Imisebenti yebaPhostoli 2 - Siswati 1996 Bible

Kufika kwaMoya Longcwele

¹ Ngesikhatsi kufika lilanga lePhentekhoste babehlangene bonkhe ndzawonye.

² Batsi betfuka kwabe kuchamuka umsindvo lomkhulu esibhakabhakeni lowevakala sengatsi kuhhusha kwemoya lomkhulu, wagcwalisa yonkhe lendlu babehleti kuyo.

³ Kwabonakala kubo inkhehlenkhehle yemlilo kusengatsi yetilimi letehlukana ekhatsi, tahlala emuntfwini ngamunye ngamunye.

⁴ Bonkhe bagcwaliswa ngaMoya Longcwele; base bakhuluma ngaletinye tilimi, njengobe Moya wabapha kuphumisela.

⁵ Kwakukhona emaJuda labehlala eJerusalema, bantfu lababesaba Nkulunkulu bavela etiveni tonkhe temhlaba.

⁶ Kwatsi kube kuvakale lomsindvo, ticumbi tebantfu tabutsana ndzawonye. Bamangala badzidzeka bonkhe, ngobe ngulowo nalowo wabeva bakhuluma ngelulwimi lwakubo;

⁷ babutana ngekwetfuka nangekumangala batsi: “Kantsi akusibo baseGalile bonkhe yini labantfu labakhuluma kanje?

⁸ Pho, kwentiwa yini kutsi sonkhe sibeve bakhuluma ngetilimi takitsi?

⁹ Siphuma ePhathiya, eMediya nase-Elamu, eMesophothamiya, eJudiya naseKhaphadosiya, ePhontusi nase-Asiya,

¹⁰ eFrigiya nasePhamfiliya, eGibhithe kanye nasetifundzeni taseLibhiya ngaseSirene, kantsi labanye betfu baphuma eRoma,

¹¹ emaJuda nebetive lababephendvukele enkholweni yemaJuda, nalabanye betfu baphuma eKhrethe nase-Arabiya, kodvwa sonkhe lapha sibeva ngetilimi takitsi bakhuluma ngemisebenti lemikhulu yaNkulunkulu.”

¹² Basamangele badzidzekile babutana bodvwana batsi: “Kusho kutsini loku?”

¹³ Kodvwa labanye bahlekisa ngawo lamakholwa batsi: “Labantfu badzakiwe.”

Inshumayelo yaPhetro ngelilanga lePhentekhoste

¹⁴ Kodvwa Phetro wasukuma akanye nebaphostoli labali-11, wakhuluma ngelivi lelikhulu watsi: “Sive semaJuda, nani nonkhe lenakhile eJerusalema, yatini loku; bekani indlebe ningilalele kahle.

¹⁵ Laba abakadzakwa njengaloku nicabanga nine; empeleni kusesekuseni ngeli-awa lemfica.

¹⁶ Kodvwa loku nguloko lokwakhulunywa ngumphrofethi Joweli lowatsi:

¹⁷ “ ‘Utsi Nkulunkulu: “Naku lengiyawukwenta ngetikhatsi tekugcina: Ngiyakutfululela Moya wami etikwabo bonkhe bantfu. Emadvodzana nemadvodzakati enu ayawuphrofetha, emajaha enu ayawubona imibono, emakhehla ayawuphupha emaphupho.

¹⁸ Yebo, kulawo malanga ngiyawutfululela Moya wami etincekwini nasetincekukatini tami, tiyawuphrofetha.

¹⁹ Ngiyakwenta timangaliso etulu esibhakabhakeni, netibonakaliso emhlabeni phansi: ingati, nemlilo, nekushunqa kwentfutfu.

²⁰ Lilanga liyawuba mnyama, inyanga ibe bovu njengengati, lingakefiki lilanga lelikhulu nalelimatima leNkhosi.

²¹ Labo-ke, labayawulibita libito leNkhosi, bayawusindziswa.” ’

²² “Madvodza aka-Israyeli, vanini lamavi! Jesu waseNazaretha abeyindvodza leyafakazelwa nguNkulunkulu embikwenu, ngemisebenti lemikhulu yemandla, nangetimangaliso kanye nangetibonakaliso letentiwa nguNkulunkulu ngaye; nani matfupha niyakwati loku, ngobe kwenteka emehlweni enu.

²³ Nkulunkulu ngekwatinchanti kwakhe nangentsandvo yakhe abesakumisile kutsi Jesu uyawuniketwa kini; nine-ke nambulala ngekumbetsela esiphambanweni ngetandla tetoni.

