Hezekeli 43 - Siswati 1996 Bible

Simakadze ubuyela ethempelini

¹ Lendvodza yangitsatsa yangimikisa esangweni lelibheke ngasemphumalanga,

² lapho ngabona khona inkhatimulo yebukhona baNkulunkulu wema-Israyeli ichamuka ngasemphumalanga. Livi lakhe lalifanana nekudvuma kwemabhudlo emanti, live lalicwebetela ngenca yenkhatimulo yakhe.

³ Lombono lengawubona wawufanana nembono lengangiwubone, nakefika kutewubhubhisa lidolobha, uphindze ufanane nemibono lengangiyibone eceleni kwemfula iKhebari, ngawa ngibhekise buso phansi.

⁴ Inkhatimulo yaSimakadze yangena ethempelini ngelisango lelibheke ngasemphumalanga.

⁵ Moya wase uyangiphakamisa wangingenisa esibuyeni sangekhatsi, inkhatimulo yaSimakadze yagcwalisa lithempeli.

⁶ Yatsi lendvodza iseme eceleni kwami, ngeva lomunye akhuluma kimi ngekhatsi ethempelini.

⁷ Wakhuluma kimi, watsi: “Ndvodzana yemuntfu, lena yindzawo yesihlalo sami sebukhosi nendzawo yekwenabela tinyawo tami. Ngulapha-ke lapho ngitawuhlala khona emkhatsini wema-Israyeli kuze kube phakadze. Indlu yaka-Israyeli ingeke iphindze ilihlambalate Libito lami lelingcwele, yona kanye nemakhosi ayo, ngebugwadla bayo nangetithico letingaphili temakhosi ayo etindzaweni tayo letiphakeme.

⁸ Nababeka umnyango wabo eceleni kwemnyango wendlu yami, netinsika tabo temnyango eceleni kwetinsika tami temnyango, kunelubondza kuphela emkhatsini wami nabo, balihlambalata Libito lami lelingcwele ngetintfo tabo letinengekako labatentako. Ngako ngase ngiyababhubhisa ngentfukutselo yami.

⁹ Manje-ke ababususe kimi lobugwadla babo naletithico letingaphili temakhosi abo, ngiyawube sengihlala emkhatsini wabo phakadze naphakadze.

¹⁰ “Ndvodzana yemuntfu, chaza lithempeli esiveni saka-Israyeli, kuze batewuba nemahloni ngetono tabo. Bente balicabangisise lelipulani.

¹¹ Nangabe banemahloni ngako konkhe labakwentile, bachazele ngelipulani lelithempeli, nekuhleleka kwalo, iminyango yalo yekuphuma neyekungena, lonkhe lipulani lalo, nayo yonkhe imiyalo nemitsetfo yalo. Kubhale phansi loku embikwabo, khona batekwetsembeka kulelipulani lalo, balandzele nemitsetfo yalo.

¹² “Lona ngumtsetfo welithempeli: Yonkhe lendzawo lelitungeletile esicongweni sentsaba iyakuba ngcwelengcwele. Unjalo-ke umtsetfo welithempeli.”

Lilati

¹³ “Leti-ke tilinganiso telilati, nase usebentisa indvuku yekukala lefanana naleyo yekukala lithempeli: Kutungeleta sonkhe sisekelo selilati bekunemsedlana lewawungemasentimitha labengaba ngema-50 kushona, nemasentimitha labengaba ngema-50 bubanti, bese kutsi lapha emaceleni emngcengcemeni ube ngemasentimitha labengaba ngema-25 kuphakama.

¹⁴ Kusuka kulomsedlana phansi kuye etulu bekungaba limitha linye bese kutsi bubanti bube sigamu selimitha. Lencenye lelandzelako yayentiwe yaba ngemasentimitha labengaba ngema-50 bubanti, bese kuba ngemamitha labengaba mabili kuphakama. Lencenye lelandzela leyo nayo yayihleleke kusukela emngcengcemeni wayo kwaba ngemasentimitha labengaba ngema-50 kutungeleta.

¹⁵ Lendzawo lengetulu, lapho kwakushiselwa khona imihlatjelo, bekungemamitha labengaba mabili kuphakama. Timphondvo talo temakona lamane tatiphakeme kunalesibebesi salo.

¹⁶ Lingetulu lelilati lalisikwele lesingemamitha labengaba sitfupha yonkhe indzawo.

¹⁷ Likhatsinendzawo lalo nalo lalisikwele, lingemamitha labengaba sikhombisa, yonkhe indzawo lalinemngcengcema lolitungeleta ngephandle ungemasentimitha labengaba ngema-25 kuphakama. Lomsedlana wawungemasentimitha labengaba ngema-50 bubanti. Titebhisi letatenyukela etulu kulelilati tatingasemhlubulweni wangasemphumalanga.”

Kunikelwa kwelilati

¹⁸ Wabe sewukhuluma kimi, utsi: “Ndvodzana yemuntfu, naku lokushiwo yiNkhosi Simakadze, itsi: Lena kutawuba ngimitsetfo yeminikelo yemhlatjelo yekushiswa neyekunyenyeta ingati etikwelilati, nase lakhiwe:

¹⁹ Kufanele unikele ngenkunzana kutsi ibe ngumnikelo wesono kubaphristi, labangemaLevi, bendlu yakaSadoki, labasondzelako kutewukhonta embikwami, kusho iNkhosi Simakadze.

²⁰ Kufanele utsatse lenye yengati yayo uyibeke kuletimphondvo letine telilati, nasemakoneni omane emngcengcema longetulu, nakuwo wonkhe lomngcengcema, khona utewuhlambulula lilati ulentele inhlawulo.

²¹ Wena kufanele utsatse lenkunzana ibe ngumnikelo wesono, uyishisele lapho imiselwe kushiselwa khona, lekuyindzawo yelithempeli lengephandle kwendzawo lengcwele.

²² “Ngelilanga lesibili kufanele unikele ngesiphongo lesingenasiyela kube ngumnikelo wesono, nelilati kufanele lihlanjululwe, njengobe lalihlanjululwe ngenkunzi.

²³ Utawutsi ungacedza kulihlambulula, uyawube sewunikela ngenkunzana kanye nangesihhanca lesiphuma emhlambini, kokubili kungabi nasiyela.

²⁴ Kufanele konkhe ukunikele embikwaSimakadze, baphristi kufanele banyenyete ngeluswayi etikwako, bakunikele kube ngumhlatjelo wekushiswa kuSimakadze.

²⁵ “Kuwo onkhe lamalanga lasikhombisa kufanele unikele ngesiphongo kube ngumnikelo wesono, kufanele futsi kube nenkunzana nesihhanca lesiphuma emhlambini, kokubili kungabi nasiyela.

²⁶ Kuwo onkhe lamalanga lasikhombisa kufanele bente inhlawulo yelilati, balihlambulule.

²⁷ Ekupheleni kwalamalanga, kusukela elangeni lesiphohlongo kuya embili, baphristi kufanele betfule iminikelo yenu yekushiswa kanye neminikelo yenu yekuthula etikwelilati. Ngiyawube sengiyanemukela-ke, kusho iNkhosi Simakadze.”