Hezekeli 45 - Siswati 1996 Bible

Kwabiwa kwelive

¹ “ ‘Nase kwabiwa live ngenkatho kunikwa leso naleso sive lifa laso, lesinye sabelo sibohlukaniselwa Simakadze. Kufanele sibe ngemakhilomitha langaba li-12 nesigamu budze, nemakhilomitha langaba sihlanu bubanti. Yonkhe-ke leyo ndzawo iyawuba ngcwele.

² Kulesabelo kufanele kube nendzawo lesikwele, lendzawana yelithempeli ibe ngemamitha langaba ngema-250 luhlangotsi lulunye, kufanele kube nelibala leliyitungeletile, nalo libe ngemamitha langaba ngema-25 bubanti.

³ Kulendzawo incenye yayo lengemakhilomitha langaba li-12 nesigamu budze, inebubanti lobungemakhilomitha langaba sihlanu, kufanele ikalwe kahle, ngobe itawuba yelithempeli, indzawo lengcwelengcwele.

⁴ Kuyawuba yindzawana lengcwele eveni, leyehlukaniselwe baphristi labasondzela kuSimakadze bakhonte ethempelini lakhe. Iyakuba yindzawo yetindlu tabo, ibe nendzawo yelithempeli.

⁵ Indzawo lesele lengemakhilomitha langaba li-12 nesigamu budze, nebubanti lobungemakhilomitha langaba sihlanu, kufanele ibe sabelo semaLevi languwona enta inkonzo ethempelini. Kuyawuba nemadolobha lapho batawuhlala khona.

⁶ “ ‘Lapho eceleni kwalendzawo lengcwele kufanele kube nalenye indzawo lengemakhilomitha langaba li-12 nesigamu budze, nemakhilomitha langaba mabili nesigamu bubanti, ibekelwe kwakhiwa kwelidolobha, lapho kuyawuhlala nome ngubani waka-Israyeli.’ ”

Live lembusi

⁷ “ ‘Kufanele kube nelive futsi lelehlukaniselwa umbusi lobusako. Kusukela emnyeleni longasenshonalanga wendzawo lengcwele liyawuchubekela elwandle iMedithera; kusuka ngasemnyeleni wasemphumalanga liyawuchubekela ngasemphumalanga yelive, kuze kutsi budze balo bulingane nebudze balenye yetindzawo letabelwe tive taka-Israyeli.

⁸ Lendzawo iyawuba sabelo sembusi lobusako eveni laka-Israyeli, kuze angasayiwuphindza acindzetele bantfu bami, kodvwa uyawuvumela lonkhe leli lelinye live libe letive tema-Israyeli.’ ”

Imitsetfo lecondzene nembusi

⁹ “ ‘Naku lokushiwo yiNkhosi Simakadze, itsi: Senone kakhulu, nine babusi baka-Israyeli. Khawulani lobudlova benu bekucindzetela bantfu. Yentani lokulungile nalokwemukelekako kuNkulunkulu kutsi kulungile. Ningaphindzi nicoshe bantfu bami eveni labo, kusho iNkhosi Simakadze.

¹⁰ “ ‘Kufanele nisebentise tisindvo netikali letetsembekile letisemtsetfweni, kube: yi-efa lengiyo nebhathi lengiyo.

¹¹ “ ‘I-efa yekukala lokomile kufanele ilingane nebhathi yalokumanti. Lizingasikali yihomeri. Lokuphumako lapha kutsi: “ ‘Ihomeri ilingane nema-efa lalishumi, kulingane nemabhathi lalishumi.

¹² Tisindvo tenu tifanele tibe kanje: emagera langema-20 alingane nelishekheli, emashekheli langema-60 alingane nemina.’ ”

Iminikelo nemalanga langcwele

¹³ “ ‘Lena nguyona ndlela leniyawukala ngayo iminikelo yenu yelikhetselo: “ ‘Kolo: Niyawutsatsa kunye kwema-60 kwesivuno senu, ibhali: kunye kwema-60 kwesivuno senu,

¹⁴ emafutsa emncumo: kunye kwelikhulu kwetitselo tetihlahla tenu; nikukale ngebhathi; ngobe emabhathi lalishumi alingana nehomeri, ihomeri yinye ilingene nekhori yinye.

¹⁵ Timvu: Imvu yinye itsatfwe kuwo umhlambi wema-200 tasemadlelweni lanemanti aka-Israyeli. Kufanele niletse iminikelo yalokutinhlavu, netilwane letitawushiswa samuku, netilwane temnikelo webudlelwane, kuze kutewuhlawulela tono tenu. Mine iNkhosi Simakadze sengikhulumile.

¹⁶ “ ‘Bonkhe bantfu bakulelive kufanele bayitsatse leminikelo bayimikise kumbusi lobusako ka-Israyeli.

¹⁷ Kuyawuba ngumsebenti wakhe kutsi aletse tilwane letitawushiswa samuku, neminikelo yalokutinhlavu, neminikelo yesinatfo saso sonkhe sive saka-Israyeli ngemikhosi yekwetfwasa kwenyanga, nangemaSabatha, nangaleminye imikhosi. Kufanele aletse iminikelo yesoni, neminikelo yalokutinhlavu, neminikelo yekushiswa, neminikelo yebudlelwane, kuze atewuhlawulela tono tesive saka-Israyeli.’ ”

Imikhosi

¹⁸ “ ‘Naku lokushiwo yiNkhosi Simakadze, itsi: Ngenyanga yekucala elangeni lekucala kufanele nitsatse inkunzana leseyincane, lengenasiyela, nihlambulule lithempeli.

¹⁹ Umphristi uyawutsatsa incenye yengati yemnikelo wesono, ayibhoce etinsikeni temnyango wasethempelini, nasemakoneni omane emngcengcemeni longetulu elatini, nasetinsikeni temasango laphumela esibuyeni lesingekhatsi.

²⁰ Ngelilanga lesikhombisa lenyanga uyakwenta njalo futsi, entele nome ngubani lowone ngesiphosiso, nome one ngekungati. Ngaleyo ndlela-ke niyawulihlawulela lithempeli.

²¹ “ ‘ Ngelilanga leli-14 lenyanga yekucala niyawugubha uMkhosi weliPhasika. Kuyawuphela emalanga lasikhombisa bonkhe bantfu badla sinkhwa lesingenamvubelo.

²² Ngelilanga lekucala lemkhosi, umbusi lobusako kufanele anikele ngenkunzi, kube ngumhlatjelo wetono takhe netabo bonkhe bantfu.

²³ Onkhe-ke lawo malanga lasikhombisa lombusi kufanele anikele kuSimakadze tinkunzi letisikhombisa, netihanca letisikhombisa, letingenasiyela, akushise samuku. Kufanele futsi ente umhlatjelo wesiphongo onkhe emalanga kube ngumnikelo wesono.

²⁴ Inkunzi iyinye nesihhanca sinye lesentiwe umhlatjelo, kufanele selekelwe ngemnikelo walokutinhlavu longemalitha langaba li-17 nencenye, nangemafutsa emncumo langemalitha langaba mane.

²⁵ “ ‘NgeMkhosi Wemadlangala locala ngelilanga leli-15 enyangeni yesikhombisa, umbusi uyawunikela onkhe emalanga umnikelo lofananako wesonok, kuze kuphele lamalanga lasikhombisa, anikele nangemnikelo lofananako wekushiswa samuku, nemnikelo lofananako walokutinhlavu kanye nemafutsa emncumo.’ ”