Imisebenti yebaPhostoli 15 - Siswati 1996 Bible

Umhlangano waseJerusalema

¹ Lamanye emadvodza laphuma eJudiya aya e-Antiyokhi acala afundzisa bazalwane atsi: “Ningeke nisindziswe naningakasoki njengekusho kwelisiko laMosi.”

² BoPawula naBhanabasi baphikisana nabo kuloko, ngako-ke kwase kuncunywa kutsi Pawula naBhanabasi nalabanye base-Antiyokhi kufanele bahambe baye eJerusalema bayewubonana nebaphostoli nebabonisi ngaleyo ndzaba.

³ Endleleni yabo batfunywe libandla, basadzabula eFenisiya naseSamariya babika kutsi betive baphendvukela kanjani kuNkulunkulu; letindzaba taletsa kujabula lokukhulu kubazalwane bonkhe.

⁴ Kwatsi nabefika eJerusalema, bemukelwa libandla, nebaphostoli, nebabonisi, babatjela ngako konkhe Nkulunkulu lakusebente ngabo.

⁵ Kepha lamanye emakholwa elicembu lebaFarisi asukuma atsi: “Kufanele basoke, batjelwe kutsi bagcine umtsetfo waMosi.”

⁶ Baphostoli nebabonisi bahlangana ndzawonye kumungunya lendzaba.

⁷ Emvakwemphikiswano lendze Phetro wasukuma watsi: “Bazalwane bami, niyati kutsi sekusikhatsi lesidze lesendlulile Nkulunkulu angikhetsa emkhatsini wenu kube ngishumayele liVangeli kubetive, khona batewuva bakholwe.

⁸ Nkulunkulu, lowati tinhlitiyo tebantfu, wakhombisa kuvumela betive ngekubanika Moya Longcwele, njengobe enta nakitsi.

⁹ Akentanga umehluko emkhatsini wetfu nabo; ngekukholwa wabahlanta tinhlitiyo.

¹⁰ Pho, nifunelani kulinga Nkulunkulu ngekubeka lijoko emahlombe emakholwa lokungazange bokhokho nome tsine sibe nemandla ekuletfwala?

¹¹ Cha! Sikholwa kutsi tsine nabo sisindziswa ngalokufananako ngemusa weNkhosi yetfu Jesu.”

¹² Sicumbi sonkhe sasibindzile silalele boBhanabasi naPawula basasilandzisa ngato tonkhe tibonakaliso netimangaliso Nkulunkulu labetente ngabo kubantfu betive.

¹³ Sebacedzile kukhuluma, Jakobe wakhuluma watsi: “Bazalwane, ngilaleleni!

¹⁴ Simoni usandza kuchaza kutsi Nkulunkulu wacala kunakekela betive ngekutitsatsela sive emkhatsini wabo kutsi sibe sakhe.

¹⁵ Loku kuvumelana ncamashi nemavi ebaphrofethi, njengobe imiBhalo itsi:

¹⁶ “ ‘Emvakwaloko ngiyawuncandzeka, ngiyawuvusa indlu yaDavide lewile; ngiyawuvusa tindvonga tayo ngibuye ngitakhe futsi,

¹⁷ kuze labanye bantfu nato tonkhe tive letibitwa ngelibito lami batewufuna iNkhosi, kusho iNkhosi, leyenta loko

¹⁸ kwateke kusukela emandvulweni.’ ”

¹⁹ Jakobe wachubeka watsi: “Kungumcondvo wami kutsi akukafaneli sibatsikamete laba betive labaphendvukela kuNkulunkulu,

²⁰ kuphela nje asibabhalele incwadzi sibatjele kutsi bangakudli kudla lokungcoliswe ngekunikelwa etithicweni, babalekele bugwadla, bangadli lokucumbelene, bangayidli nengati.

²¹ Ngobe nemtsetfo waMosi sewushunyayelwe kuwo onkhe emadolobha wafundziswa sikhatsi lesidze emasinagogeni ngemalanga onkhe emaSabatha.”

Incwadzi leya emakholweni etive

²² Baphostoli nebabonisi, kanye nelibandla lonkhe, bancuma kukhetsa lamanye emadvodza emkhatsini wabo kutsi bawatfumele e-Antiyokhi naboPawula naBhanabasi. Bakhetsa Judasi lokutsiwa nguBhasabasi, naSilasi, lekwakungemadvodza lahloniphekile emkhatsini webazalwane.

²³ Kwatfunyelwa ngabo incwadzi leyayitsi: “Yemukelani nanso incwadzi levela kubaphostoli nebazalwane labababonisi lababingelela bazalwane betive ngekutalwa, labahlala edolobheni lase-Antiyokhi nasetifundzeni taseSiriya naseSilisiya.

²⁴ “Sivile kutsi labanye betfu befike lapho banikhatsata banidzidza tingcondvo ngetimfundziso tabo; noko abakatfunywa ngitsi kutsi bakwente loko.

²⁵ Ngako-ke sibese siyahlangana savumelana sonkhe ngalivi linye lekutsi sitawutfumela kini lamadvodza lesiwakhetsile kanye nebahlobo betfu labatsandzekako boBhanabasi naPawula,

²⁶ labanikele ngetimphilo tabo emsebentini weNkhosi yetfu Jesu Khristu.

²⁷ Ngako-ke sinitfumelele boJudasi naSilasi, labatanitjela bona ngemlomo kona loko lesikubhalile.

²⁸ “Moya Longcwele kanye natsi sivumelene ngekutsi singanetfwesi lomunye umtfwalo ngaphandle kwalemiyalo ledzingekile:

²⁹ Ningakudli kudla lokungcoliswe ngekunikelwa etithicweni, ningayidli ingati, ningadli lokucumbelene; nibalekele bugwadla. Niyawube nente kahle naniyigcinile lemiyalo. Salani kahle.”

³⁰ Titfunywa tahamba taya e-Antiyokhi, lapho tahlangana nabo bonkhe lababengemakholwa, tabanika lencwadzi.

³¹ Lapho bantfu sebayifundzile incwadzi bajatjuliswa ngemavi ekubakhutsata.

³² BoJudasi naSilasi, lababebaphrofethi ngekwabo, bacoca sikhatsi lesidze nebazalwane babacinisa emadvolo ngekubakhutsata.

³³ Bahlala sikhatsi lapho. Bazalwane base bayabakhulula kutsi bancandzeke ngekuthula, babaphatsisa nemikhontiso yabo leyayiya kulabo bazalwane labebabatfumile. [

³⁴ Kodvwa Silasi wakhetsa kuhlala lapho.]

³⁵ BoPawula naBhanabasi bahlala sikhatsi e-Antiyokhi babehlanganyela nalabanyenti, babefundzisa bashumayele livi leNkhosi.

Luhambo lwesibili: BoPawula naBhanabasi bayehlukana

³⁶ Emvakwesikhatsi Pawula watsi kuBhanabasi: “Asibuyele emuva sivakashele bazalwane kuwo onkhe emadolobha lapho sashumayela khona livi leNkhosi, sibone kutsi bachubeka njani.”

³⁷ Bhanabasi wafuna kutsi batsatse Johane Makho ahambe nabo,

³⁸ kepha Pawula akakubonanga kulungile kumtsatsa, ngobe akachubekanga nabo emsebentini wabo wonkhe, kepha abebuyele emuva wabashiya ePhamfiliya.

³⁹ Bacabana kabi ngalendzaba, baze behlukana. Bhanabasi wahamba naMakho ngemkhumbi walibangisa eSiphrosi.

⁴⁰ Kodvwa Pawula wakhetsa Silasi, wahamba naye asanikelwe bazalwane emseni weNkhosi.

⁴¹ Wahamba wadzabula eSiriya naseSilisiya, acinisa emabandla.