Imisebenti yebaPhostoli 17 - Siswati 1996 Bible

Kusuka kwesiphitsiphitsi eThesalonika

¹ BoPawula bahamba badzabula emadolobheni ase-Amfipholisi nase-Apholoniya, bangena eThesalonika lapho bekunelisinagoge lemaJuda khona.

² Njengemvamisa Pawula wangena esinagogeni, waphikisana nabo ngetemiBhalo emaSabatha lamatsatfu,

³ abachazela abakhombisa ngekwemiBhalo kutsi Khristu bekufanele afe aphindze avuke kulabafile, asho nekusho kutsi: “LoJesu lengimshumayelako kini nguye loKhristu.”

⁴ Labanye babo bakholwa base batihlanganisa naboPawula naSilasi, njengobe kwenta sicuku lesikhulu semaGriki labesaba Nkulunkulu, kanye nalabasikati labanyenti lababehloniphekile.

⁵ Kodvwa emaJuda aba nemona ase abutsa tihlophoyi letatitizulela etitaladini atihlanganisa, atsi atisuse umsindvo tihlasele umuti waJasoni, afuna kukhipha boPawula naSilasi abaletse embikwemkhambatsi.

⁶ Kwatsi kube bangabakhandzi lapho, base bahudvula Jasoni nalabanye bazalwane babayisa etimantjini telidolobha, batsi: “Labantfu labadvungutelise umhlaba bawubhekisa phansi, sebadzimate befika nakulelidolobha lakitsi.

⁷ NaJasoni ubemukele emtini wakhe. Labantfu labephula umtsetfo waKhesari, uMbusi, batsi kukhona lenye inkhosi lenguJesu.”

⁸ Bantfu kanye netiphatsimandla talelo dolobha tadvungutela natikuva loko,

⁹ timantji tatsatsa sibambiso kuboJasoni nalabanye tase tiyabakhulula.

BoPawula eBheriya

¹⁰ Kwatsi ebusuku bazalwane bababalekisa boPawula naSilasi babatfumela eBheriya. Batsi kube befike khona bangena esinagogeni lemaJuda.

¹¹ Bantfu balapho babencono kakhulu kunebaseThesalonika, ngobe livi balemukela ngalenkhulu inshisekelo. Onkhe emalanga babephenyisisa imiBhalo bahlolisise kutsi kunjalo ngempela yini.

¹² Labanyenti babo nalabasikati labasembili bemaGriki kanye nalabadvuna labanyenti bemaGriki bakholwa.

¹³ Kwatsi kube emaJuda aseThesalonika eve kutsi livi laNkulunkulu belishunyayelwa nguPawula naseBheriya, efika nakhona kutewususa sidvungudvungu.

¹⁴ Masinyane bazalwane babalekisa Pawula bamyisa elusentseni lwelwandle, kodvwa boSilasi naThimothi basala eBheriya.

¹⁵ Labo labaphekeletela Pawula bahamba naye baze bambeka e-Athene. Nase babuyela emuva eBheriya, babuya nemlayeto waboSilasi naThimothi uvela kuPawula kutsi babononopha befike kuye.

Pawula e-Athene

¹⁶ Ngesikhatsi Pawula asehleti e-Athene alindzele boSilasi naThimothi, umoya wakhe wakhatsateka kakhulu, nakabona titfombe tabonkulunkulu letatigcwele kulelidolobha.

¹⁷ Ngako waphikisana nemaJuda nebetive labakholwako esinagogeni, kantsi futsi abephindze akhulume onkhe emalanga etinkhundleni, aphikisana nalabo lekwakwenteka babelapho.

¹⁸ Letinye tati letitsite tema-Ephikhuri nemaStoyiki taphikisana naye. Letinye tatsi: “Lesibhungayeti setama kutsini?” Letinye tatsi: “Shangatsi ushumayela ngabonkulunkulu labangatiwa.” Takusho loku ngobe Pawula abeshumayela ngaJesu nangekuvuka kwalabafile.

¹⁹ Base bayamtsatsa Pawula bamyisa enhlanganweni yase-Ariyophagusi, batsi: “Singatsandza kutsi sati ngalemfundziso yakho lensha loyishumayelako,

²⁰ ngobe usiletsele tindzaba letingazange setingene etindlebeni tetfu. Ngako-ke singatsandza kutsi usichazele kutsi tisho kutsini.”

²¹ Phela tonkhe takhamiti netihambi tase-Athene taticitsa sonkhe sikhatsi sato ekukhulumeni nasekulaleleni nome ngabe yini lensha.

²² Pawula wema enhlanganweni yase-Ariyophagusi watsi: “Bantfu base-Athene, ngiyanibona kutsi niyakholwa impela.

²³ Ngobe ngitsite ngisahambahamba kulelidolobha lenu ngibuka letindzawo lenikhontela kuto, ngakhandza nelilati lelibhalwe kutsi: ‘KUNKULUNKULU LONGATIWA.’ “Ngako-ke loko lenikukhonta ningakwati, ngiko-ke loku lengikushumayela kini.

²⁴ LoNkulunkulu lowenta yonkhe indalo yemkhatsi, nguNkulunkulu welizulu nemhlaba, akahlali emathempelini lakhiwe ngetandla tebantfu.

²⁵ Futsi akadzingi nalutfo lolungumsebenti webantfu labangamnika lona, ngobe yena nguye loniketa imphilo nekuphefumula nako konkhe kubantfu bonkhe.

²⁶ Wenta tonkhe tive ngamuntfu munye kutsi tihlale ebusweni bonkhe bemhlaba, wemisa tikhatsi tekuphakama netekwehla kwato kanye nemikhawulo lapho kufanele tigcine khona.

²⁷ Wakwenta loko kuze timfune kumbe tingamtfola ngesikhatsi tisamfuna, ibe kantsi Nkulunkulu akekho khashane ngisho nakumunye wetfu.

²⁸ Ngobe siphila sihambe sikuye, njengobe sinje, netimbongi takini tishito tatsi: “ ‘Natsi futsi singumliba wakhe.’

²⁹ “Njengobe singumliba wakhe, akukafaneli kutsi sicabange kutsi simo saNkulunkulu sifanana negolide nome nesiliva nome nelitje lokungumsebenti lobatwe ngebungcweti nangekucabanga kwemuntfu.

³⁰ “Nkulunkulu watitsalalisela tikhatsi tekungati kwebantfu, kepha-ke manje sewuyala bantfu bonkhe etindzaweni tonkhe kutsi baphendvuke,

³¹ ngobe umisile lilanga lapho ayakwehlulela khona umhlaba wonkhe ngeliciniso lelimsulwa ngemuntfu munye lamkhetsile; ngaye sewuvete siciniseko kubantfu bonkhe ngekutsi amvuse kulabafile.”

³² Kwatsi nabamuva akhuluma ngekuvuka kulabafile, labanye bamhleka bulima, kepha labanye batsi: “Sitawubuye sikuve nawukhuluma ngaloko.”

³³ Ngako Pawula wesuka emkhatsini wabo.

³⁴ Kepha lamanye emadvodza atihlanganisa naye akholwa. Emkhatsini wawo bekukhona naDiyonisiyusi labelilunga le-Ariyophagusi nemfati labenguDamarisi kanye nalabanye.