Imisebenti yebaPhostoli 12 - Siswati 1996 Bible

Kuhlushwa lokunyenti

¹ Ngalesikhatsi Herodi, inkhosi, wacala kutingela nekuhlupha emalunga elibandla.

² Wabulala Jakobe, umnakaboJohane, ngenkemba.

³ Watsi nakabona kutsi emaJuda ayakujabulela loko lakwentako, wachubekela nasekubopheni Phetro. Loko kwenteka ngesikhatsi seSidlo Sesinkhwa Lesingenambiliso.

⁴ Watsi kube ambambe wamfaka ejele lapho aniketwa etigabeni letine temasotja lamane sigaba sisinye, letatimlindza ngekuntjintjana. Herode abehlose kutsi amletse embikwemaJuda emvakweliPhasika.

⁵ Ngako-ke Phetro walondvolotwa ejele, kodvwa libandla belithandaza limncusela kuNkulunkulu.

Phetro ukhululwa ejele

⁶ Ngebusuku bekugcina Herodi atamkhipha amletse ebantfwini, Phetro abelele emkhatsini webalindzi lababili. Abeboshwe ngetinketane letimbili, kwakunebalindzi lapho emnyango welijele balindzile.

⁷ Masinyane kwefika ingilosi yeNkhosi, kwakhanya ngekhatsi ejele. Lengilosi yanyikinyisa Phetro ngelihlombe, yamvusa yatsi: “Phangisa! Vuka!” Khona lapho tinketane tadzilika etandleni takhe.

⁸ Ingilosi yase itsi kuye: “Tibophe ngelibhande, ufake tincabule takho.” Wakwenta loko Phetro, ingilosi yatsi: “Yembatsa ingubo yakho ungilandzele!”

⁹ Phetro waphuma ejele wayilandzela. Noko akatanga kutsi loku lokwentiwa yingilosi kwenteka ngempela yini; wacabanga kutsi ubona umbono.

¹⁰ Bendlula balindzi bekucala, nebesibili, befika kubekugcina esangweni lensimbi lelivulekela edolobheni, lativulekela. Baphumela ngephandle. Bahamba bengca sitaladi saba sinye, khona lapho ingilosi yamshiya Phetro.

¹¹ Kwangukhona kumkhanyela Phetro kutsi bekwentekani kuye, wase utsi: “Manje sengiyati kutsi kuliciniso kutsi iNkhosi itfumele ingilosi, yangikhulula emandleni aHerodi nakuko konkhe emaJuda abebheke kutsi kutangehlela.”

¹² Watsi nabona loko, wahamba waya ekhaya laMariya, unina waJohane Makho. Bantfu labanyenti bebabutsene lapho bathandaza.

¹³ Phetro wanconcotsa emnyango; Roda, intfombatana leyayisisebenti, weta kutamvulela.

¹⁴ Waliva livi laPhetro wajabula kakhulu, wagijima wabuyela emuva angakawuvuli umnyango. Wefika wabatjela kutsi nguPhetro lome ngephandle.

¹⁵ Batsi kuye: “Uyahlanya!” Kepha wacinisa watsi kuliciniso. Base baphendvula batsi: “Yingilosi yakhe.”

¹⁶ Phetro abeseloku anconcotsa. Batsi bavula umnyango bambona Phetro, bamangala.

¹⁷ Waphakamisa sandla sakhe wababindzisa, wabachazela kutsi iNkhosi imkhulule njani ejele. Watsi kubo: “Nibotjela Jakobe nebazalwane.” Wase uyabashiya uya encenye.

¹⁸ Ekuseni kwesuka lesikhulu sidvumo kubalindzi kutsi ushonephi Phetro.

¹⁹ Herodi watfumela kutsi afunwe, kepha abazange bamtfole. Ngako-ke wabita balindzi wababutisisa, wase utsi ababulawe. Emvakwaloko Herodi wehlela eKhesariya aphuma eJudiya, wahlala sikhatsi khona.

Kufa kwaHerodi

²⁰ Wabatfukutselela kakhulu Herodi bantfu baseThire naseSidoni; ngako-ke baya kanyekanye bayawubonana naye. Kwekucala bavumelana naBlastusi, labengumgcini wesigodlo. Baya kuHerodi bayawucela kuthula, ngobe live labo lalitfola kudla eveni lakhe.

²¹ Ngelilanga lelalikhetsekile Herodi wembatsa tingubo takhe tebukhosi, wahlala esihlalweni sebukhosi, wabeka inkhulumo kubantfu.

²² Bamemeta batsi: “Akusiye umuntfu lona lokhulumako, kepha ngunkulunkulu.”

²³ Khona lapho ingilosi yeNkhosi yashaya Herodi, ngobe abengamniki Nkulunkulu ludvumo. Wadliwa tibungu waze wafa.

²⁴ Livi leNkhosi lachubeka landza.

²⁵ Bhanabasi naSawula bacedza umsebenti wabo babuyela eJerusalema, bahamba kanye naJohane Makho.