Imisebenti yebaPhostoli 24 - Siswati 1996 Bible

EmaJuda abeka Pawula licala

¹ Emvakwemalangana lasihlanu umPhristi Lomkhulu Ananiyase wehlela eKhesariya netibondza tenkholo yemaJuda kanye naThethulusi, ummeli. Befika kuLusibalukhulu Feliksi batewubeka Pawula licala.

² Kwabitwa Thethulusi wefike wabeka Pawula licala watsi: “Mhlonishwa! Sifanele kukubonga ngenhlakanipho yebuholi bakho lesiletsele kuthula sikhatsi lesidze kangaka, nekutsi tingucuko letinyenti letifanele kuba khona tiyenteka ekusiteni sive.

³ “Mhlonishwa Feliksi, konkhe loko sikwemukela ngenhlitiyo lemhlophe, nome kwentiwa ngayiphi indlela nome kwentiwa kuyiphi indzawo.

⁴ Kodvwa kuze ngingakubambeleli, bengisakucela ngemusa wakho kutsi sewumane usiboleke indlebe kancane.

⁵ Sikhandze kutsi lomuntfu uyingoti, ngobe ususa tiphitsiphitsi emkhatsini wemaJuda wonkhe umhlaba, kantsi futsi ungumholi walelicembu lekutsiwa ngemaNazaretha.

⁶ Wadzimate wetama nekuhlambalata lithempeli, sabe sesiyambopha, [sasifuna kumgweba ngekwemtsetfo wetfu,

⁷ kodvwa Khenela Lisiyasi, weta wafike wasemuka yena wamtsatsa ngenkhani.

⁸ Wakhipha umyaleto kutsi bonkhe labambeka licala abete kuwe.] “Nawe matfupha nawungahle umbute nje, utativela ngekwakho uwatfole onkhe lamacala lesimbeka wona la embikwakho.”

⁹ NemaJuda asukuma nawo amvumela, atsi vele kunjalo.

Inkhulumo yaPawula yekutivikela embikwaFeliksi

¹⁰ Lusibalukhulu nasamkhombile Pawula kutsi akhulume, Pawula watsi: “Ngiyati kutsi bewungumgwebi walesive iminyaka leminyenti, ngako-ke ngiyatfokota kubeka inkhulumo yami yekutivikela la embikwakho.

¹¹ “Njengobe nawe ungatibonela nje, kutsi abengakapheli emalanga lali-12 ngifikile kutawukhonta eJerusalema,

¹² abazange sebangikhandze mine ngiphikisana nemuntfu nome ngetama kususa siphitsiphitsi emkhatsini webantfu ethempelini, emasinagogeni nome-ke edolobheni.

¹³ Nabo bate nebufakazi baloko labangahle bangibeke licala ngako nje la embikwakho nyalo.

¹⁴ Kodvwa naku lengikuvuma kuwe kutsi: Mayelana naleNdlela, lebatsi bona kweduka, ngikhonta Nkulunkulu wabokhokho ngekukholwa konkhe lokusemtsetfweni nalokubhalwe kubaphrofethi,

¹⁵ ngekubeka litsemba kuNkulunkulu lababambelele kulo nabo lekutsi bonkhe bantfu, labalungile nalabangakalungi, bayawuvuka ekufeni.

¹⁶ Ngako-ke nami ngetama ngemandla ami onkhe ngetikhatsi tonkhe, kuze kutsi ngihlale nginanembeza longenacala kuNkulunkulu nakubantfu.

¹⁷ “Emvakweminyaka leminyenti ngahamba, bengibuyele kuletsa tipho esiveni sakitsi kanye nekunikela imihlatjelo.

¹⁸ Bangikhandza ethempelini sengihlanjululiwe. Kwakungekho sicumbi sebantfu, kungekho nasiphitsiphitsi.

¹⁹ Kodvwa kwakunemaJuda lambalwa labephuma esifundzeni sase-Asiya lebekufanele nawo abe la embikwakho angibeke emacala,

²⁰ nome-ke basho bona ngekwabo laba labalapha kutsi cala lini lengatfolakala nginalo ngesikhatsi ngisembikweLiqoqo labo,

²¹ ngaphandle kwentfo yinye nje lengayikhuluma ngisesemkhatsini wabo, ngamemeta ngatsi: ‘Lamuhla ngimangalelwe ngelitsemba lekutsi labafile bayawuvuka baphile.’ ”

²² Kodvwa Feliksi labesayatisisa kahle lendzaba yaleNdlela, kutsetfwa kwalelicala wakugucisa ngekutsi: “Lelicala ngiyawulijuba nasekufike Khenela Lisiyasi.”

²³ Wase utfumela indvuna kutsi igadze Pawula, kodvwa abe nenkhululeko letsite, nekutsi bangani bakhe bangalelwa kutawumsita nome ngani layeswele.

Pawula ushumayela Khristu kuFeliksi naDrusila

²⁴ Emvakwemalangana Feliksi weta nemkakhe Drusila labengumJuda; watfumela kwalandvwa Pawula lafike wamlalela asakhuluma ngekukholwa kuKhristu Jesu.

²⁵ Kodvwa asachubeka achaza ngekutiphatsa kahle, kutibamba nangekugwetjwa lokuseta, Feliksi wetfuka watfutfumela wadzimate watsi: “Kwamanje ase uhambe. Ngitawuphindze ngikubite, nase ngitfole lesinye sikhatsi.”

²⁶ Abenelitsemba lekutsi Pawula abetamdizela ngemali; ngako-ke abevame kuhle ambita akhulume naye.

²⁷ Ekupheleni kweminyaka lemibili sikhundla saFeliksi satsatfwa nguPhokhiyusi Festusi. Njengobe Feliksi abefuna kutsandvwa ngemaJuda, wavele washiya Pawula asesejele.