Imisebenti yebaPhostoli 18 - Siswati 1996 Bible

BoPawula eKhorinte

¹ Emvakwaloko Pawula wesuka e-Athene waya eKhorinte.

² Lapho akhandzana neliJuda, libito lalo kungu-Akhwila lekutalwa ePhontusi belisandza kubuya eTaliyane nemkalo Phrisila, ngobe Klawudiyuse bekacoshe onkhe emaJuda kutsi akesuke eRoma. Pawula wase uyawubabona,

³ njengobe naye abenta umsebenti lofanana newabo, wekutfunga emathende, wahlala wasebentisana nabo.

⁴ Bekavamise kutsi njalo ngemaSabatha aye esinagogeni aphendvulane nemaJuda nemaGriki etama kuwazuza.

⁵ Kwatsi kube kufike Silasi naThimothi baphuma eMasedoniya, Pawula wase utinikela ngalokuphelele ekushumayeleni nasekufakazeni kumaJuda kutsi Jesu unguKhristu.

⁶ Batsi nabamphikisa bangavumelani naye bametfuka, watsintsitsa lutfuli etingutjeni takhe wase utsi kubo: “Ingati yenu ayibesemahlombe enu, mine sengite licala. Kusukela nyalo sengitakuya kubetive.”

⁷ Wesuka lapho wayawuhlala endlini yalomunye umuntfu bekutsiwa nguThithiyusi Justusi, sikhonti saNkulunkulu, indlu yakhe yayisedvute nelisinagoge.

⁸ Kepha Khrispusi, umphatsi welisinagoge, wakholwa eNkhosini kanye nendlu yakhe, nebantfu labanyenti baseKhorinte lababeve livi kuPawula, bakholwa, base bayabhajatiswa.

⁹ Kepha kwatsi ngalelinye lilanga ebusuku Pawula wabona umbono, iNkhosi yatsi kuye: “Ungesabi, chubeka ukhulume ungabindzi,

¹⁰ ngobe nginawe, futsi kute umuntfu lotakuhlasela akulimate, ngobe nginebantfu bami labanyenti kulelidolobha.”

¹¹ Ngako-ke wabe sewuhlala umnyaka netinyanga letisitfupha afundzisa bantfu livi laNkulunkulu.

¹² Kwatsi ngesikhatsi kuphetse Galiyo e-Akhaya, onkhe emaJuda ase ahlanganyela Pawula ambamba amyisa enkantolo,

¹³ atsi: “Lomuntfu lona ucindzetela bantfu kutsi bakhonte Nkulunkulu ngendlela lephambene nemtsetfo.”

¹⁴ Kodvwa kwatsi Pawula nakatsi uvula umlomo, Galiyo wamjuba lulwimi watsi kumaJuda: “MaJuda-ndzini, kube bekusento lesibi nome licala lelilukhuni nami bekutawuba nesizatfu sekutsi nginibeketelele nginilalele,

¹⁵ kodvwa njengobe kusitfungo semibuzo nje ngemavi, nangemagama, nangemitsetfo yenu, tiboneleni nine ngekwenu; angingeni mine ekwehluleleni tintfo letinje.”

¹⁶ Wabakhiphela ngephandle kwenkantolo.

¹⁷ Besuka bonkhe babamba Sostenesi, umphatsi welisinagoge, bamshaya embikwenkantolo, kodvwa Galiyo akakunakanga loko.

BoPawula besuka eKhorinte baya e-Antiyokhi

¹⁸ Pawula wahlala nebazalwane emalanga lamanyenti. Wase uyabashiya wahamba ngemkhumbi naboPhrisila na-Akhwila baya eSiriya. Angakahambi eKhenkhariya wahhula inhloko yakhe, ngobe abente sifungo.

¹⁹ Batsi nabefika e-Efesu, wabashiya lapho boPhrisila na-Akhwila, yena waya wangena esinagogeni waphendvulana nemaJuda.

²⁰ Batsi bayamcela kutsi asahlale nabo sikhashana lesidze wala,

²¹ kodvwa nasabavalelisa watsi: “Ngitawubuye ngite kini, Nkulunkulu nakavuma.” Wantjweza ngemkhumbi losuka e-Efesu.

²² Watsi nakefika eKhesariya, wakhuphukela eJerusalema kuyawubingelela libandla, wase wehlela e-Antiyokhi.

²³ Emvakwekuhlala sikhashana lapho wase uyesuka udzabula tigodzi tetifundza taseGalathiya naseFrigiya ahambe akhutsata bonkhe bazalwane.

Apolosi ushumayela e-Efesu naseKhorinte

²⁴ Kwefika liJuda e-Efesu, libito lalo kungu-Apolosi, kungelekudzabuka e-Alekzandriya. Belikwati kukhuluma futsi liyati kakhulu imiBhalo.

²⁵ Belifundzisiwe ngeNdlela yeNkhosi, ligcwele inshisekelo emoyeni walo; lafundzisa lichaza kahle emaciniso macondzana naJesu, kepha-ke lona belati ngembhabhatiso waJohane kuphela.

²⁶ Lo-Apolosi wacala kushumayela ngesibindzi esinagogeni kwatsi kube Phrisila na-Akhwila bamuve, bamtsatsa bamyisa ekhaya bafike bamchazela kahle ngeNdlela yaNkulunkulu.

²⁷ Kwatsi nasafuna kwewelela eGrisi, bazalwane bamkhutsata, base babhalela bazalwane kutsi babomemukela. Watsi kube efike, waba lusito lolukhulu kulabo bese bakholiwe ngemusa waNkulunkulu;

²⁸ ngobe emaJuda wawehlula eshashalatini ngekuhlakanipha lokukhulu, awakhombisa ngekwemiBhalo kutsi Jesu unguKhristu.