Imisebenti yebaPhostoli 22 - Siswati 1996 Bible

¹ “Madvodza, bazalwane, nani bobabe, ase ningilalele sengibeke emavi ekutivikela embikwenu.”

² Batsi kube bamuve akhuluma ngesiHebheru, babindza batsi dvu, wachubeka watsi:

³ “Mine ngiliJuda lekutalwa, ngatalelwa eThasusi leseSilisiya, kodvwa ngifundze la eJerusalema, ngifundziswa nguGamaliyeli. Ngatfola kuceceshwa lokushubile ngemtsetfo wabokhokho betfu, futsi ngangitinikele ngenshisekelo lenkhulu kuNkulunkulu njengani nonkhe lenilapha embikwami lamuhla.

⁴ Ngangibahlupha kakhulu kuze kubesekufeni bonkhe lababelandzela leNdlela, ngibabophe ngibafake nasemajele bonkhe labadvuna nalabasikati;

⁵ ngisho umPhristi Lomkhulu neLiqoqo lonkhana lingangifakazela kutsi loku lengikushoko kuliciniso. Nganikwa ngabo tincwadzi letatiyimvume ticondziswe kubazalwane labangemaJuda eDamaseko, ngako-ke ngangicondze khona kuyawubopha labo bantfu ngibaletse la eJerusalema, baboshwe ngetinketane, batewujeziswa.”

Pawula ukhuluma ngekuphendvuka kwakhe

⁶ “Ngangisahamba sengitawufika eDamaseko, kwatsi sekutawuba ngusemini lenkhulu, kukhanya lokukhulu lokwakuphuma ezulwini kwangibaneka ndzawo tonkhe.

⁷ Ngawela phansi ngeva livi litsi: ‘Sawula! Ye Sawula! Ungihluphelani?’

⁸ Ngabuta ngatsi: ‘Ungubani wena, Nkhosi?’ Wangiphendvula watsi: ‘NginguJesu waseNazaretha, lona lomhluphako.’

⁹ “Lamadvodza bengihamba nawo akubona lokukhanya, kodvwa akazange alive livi lalona abekhuluma nami.

¹⁰ Ngabuta ngatsi: ‘Kufanele ngenteni, Nkhosi?’ INkhosi yatsi kimi: ‘Sukuma uye eDamaseko, lapho utawutjelwa khona konkhe lokhetselwe kutsi ukwente.’

¹¹ “Njengobe ngase ngiyimphumphutse ngiphandlwe ngulokukhanya, lamadvodza bengihamba nawo angidvonsa ngesandla saze sayawungena eDamaseko.

¹² Kwakukhona indvodza, leyayingu-Ananiyase libito layo; yayikholwa, iwuhlonipha umtsetfo yatiswa ngiwo onkhe emaJuda labehlala eDamaseko,

¹³ yeta kimi, yafike yema eceleni kwami yatsi: ‘Mzalwane Sawula, ngibuke!’ Ngekuphatima kweliso ngabona, ngayibuka.

¹⁴ Yase itsi kimi: ‘Nkulunkulu wabokhokho betfu ukukhetsile kutsi wati intsandvo yakhe, ubone Lolungile wakhe, umuve akhuluma nawe ngeliphimbo lakhe,

¹⁵ ngobe utawuba ngufakazi wakhe wekutjela bonkhe bantfu loko lokubonile nalokuvile.

¹⁶ Pho, usebanjwe yini? Sukuma ubhajatiswe, utsetselelwe tono takho, ukhuleke egameni lakhe.’ ”

Pawula ulandzisa ngekutfunyelwa kwakhe kubetive

¹⁷ “Ngancandzeka ngabuyela eJerusalema, ngatsi nje ngisathandaza ethempelini, ngatsatfwa ngumbono,

¹⁸ ngabona iNkhosi itsi kimi: ‘Nonopha uhambe lapha eJerusalema, ngobe bangeke babemukele bufakazi bakho ngami!’

¹⁹ Ngaphendvula ngatsi: ‘Nkhosi, ingani bati kahle-hle kutsi bengingena emasinagogeni ngibabophe ngibashaya bonkhe labakholwa nguwe.

²⁰ Nangesikhatsi kubulawa Stefano, fakazi wakho, nami matfupha ngangikhona lapho, ngibambisene nalabo babulali bakhe ngekutsi ngibaphatsele timphahla tabo.’

²¹ INkhosi yatsi kimi: ‘Hamba, ngobe ngitakutfumela khashane kubetive.’ ”

Pawula nakhenela

²² Bantfu babeloku balalele Pawula, waze wefika kuwo lamagama, kodvwa base bamemeta kakhulu batsi: “Msuseni! Umuntfu lonje akafuneki emhlabeni!”

²³ Bamemeta badzabula timphahla tabo, basakata inhlabatsi emoyeni.

²⁴ Lokhenela watsi Pawula akafakwe emalawini emasotja, nekutsi bamhlolisise ngekumbhambabula, kuze batewutfola kahle kutsi kwentiwa yini lokutsi bantfu baphambane naye kangaka.

²⁵ Kodvwa kwatsi nase bambophile sebatawumbhambabula Pawula wakhuluma nalendvuna yelibutfo leyayime eceleni kwakhe watsi: “Kungumtsetfo yini kutsi wena ubhambabule umRoma asengakalahlwa licala?”

²⁶ Indvuna yelibutfo yatsi kube ikuve loko, yahamba yaya kukhenela yabuta yatsi: “Utawutsini-ke nyalo, ngobe lendvodza ingumRoma?”

²⁷ Ngako-ke khenela waya kuPawula, wefike wambuta watsi: “Ase ungitjele, ungumRoma yini?” Pawula watsi: “Yebo.”

²⁸ Lokhenela wase utsi: “Mine ngabukhiphela imali lenhle lobuRoma.” Pawula wamphendvula watsi: “Kodvwa mine ngabutfola ngekutalwa.”

²⁹ Ngako-ke labo babetawuphenya Pawula ngemibuzo bakhwesha kuye ngekushesha, nakhenela wesaba, nakabona kutsi Pawula ngumRoma ngekutalwa nekutsi abesambophe ngetinketane.

Pawula embikweLiqoqo

³⁰ Khenela watsandza kwati kahle-hle kutsi emaJuda abembeka licala lani loPawula. Ngako-ke ngakusasa watsi akatfukululwe tinketane. Wase ubita umhlangano wetikhulu tebaphristi kanye nalo lonkhe Liqoqo. Waletsa Pawula embikwabo.