Imisebenti yebaPhostoli 21 - Siswati 1996 Bible

BoPawula bavakashela eJerusalema

¹ Satsi kube sehlukane nabo, santjweza ngemkhumbi saze sefika eKhosi. Ngakusasa sefika eRodosi, satsi nasisuka lapho, sacondza ePhatara.

² Sakhandza umkhumbi loya eFenisiya, sekhwela sahamba ngawo.

³ Sefika endzaweni lapho sabona khona sichingi saseSiphrosi, sasigudla ngaseningizimu saya eSiriya. Sehlela eThire, ngobe lapho bekutakwehla khona timphahla betisemkhunjini.

⁴ Sakhandza emakholwa, sahlala nawo liviki. Ngemandla aMoya Longcwele batjela Pawula kutsi angayi eJerusalema.

⁵ Kepha kwatsi kube kuphele sikhatsi sekuhlala kwetfu nabo, sabashiya sachubeka neluhambo lwetfu. Basiphekeletela bonkhe kanye nalabasikati nebantfwana, baze basibeka ngephandle kwalelidolobha. Sefika elugwini saguca sathandaza.

⁶ Sase siyavalelisana sakhwela emkhunjini, bona-ke babuyela emuva emakhaya.

⁷ Sachubeka neluhambo lwetfu sesuka eThire ngemkhumbi saya ePhitolemayisi, lapho sefika sabingelela bazalwane. Sahlala nabo lilanga linye.

⁸ Ngakusasa sahamba saze sefika eKhesariya. Sefike sangenisa sahlala emtini wemvangeli Filiphu lobekangulomunye webasiti lababesikhombisa.

⁹ Bekanemadvodzakati, tintfombi letine letatiphrofetha.

¹⁰ Satsi sisahleti emalangana, kwefika umphrofethi, libito lakhe kungu-Agabusi aphuma eJudiya.

¹¹ Wefika kitsi watsatsa libhande laPawula walibopha etinyaweni nasetandleni takhe watsi: “Naku lokushiwo nguMoya Longcwele: ‘Umnikati walelibhande utawuboshwa ngemaJuda kanje eJerusalema amnikele etandleni tebetive.’ ”

¹² Satsi nasiva loko, tsine kanye nebantfu baleyo ndzawo samncenga Pawula kutsi angasayi eJerusalema.

¹³ Kodvwa waphendvula watsi: “Nikhalelani kanjena nize ningidzabukise enhlitiyweni? Angikalindzeli kuphela kutsi ngiboshwe eJerusalema kepha ngilungele nekutsi ngife ngenca yeNkhosi Jesu.”

¹⁴ Sehluleka kumvimbela, sase siyamyekela satsi: “Akwenteke intsandvo yeNkhosi!”

¹⁵ Emvakwalawo malanga salungisa timphahla tetfu sakhuphukela eJerusalema.

¹⁶ Labanye bafundzi baseKhesariya bahamba natsi basiyisa emtini wendvodza lebesitawuhlala kayo, Mnasoni wekuchamuka eSiphrosi, lobekasalikholwa sikhatsi lesidze.

Pawula uvakashela Jakobe

¹⁷ Nasifika eJerusalema, bazalwane basemukela ngenjabulo.

¹⁸ Ngakusasa Pawula wahamba natsi sayawubona Jakobe. Kwakukhona nebabonisi bonkhe belibandla.

¹⁹ Pawula wababingelela wase ubanika umbiko lophelele mayelana nemsebenti lowentiwe nguNkulunkulu kubantfu betive ngaye.

²⁰ Batsi kube bamuve bonkhe, badvumisa Nkulunkulu. Base batsi kuPawula: “Uyabona-ke, mzalwane, kukhona tinkhulungwane temaJuda letikholwako, bonkhe babambelele kakhulu emtsetfweni.

²¹ Futsi sebatjeliwe ngawe kutsi bewufundzisa onkhe emaJuda lahlala emaveni aletinye tive kutsi akayekele umtsetfo waMosi, uwatjela nekutsi akayekele kusoka bantfwabawo nekwenta emasiko.

²² “Nakanjani batawuva kutsi sewufikile. Kufanele kwentiwe njani-ke ngaleyo ndzaba?

²³ Yenta naku-ke lesikutjela kona. Kukhona emadvodza lamane lapha lente sifungo.

