Hoseya 3 - Siswati 1996 Bible

Kubuyisana kwaHoseya nemkakhe

¹ Simakadze wakhuluma kimi watsi: “Hamba, uphindze umtsandze umkakho, lite nome asatsandvwe ngulomunye futsi, ayingwadla. Mtsandze wena njengobe Simakadze atsandza ema-Israyeli, kwala nome sebagucukele kulabanye bonkulunkulu, batsandza emacebelengwane emagelebisi lomisiwe.”

² Ngako ngamtsenga ngesiliva lengemagremu lali-170 nangemakhilogremu langaba likhulu ebhali.

³ Ngase ngiyamtjela lomkami, ngatsi: “Wena kufanele uhlale nami emalanga lamanyenti; akukafaneli lokutsi ube yingwadla nome wetayelane nalenye indvodza, nami ngitawuhlala nawe.”

⁴ Ngako ema-Israyeli asetawuhlala emalanga lamanyenti angenambusi, angenankhosi, angenamhlatjelo nome ematje langcwele, angenasidziya sebaphristi nome sithico.

⁵ Emvakwaloko ema-Israyeli ayawuphendvuka afune Simakadze, Nkulunkulu wawo, naDavide, inkhosi yawo. Bayawubuyela batitfobe kuSimakadze nakuto tibusiso taSimakadze ngemalanga ekugcina.