Imisebenti yebaPhostoli 10 - Siswati 1996 Bible

Phetro naKhoneliyuse

¹ Kwakukhona indvodza leyayinguKhoneliyuse eKhesariya, beyiyindvuna yelibutfo lemaRoma lelalibitwa ngekutsi: “Libutfo laseTaliyane.”

² Abekholwa, amesaba Nkulunkulu yena nendlu yakhe abesita labanyenti labamphofu bemaJuda, ahlala emkhulekweni ngaso sonkhe sikhatsi.

³ Kwakungeli-awa lesitsatfu entsambama, lapho abona ngalokusebaleni embonweni ingilosi yaNkulunkulu ingena kuye itsi: “Khoneliyuse!”

⁴ Wayibukisisa ngekwesaba lengilosi wase utsi: “Utsini, Nkhosi?” Ingilosi yaphendvula yatsi: “Nkulunkulu uyemukele imithandazo yakho nemisebenti yakho yesihawu, ngako-ke sewukukhumbulile.

⁵ Ngako tfumela emadvodza eJopha ayewubita indvodza lebitwa ngekutsi nguSimoni Phetro,

⁶ isivakashi emtini wemshuki wetikhumba lotsiwa nguSimoni, lohlala ngaselwandle.”

⁷ Lengilosi leyayikhuluma naye yase iyahamba, Khoneliyuse wase ubita tisebenti tasekhaya kakhe letimbili kanye nelisotja, indvodza leyayikholwa, ingulenye yabogadzi bakhe.

⁸ Wabatjela konkhe lokwase kwentekile, wase ubatfumela eJopha.

⁹ Ngakusasa, nase basondzele eJopha, Phetro waya egumeni lelalisetulu eluphahleni lwendlu emini ayewuthandaza.

¹⁰ Walamba, wakhanuka kudla; kusalungiswa kudla watsatseka wabona umbono.

¹¹ Wabona lizulu livulekile kwehla intfo leyayifana nendvwangu lenkhulu kusengatsi ilengiswe ngemakona ayo omane yehliselwa emhlabeni,

¹² ekhatsi kwayo kwakunetinhlobo tonkhe tetilwane temhlaba, letihamba ngetinyawo letine, naletihamba ngesisu, netinyoni temoya.

¹³ Kwevakala livi litsi kuye: “Sukuma, Phetro; hlaba udle!”

¹⁴ Kodvwa Phetro watsi: “Ngeke, Nkhosi! Angizange sengiyidle intfo leyatiwa ngekutsi ingcolile.”

¹⁵ Livi lakhuluma kuye futsi latsi: “Ungasho kutsi kungcolile loko lokuhlantwe nguNkulunkulu.”

¹⁶ Loku kwenteka katsatfu; kwase kuyatsatfwa kubuyela ezulwini.

¹⁷ Phetro kwammangalisa kutsi usho kutsini lombono lawubonile. Ngaso leso sikhatsi lamadvodza labetfunywe nguKhoneliyuse abesawutfolile lomuti waSimoni aseme emnyango.

¹⁸ Sebakhulekile babuta batsi: “Asikho yini sivakashi lapha lesibitwa ngekutsi nguSimoni Phetro?”

¹⁹ Phetro asacabangisisa inchazelo yalombono, Moya Longcwele watsi kuye: “Lalela! Emadvodza lamatsatfu ayakufuna.

²⁰ Ngako sukuma wehle uhambe nawo ungangabati, ngobe atfunywe ngimi.”

²¹ Ngako Phetro wehla waya kulamadvodza wafike watsi: “Ngimi lona lenimfunako. Ningifunelani?”

²² Baphendvula batsi: “Khoneliyuse, indvuna yelibutfo, usitfumile. Uyindvodza lelungile naleyesaba Nkulunkulu, futsi uhlonishwa ngiso sonkhe sive semaJuda. Watjelwa yingilosi lengcwele kutsi akumeme ute emtini wakhe, kuze atewuva emavi akho.”

²³ Phetro wabacela labantfu kutsi sale balala, ngobe lase lishonile. Ngakusasa watilungiselela kuhamba nabo; labanye bazalwane baseJopha bamphekeletela.

²⁴ Ngakusasa befika eKhesariya, lapho abelindzelwe nguKhoneliyuse khona, kanye netihlobo nebangani bakhe labakhulu labebamemile.

²⁵ Nasatawungena nje ekhaya Phetro, Khoneliyuse waphuma wamhlangabeta, waguca ngemadvolo wakhotsama embikwakhe.

²⁶ Kodvwa Phetro wamsukumisa. Watsi kuye: “Sukuma, nami ngingumuntfu nje.”