²⁴ Hamba nalamadvodza utihlanganise nawo nitihlambulule ngekwelisiko, bese uwakhokhela tindleko tawo; atawube asahhula tinwele tetinhloko tawo. Ngekwenta njalo-ke bonkhe bantfu batakwati kutsi kute liciniso kuto tonkhe letintfo labatjelwe tona ngawe, kepha batakwati kutsi nawe uhamba ngawo umtsetfo waMosi.

²⁵ Kepha-ke mayelana nebetive labakholwako sibatfumelele incwadzi, sabatjela kutsi bangakudli kudla lokwentelwe tithico, nengati, nesilwane lesitifele, nekutsi babalekele bugwadla.”

²⁶ Pawula wase utsatsa lamadvodza kwatsi ngakusasa bahlanjululwa, wase uya ethempelini wayawubatjela kutsi lokutihlambulula kutaba sikhatsi lesinganani, bese kwentiwa umnikelo walowo nalowo kubo.

Pawula uboshwa ethempelini

²⁷ Kwatsi lapho sekusele kancane kutsi kuphele emalanga lasikhombisa, emaJuda ase-Asiya abona Pawula asethempelini, ase afaka kubantfu umoya wetikhova wekutsi basuse siphitsiphitsi, ambamba,

²⁸ amemeta atsi: “Madvodza aka-Israyeli, sitani! Nangu lomuntfu lohamba tonkhe tindzawo afundzisa bantfu lokuphambene nesive sakitsi, nemtsetfo waMosi kanye nalendzawo. Manje-ke sewudzimate wafaka bantfu betive ethempelini kutsi batewungcolisa lendzawo lengcwele.”

²⁹ Bakusho loko ngobe babebone Trofimusi wase-Efesu ahamba naPawula kulo lelidolobha, base bacabanga kutsi ungene naye kulelithempeli.

³⁰ Kwaba nesiphitsiphitsi kulo lonkhe lelidolobha, bantfu bagijimela ndzawonye babamba Pawula bamhudvulela ngephandle kwelithempeli, masinyane iminyango yavalwa.

³¹ Babesetama kumbulala Pawula ngesikhatsi kutfunyelwa ligama kukhenela wemabutfo aseRoma kutsi kukhona umsindvo losukile eJerusalema.

³² Masinyane khenela wahamba naletinye tindvuna temabutfo nemasotja baphutfuma kulesicuku. Satsi kube simbone lesicuku eta ahamba nemasotja, sayekela kushaya Pawula.

³³ Khenela wacondza kuPawula wambamba, watsi akaboshwe ngetinketane letimbili. Wase uyababuta kutsi ngubani yena lomuntfu, nekutsi wenteni.

³⁴ Labanye kulesicumbi bamemeta basho loku, nalabanye basho lokwa. Kwaba khona kungavumelani lokunyenti lokwaze kwabanga kutsi khenela angatfoli kahle kutsi kubangwani. Wase utsi kulamadvodza labehamba nawo akatsatse loPawula amyise emalawini emabutfo.

³⁵ Atsi emasotja nakefika etitebhisini, ametjatsa, ngobe abona kutsi sicumbi sesimfuna ngetandla.

³⁶ Sicumbi sebantfu sasimlandzela ngemuva simemeta sitsi: “Akabulawe!”

Pawula utivikela ngenkhulumo

³⁷ Kwatsi nase bafuna kumfaka esitokisini, Pawula wakhuluma nakhenela watsi: “Ngivumelekile yini kukhuluma nawe?” Khenela wambuta watsi: “Uyakwati yini kukhuluma siGriki?

³⁸ Nakunjalo, pho, akusiwe yini lomGibhithe losandza kususa lutfutfuva ngekubutsa ti-4 000 temadvodza latidlova, lavukela umbuso, wawaholela ehlane?”

³⁹ Pawula waphendvula watsi: “Mine ngiliJuda lekutalwa eThasusi esigodzini saseSilisiya, ngisakhamuti selidolobha lelibaluleke kakhulu. Ase ungivumele ngikhulume nalabantfu!”

⁴⁰ Khenela wamvumela. Pawula wema etitebhisini, waphakamisa tandla wababindzisa, batsi kube babindze wacala wakhuluma kubo ngesiHebheru watsi: