Imisebenti yebaPhostoli 14 - Siswati 1996 Bible

E-Ikhoniyumi

¹ Kwabuye kwenteka lokufanako nase-Ikhoniyumi boPawula naBhanabasi bangena esinagogeni lemaJuda bakhuluma ngendlela leyenta kutsi linyenti lemaJuda nemaGriki likholwe.

² Kepha emaJuda labengakholwa afaka lulwimi lolubi kubetive kuze bavukele bazalwane.

³ Baphostoli bahlala lapho sikhatsi lesidze. Bakhuluma ngesibindzi ngeNkhosi, leyafakaza kutsi inshumayelo yabo ngemusa wayo iliciniso, ibanika emandla ekwenta tibonakaliso netimangaliso ngetandla tabo.

⁴ Bantfu belidolobha behlukana ekhatsi, labanye baba ngakumaJuda, labanye baba ngakubaphostoli.

⁵ Kwatsi nakusuka siphitsiphitsi emkhatsini webetive, nemaJuda, nebaholi bawo, bafuna kuhlupha nekugcoba baphostoli ngematje,

⁶ baphostoli nabakuva loko, babalekela eListra naseDebe, emadolobha lamakhulu aseLikhawoniya, naseveni lelakhelene nawo.

⁷ Nakhona lapho bashumayela liVangeli.

EListra naseDebe

⁸ EListra batfolana nendvodza ihleti, beyisishosha kusukela ekutalweni kwayo, yayingazange seyihambe.

⁹ Yalalela emavi aboPawula. Pawula wabona kutsi iyakholwa kutsi ingaphiliswa, ngako-ke wayibukisisa,

¹⁰ wamemeta kakhulu watsi: “Sukuma ume ngetinyawo.” Lendvodza yazuba yema ngetinyawo, yacala kuhamba.

¹¹ Lapho sicumbi sibona lokwentiwe nguPawula, sacala samemeta ngelulwimi lwesiLikhawoniya sitsi: “Bonkulunkulu batsatse simo sebantfu behlela kitsi.”

¹² Betsa Bhanabasi batsi unguZeyusi, naPawula bametsa batsi nguHemesi, ngobe nguye labekhuluma.

¹³ Umphristi waZeyusi labenelithempeli lelalakhiwe ngephandle kwelidolobha, waletsa tinkunzi nemhlobiso wetimbali emasangweni. Yena nesicumbi abefuna kunikela umnikelo kubaphostoli.

¹⁴ Lapho boBhanabasi naPawula beva loko bese batakwenta, badzabula tingubo tabo bagijima bacondza emkhatsini wesicumbi, bamemeta batsi:

¹⁵ “Madvodza, nikwentelani loku? Natsi sibantfu nje, labafanana nani! Site lapha kuniletsela liVangeli, kuze nigucuke nisuke kuletintfo letingenamsebenti niye kuNkulunkulu lophilako, lowenta lizulu, nemhlaba, nelwandle, nako konkhe lokukuko.

¹⁶ Ngesikhatsi lesendlulile watiyekela tonkhe tive tatihambela ngetindlela tato.

¹⁷ Kodvwa akayekelanga kutifakazela ngekwenta imisebenti lemihle: Unehlisela imvula nekudla ngesikhatsi lesifanele; uninika kudla agcwalise tinhlitiyo tenu ngenjabulo.”

¹⁸ Nangawo lawo mavi baphostoli babemisa kalukhuni bantfu kutsi babanikelele iminikelo.

¹⁹ Lamanye emaJuda efika aphuma e-Antiyokhi yasePhisidiya nase-Ikhoniyumi; asasivumisile sicuku, agcoba Pawula ngematje, amhudvulela ngephandle kwelidolobha acabanga kutsi sewufile.

²⁰ Kodvwa ngesikhatsi emakholwa abutsana kuye, wasukuma wabuyela edolobheni. Ngelilanga lelilandzelako yena naBhanabasi bahamba baya eDebe.

Kubuyela kwabo e-Antiyokhi yaseSiriya

²¹ BoPawula naBhanabasi bashumayela liVangeli eDebe, batfola balandzeli labanyenti. Base babuyela emuva eListra, nase-Ikhoniyumi, nase-Antiyokhi lesePhisidiya.

²² Bacinisa emakholwa bawakhutsata ekubambeleleni ekukholweni. Babafundzisa kutsi: “Sifanele sendlule ekuhluphekeni lokunyenti kuze singene embusweni waNkulunkulu.”

²³ Kulelo nalelo bandla babakhetsela babonisi, ngemithandazo nangekuzila babaletsa eNkhosini labayikholwako.

²⁴ Kwatsi sebadzabule esifundzeni sasePhisidiya, befika ePhamfiliya,

²⁵ bashumayela livi ePhega, base behlela e-Athaliya.

²⁶ Nabesuka lapho bantjweza ngemkhumbi babuyela emuva e-Antiyokhi, indzawo lababenikelwe khona umsebenti waNkulunkulu labase bawentile.

²⁷ Lapho sebefike e-Antiyokhi babutsela bantfu belibandla ndzawonye babatjela konkhe Nkulunkulu labekusebentile ngabo, nekutsi nebetive ubavulele indlela yekukholwa.

²⁸ Bahlala lapho nemakholwa sikhatsi lesidze.