodza leniyibonako naleniyatiko; nekukholwa lokungaJesu kunike imphilo lephelele kulomuntfu, njengobe nani nibona nje.

¹⁷ “Noko, bomnaketfu, ngiyati kutsi loko nakwentiswa kungati njengebaholi benu.

¹⁸ Nkulunkulu wakumemetela kucala ngabo bonkhe baphrofethi kutsi Khristu abefanele kuhlupheka; nembala loko sekugcwalisekile ngalendlela.

¹⁹ Ngako, phendvukani, nibuyele kuNkulunkulu, kuze esule licala letono tenu,

²⁰ kuze kufike tikhatsi Nkulunkulu ahlumelelise imiphefumulo yenu ngekutfumela Jesu longuKhristu, lanikhetsela yena kucala.

²¹ Kufanele ahlale ezulwini kuze kufike sikhatsi lapho konkhe kuyakwentiwa kube kusha, njengobe Nkulunkulu amemetela emandvulo ngebaphrofethi bakhe labangcwele.

²² NaMosi watsi: ‘INkhosi, Nkulunkulu wenu, iyawunitfumelela umphrofethi, njengobe nami angitfuma, loyawuba wesive sakini. Nibolalela konkhe latanitjela kona.

²³ Lowo longalaleli loko lokushiwo ngulowo mphrofethi uyakwehlukaniswa nesive saNkulunkulu abhujiswe.’

²⁴ Nebaphrofethi bonkhe lababenelivi njengaSamuweli nalabeta emvakwakhe, bamemetela ngawo lamalanga.

²⁵ Tetsembiso taNkulunkulu ngebaphrofethi bakhe ngetenu, ninesabelo nani kulesivumelwane lesentiwa nguNkulunkulu kubokhokho benu. Washo naku-Abrahama watsi: ‘Ngesitukulwane sakho ngiyawubusisa bonkhe bantfu emhlabeni.’

²⁶ Ngako Nkulunkulu wasikhetsa wasitfuma Sisebenti sakhe kini kucala kutenibusisa ngekunenta nonkhe niphendvuke nitishiye tindlela tenu tekonakala.”