²⁷ Phetro wachubeka wakhulumisa Khoneliyuse basangena endlini, lapho akhandza bantfu labanyenti bahlangene.

²⁸ Watsi kubo: “Nani matfupha niyati kutsi umJuda akavunyelwa yinkholo yakhe kutsi avakashele nome atihlanganise nebetive. Kodvwa Nkulunkulu ungikhombisile kutsi angifanele kusho kutsi umuntfu ungcolile nome akahlanteki.

²⁹ Ngako-ke njengobe utfumele kimi, ngivele ngeta ngaphandle kwekungatsita. Sengiyabuta-ke, manje, ungibiteleni?”

³⁰ Khoneliyuse waphendvula watsi: “Kwakucishe kube ngito letikhatsi kutsanti kwayitolo ngesikhatsi ngithandaza endlini yami ngeli-awa lesitsatfu ntsambama ngabona indvodza yembetse tingubo letikhatimulako ime embikwami

³¹ itsi: ‘Khoneliyuse, Nkulunkulu uwuvile umthandazo wakho, uyikhumbulile imisebenti yakho yesihawu.

³² Tfumela umuntfu eJopha ayewubita indvodza lebitwa ngekutsi nguSimoni Phetro, usivakashi emtini waSimoni, umshuki wetikhumba, lohlala ngaselwandle.’

³³ Nganonopha ngatfumela kuwe, wavele wavuma ngenhlitiyo lemhlophe kuta njengobe sewulapha nje. Nanyalo sesihlangene sonkhe embikwaNkulunkulu, simele kuva loko iNkhosi lekutfume kona.”

Inkhulumo yaPhetro

³⁴ Wacala wakhuluma Phetro watsi: “Nembala sengibonile kutsi Nkulunkulu akakhetsi libala lemuntfu,

³⁵ kodvwa lowo lomesabako ente lokulungile uyemukeleka kuye, nome angewasiphi sive.

³⁶ Niyalati livi lalitfumela kubantfu baka-Israyeli, ashumayela liVangeli lekuthula ngaJesu Khristu, loyiNkhosi yabo bonkhe bantfu.

³⁷ Niyayati nalendzaba lenkhulu leyenteka eJudiya lonkhe, kusukela eGalile, ngemuva kwembhabhatiso lowawuyinshumayelo yaJohane.

³⁸ Niyati futsi ngaJesu waseNazaretha, kutsi Nkulunkulu wamgcoba kanjani ngaMoya Longcwele nangemandla nekutsi waya kuyo yonkhe indzawo enta lokuhle aphilisa bonkhe lababecindzetelwe ngemandla aSathane, ngobe Nkulunkulu abenaye.

³⁹ “Tsine sibofakazi bako konkhe loko labekwenta eveni lemaJuda kanye naseJerusalema. Bambulala ngekumbetsela esiphambanweni.

⁴⁰ Kodvwa Nkulunkulu wamvusa ekufeni ngelilanga lesitsatfu, wambonakalisa;

⁴¹ noko akabonwanga ngabo bonkhe bantfu, kodvwa ngitsi kuphela lesibofakazi, tsine lesasivele sikhetfwe nguNkulunkulu. Sadla sanatsa naye ngemuva kwekuvuswa kwakhe nguNkulunkulu ekufeni.

⁴² Wasitfuma kutsi sishumayele kubantfu, sifakaze nekutsi nguye lokhetfwe nguNkulunkulu kutsi abe nguMehluleli walabaphilako nalabafile.

⁴³ Bonkhe baphrofethi bafakaza ngaye, batsi wonkhe umuntfu lokholwa nguye uyawutsetselelwa tono ngelibito lakhe.”

Betive bemukela Moya Longcwele

⁴⁴ Asakhuluma Phetro, Moya Longcwele wehlela kubo bonkhe labaliva lelivi.

⁴⁵ Emakholwa emaJuda labephuma eJopha kanye naPhetro amangala kutsi Nkulunkulu utfululele sipho sakhe lesinguMoya Longcwele, ngisho nakubetive imbala;

⁴⁶ ngobe babeva sebakhuluma ngetilimi badvumisa bukhulu baNkulunkulu. Khona Phetro wakhuluma watsi:

⁴⁷ “Labantfu sebemukele Moya Longcwele, njengobe natsi samemukela. Kepha ukhona yini longahle abavimbele kutsi babhajatiswe ngemanti?”

⁴⁸ Ngako wabatjela kutsi kufanele babhajatiswe egameni laJesu Khristu. Base bayamcela kutsi ahlale nabo emalangana.