²⁴ Kodvwa Nkulunkulu wamvusa kulabafile; wamkhulula etinhlungwini tekufa, ngobe kwakungeke kwenteke kutsi kufa kumbambe.

²⁵ NaDavide wakhuluma ngaye watsi: “ ‘Ngayibona iNkhosi embikwami ngetikhatsi tonkhe, ngobe ingasesandleni sami sekudla, kuze nginganyakatiswa.

²⁶ Ngako-ke inhlitiyo yami iyajabula, nemavi ami agcwele intfokoto; ngetulu kwaloko umtimba wami uyawuhlala etsembeni,

²⁷ ngobe awuyikuwushiya umphefumulo wami endzaweni yalabafile, ungeke uvume kutsi Longcwele wakho abole ethuneni.

²⁸ Ungikhombisile tindlela letingiholela ekuphileni, ngebukhona bakho uyawungigcwalisa ngekujabula.’

²⁹ “Bazalwane, ngifanele ngikhulume ngalokukhanyako ngakhokho wetfu Davide kutsi wafa wangcwatjwa, nelidliza lakhe likhona la kitsi nalamuhla.

³⁰ Njengemphrofethi-ke ati futsi kutsi Nkulunkulu abetsembisile ngesifungo kuye kutsi uyawukhetsa lomunye wesitukulwane sakhe amente abe yiNkhosi njengaye.

³¹ Davide abekubone kucala kuvuka kwaKhristu ekufeni nakatsi: “ ‘Akayekelwanga endzaweni yalabafile, nemtimba wakhe awuzange ubole ethuneni.’

³² “Yena loJesu, Nkulunkulu wamvusa ekufeni, sonkhe sibofakazi balendzaba.

³³ Asaphakanyiselwe ngasesandleni sekudla saNkulunkulu wemukeliswa nguYise setsembiso lesinguMoya Longcwele lebesetsenjiswe Yena, wabuye wamtfululela kitsi. Ngiko loku lenikubonako nalenikuvako.

³⁴ NaDavide lucobo lwakhe akenyukelanga ezulwini, noko watsi: “ ‘INkhosi yatsi eNkhosini yami: Hlala la ngesekudla sami,

³⁵ ngize ngibeke titsa takho ngaphansi kwetinyawo takho.’

³⁶ “Bonkhe bantfu baka-Israyeli, kufanele bati kahle kutsi nguye yena loJesu, lenambetsela esiphambanweni, Nkulunkulu lasamente iNkhosi naKhristu!”

³⁷ Kwatsi bantfu nabakuva loku, bahlabeka etinhlitiyweni base batsi kuPhetro nakulabanye baphostoli: “Pho, bazalwane, sitakwenta njani?”

³⁸ Phetro wabaphendvula watsi: “Phendvukani nibhajatiswe nonkhe ngamunye ngamunye egameni laJesu Khristu, kuze nitsetselelwe tono tenu nemukeliswe nesipho lesinguMoya Longcwele.

³⁹ Ngobe setsembiso saNkulunkulu senu nesebantfwabenu kanye nabo bonkhe labakhashane, lowo nalowo loyawubitwa nguNkulunkulu, iNkhosi yetfu, kutsi ete kuye.”

⁴⁰ Phetro wafakaza kubo abancenga ngemavi lamanyenti, atsi: “Tisindziseni kulesitukulwane lesiphambene!”

⁴¹ Labo labalemukela livi lakhe babhajatiswa; babengacishe babe ti-3 000 tebantfu letengetelwa kubo ngalelo langa.

⁴² Bacinisela njalo bahlanganyela etimfundzisweni tebaphostoli, nasebudlelwaneni, nasekuhlephuleni sinkhwa, nasemithandazweni.

Imphilo emkhatsini wemakholwa

⁴³ Bonkhe bantfu befikelwa kwesaba: timangaliso netibonakaliso letinyenti tentiwa baphostoli.

⁴⁴ Bonkhe labakholwako bachubeka ngebudlelwane ndzawonye, benetisana ngetimphahla tabo.

⁴⁵ Batsengisa ngetitandi, nangemapulazi nangetimphahla tabo bentela kwenetisana ngaleyo mali, kuye ngekutsi lowo nalowo udzingani.

⁴⁶ Onkhe emalanga babecinisela njalo ekuhlanganeni ethempelini, banhlitiyonye, babevakashelana emakhaya, badle ndzawonye ngetinhlitiyo letijabulako naletitfobekile,

⁴⁷ badvumisa Nkulunkulu, babetsandzeka kubo bonkhe bantfu. Onkhe emalanga iNkhosi yayibengetela ngalabo babesindziswa.