Hezekeli 47 - Siswati 1996 Bible

Umtfombo logeleta usuka ethempelini

¹ Lendvodza yangibuyisela ekungeneni kwelithempeli. Kwakunesiyalu semanti lesasicubuka phansi emnyango, emanti aso agelete abheke ngasemphumalanga, lapho kwakubuke khona umnyango welithempeli. Abegeleta ehla esuka ngaseningizimu kwelithempeli endlule ngaseningizimu kwelilati.

² Lendvodza yase ingikhiphela ngephandle kwendzawo yelithempeli ngendlela yelisango langasenyakatfo, yangigegisa, saze sefika esangweni langephandle lelibheke emphumalanga. Nalapho kwakunemfudlana wemanti lowawumpompota, usuka ngaseningizimu kwelisango.

³ Ngalendvuku yayo yekukala lendvodza yase ikala emamitha labengaba ngema-500 kwehla nalomfudlana, abheka ngasemphumalanga, yase ingitjela kutsi angiklabhute kulomfula khona lapho. Emanti akhuphuka efika emacakaleni.

⁴ Yaphindza yakala lamanye emamitha labengaba ngema-500 emanti akhuphukela emadvolweni. Yakala lamanye futsi emamitha labengaba ngema-500 kwewuka, emanti efika elukhalo.

⁵ Yabuye yakala lamanye futsi emamitha labengaba ngema-500, lapho-ke umfula wase ushona kakhulu, kangangekutsi ngangingasakhoni kuklubhuta ngetinyawo. Kwase kushona kakhulu kumatima kwewela ngaphandle kwekuhlamba.

⁶ Yangibuta yatsi: “Ndvodzana yemuntfu, uyakubona-ke loku?” Yase iyangihola njalo yangibuyisela elusentseni lwemfula.

⁷ Ngatsi nangifika lapho, ngabona lihlatsi ngala nangale kwemfula.

⁸ Yatsi kimi: “Lamanti lawa ageletela ngaseveni langasemphumalanga, ehle aze ayewufika eSigodzini saseJordane i-Arabha, lapho afike angene khona elwandle, emanti-ke lapho afike abe mnandzi.

⁹ Emabulo etintfo letiphilako naletinwabutelako kuyawuphila nome ngukuphi lapho ayawugeletela khona. Kuyawuphetfuka incumbi yetinhlanti lapho, ngobe lamanti ageletela khona ente lamanti lamunyu abe mnandzi; ngako lapho lamanti ageletela khona, konkhe kuyawuphila.

¹⁰ Badwebi betinhlanti bayawukuma lugele lapha elusentseni; kusukela e-Eni Gedi kuye e-Eni Eglayimu kuyawuba netindzawo tekwendlala emanetha. Letinhlanti kuyawuba tinhlobonhlobo, letingangetetinhlanti taseLwandle Lolukhulu tibe tinyenti.

¹¹ Kodvwa emachaphoti nematete akayiwuhluma abe luhlata abe mahle, ayawusala aluswayi.

¹² Kuyawukhula tinhlobonhlobo tetihlahla tetitselo ngala nangale elusentseni lwemfula. Emacembe ato akasoze abune, netitselo tato tingeke tiphele. Tiyawutsela ngato tonkhe tinyanga, ngobe emanti lasuka ethempelini ageletela kuto. Titselo tato tiyawuba tekudla, bese kutsi emacembe ato abe ngewekuphilisa.”

Iminyele yelive

¹³ Naku lokushiwo yiNkhosi Simakadze, itsi: “Lena-ke ngiminyele leniyakwehlukanisa ngayo live lekulifa letive letili-12 tema-Israyeli, sive sakaJosefa sona sibe netabelo letimbili.

¹⁴ Kufanele nehlukaniselane ngalokulinganako emkhatsini wato. Ngobe mine ngafunga ngekuphakamisa sandla kutsi ngiyawulinika boyihlomkhulu, lelive leli liyawuba lifa lenu.

¹⁵ “Lona-ke kuyawuba ngumnyele welive: “Ngasenyakatfo uyawusuka eLwandle Lolukhulu, ujube ngemgwaco waseHethiloni, wendlule eLebo Hamathi uyewushona eSedadi,

¹⁶ naseBerotha, naseSibrayimu lesemkhatsini weminyele yelive laseDamaseko neyalaseHamathi, udzimate uyewufika eHaseri Hathikhoni, lesemnyeleni waseHawurani.

¹⁷ Lomnyele uyawuchubeka kusukela elwandle kuya eHasari Enani, ugudle umnyele welaseDamaseko kanye nemnyele welaseHamathi longasenyakatfo. Lowo-ke kuyawuba ngumnyele wasenyakatfo.

¹⁸ “Ngasemphumalanga umnyele uyawudzabula emkhatsini weHawurani neDamaseko, ugudle iJordani, emkhatsini weGileyadi nelive laka-Israyeli, ucondze elwandle lwasemphumalanga, uze uyewufika eThamari. Lowo-ke kuyawuba ngumnyele wangasemphumalanga.

¹⁹ “Ngaseningizimu uyawusuka eThamari ubange ngasemantini aseMeribha Khadeshi, ugudle uMfudlana waseGibhithe, ucondze eLwandle Lolukhulu. Lowo-ke kuyawuba ngumnyele wangaseningizimu.

²⁰ “Ngasenshonalanga umnyele kuyawuba Lwandle Lolukhulu kuze kube ngulapho kubukene khona neLebo Hamathi. Lowo-ke kuyawuba ngumnyele wangasenshonalanga.

²¹ “Lelive niyakulehlukaniselana emkhatsini wenu ngekwetive taka-Israyeli.

²² Kufanele nilabe ngenkatho njengelifa lenu nalabo lababetive labahlala emkhatsini wenu, lasebatele nebantfwana. Niyakubatsatsa njengemisinsi yekutimilela yema-Israyeli. Nabo njengani kufanele babelwe lifa emkhatsini wetive tema-Israyeli.

²³ Nome ngukusiphi sive lapho lona wetive ahleti khona, kufanele nimabele khona lapho naye sabelo selifa,” kusho iNkhosi Simakadze.