Imisebenti yebaPhostoli 25 - Siswati 1996 Bible

Pawula ucela kutsi licala lakhe lendluliselwe kuMbusi

¹ Emvakwemalanga lamatsatfu Festusi afikile kuleso sifundza, wesuka eKhesariya waya eJerusalema.

² Baphristi labakhulu nebaholi bemaJuda bachazisisa kungevani kwabo naPawula; base bancenga Festusi

³ kutsi amane ababonelele ngekuletsa Pawula eJerusalema, ngobe phela base bente lisu lekumenta silo sengubo endleleni.

⁴ Festusi wabaphendvula watsi: “Pawula siboshwa lesiseKhesariya, nami ngitawuncandzeka masinyane ngiye khona.

⁵ Ngako-ke nangabe kukhona emacala lenimbeka wona, khululani tiphatsimandla tenu ngihambe nato.”

⁶ Festusi wahlala nabo emalanga lasiphohlongo nome lalishumi, wase wehlela eKhesariya. Ngakusasa wahlala esihlalweni sakhe sekwehlulela, wase utfumela kutsi akuletfwe Pawula.

⁷ Watsi kube Pawula angene, lamaJuda bekete naye esuka eJerusalema amkaka ngala nangala, ambeka emacala lamanyenti nalamabi, labehluleka nekubeka bufakazi bawo.

⁸ Kodvwa Pawula wativikela ngekutsi: “Kute lengikonile lokuphambene nemtsetfo wemaJuda, nome nelithempeli, nome naKhesari.”

⁹ Festusi afuna kujabulisa emaJuda wabuta Pawula watsi: “Ungatsandza yini kuya eJerusalema kuyewutekwa lamacala labakubeke wona la embikwami?”

¹⁰ Kodvwa Pawula watsi: “Ngime embikwesihlalo sekwehlulela saKhesari, uMbusi, ngulapho-ke lakufanele licala lami litsetfwe khona. Kute lengiwone ngako emaJuda, njengobe nawe ukwati nje loko.

¹¹ Nangabe kukhona lapho ngephule khona umtsetfo, ngenta lokufanele kutsi ngijeziswe ngekufa, angiceli kuphepha ekufeni; kodvwa nalingekho liciniso kulamacala labangibeka wona, kute umuntfu lofanele kunginikela etandleni tabo. Ngicela kuyakwembula ingubo kuKhesari, uMbusi.”

¹² Festusi wase ufakana imilomo nebeluleki bakhe uphendvula Pawula utsi: “Sewucele kutsi lelicala lendluliselwe kuKhesari, ngako-ke utawuvele uhambe uye kuKhesari.”

Pawula ume embikwa-Agripha naBhenise

¹³ Emvakwemalanga inkhosi Agripha naBhenise bavakashela eKhesariya ngenjongo yekwemukela Festusi.

¹⁴ Kulawo malanga basahleti lapho, Festusi wase utekela inkhosi ngalendzaba yaPawula utsi: “Kukhona indvodza lesiboshwa lesashiywa nguFeliksi;

¹⁵ nangiya eJerusalema, baphristi labakhulu bemaJuda netibondza tenkholo yabo bambeka emacala lamanyenti, bangicele nekutsi ngimehlulele ngekumlahla ngelicala.

¹⁶ Ngabaphendvula ngekutsi akusiwo umtsetfo wetfu tsine maRoma kutsi silahle umuntfu ngelicala, angakalitfoli litfuba lekubhekana nebamangaleli bakhe buso nebuso atiphendvulele ngaloko labambeka ngako licala.

¹⁷ Batsi kube befike bahlangane lapha, angizange ngicitse sikhatsi, kodvwa kwatsi kusa ngakusasa ngavele ngahlala esihlalweni sekwehlulela, ngatfumela kutsi ayiletfwe lendvodza.

¹⁸ Bamangaleli bakhe abambekanga emacala langako ebugelekece, njengobe ngangibhekile.

¹⁹ “Kodvwa basuke baphikisana naye ngenkholo yabo nangendvodza letsite lenguJesu lese yafa, lacinisa ngayo Pawula kutsi iyaphila.

²⁰ Ngadzidzeka nje kutsi ngingayihlolisisa kanjani lendzaba yakhe, ngako-ke ngase ngibuta yena kutsi angatsandza yini kuya eJerusalema kuyewutekwa lamacala akhe khona.

²¹ Kodvwa Pawula wacela kutsi lokutekwa kwelicala lakhe akwendluliselwe ku-Agustusi, uMbusi, lofanele alijube; ngase ngitjela emasotja kutsi amgadze, kuze kufike sikhatsi sekumetfula kuKhesari.”

²² Agripha watsi kuFestusi: “Ngifuna kutivela nayikhuluma lendvodza.” Festusi waphendvula watsi: “Utamuva kusasa.”

²³ Ngakusasa bo-Agripha naBhenise beta ngekuhlonipheka lokukhulu, bafike bangena ehholweni lenkhulu yekuhlangana bahamba nabokhenela bemphi kanye nemadvodza labebalulekile kulelo dolobha. Festusi wase utfumela emasotja kutsi alandze Pawula.

²⁴ Festusi wase utsi: “Nkhosi Agripha kanye nani nonkhe lenikhona lapha kanye natsi, ngiyo-ke lendvodza lesengemukele tikhalo ngayo kuwo onkhe emaJuda lalapha naseJerusalema; bakhala ngekutsi kufanele iye entsanjeni.

²⁵ Kodvwa mine ngekwami kute lokubi lengitfole kutsi ikwentile lokungayenta ize ijeziswe ngentsambo. Kodvwa njengobe yona icele kutsi ilendlulisele ku-Agustusi, nami-ke sengincume kuyitfumela kuye.

²⁶ Kodvwa kute lokumcoka lenginako lengingahle ngikubhalele uMbusi ngayo. Ngiko nje ngiyiletse la embikwenu, ikakhulu kuwe, Nkhosi Agripha, khona litawutsi lingahlolwa lelicala layo nami ngibe nako lengingakubhala.

²⁷ Ngobe ngibona shangatsi kungaba bulima kimi kutsi ngingatfumela siboshwa kuye ngingachazi kutsi cala lini lesibekwe lona.”