Hezekeli 4 - Siswati 1996 Bible

Hezekeli ufanekisa kuvinjetelwa kweJerusalema

¹ “Manje-ke, ndvodzana yemuntfu, tsatsa sibhelekeca selibumba, usibeke embikwakho, bese udvweba lidolobha laseJerusalema kuso.

² Ubobe sewenta siboniso sekuvinjetelwa kwalo: Yakha tindvonga tekuvimbetela, wakhe lutsango lwekulivimbetela, umise tinkambu eceleni kwalo, bese ufaka imigcala yekulibhidlita ilitungelete,

³ ubobe sewutsatsa lipani lensimbi ulibeke libe njengelubondza lwensimbi emkhatsini wakho nalelidolobha, bese uyagucuka uyalibuka. Liyawube selivimbetelekile, futsi uyawulivimbetela. Loku kuyawuba sibonakaliso kuyo indlu yaka-Israyeli.

⁴ “Ubobe sewulala ngemhlubulo wakho wangesancele, ubeke sono sendlu yaka-Israyeli etikwakho. Kufanele usetfwale lesono sabo emalanga langangalawo ekulala kwakho ngalowo mhlubulo.

⁵ Ngikumisele emalanga langangeminyaka yekona kwabo. Ngako kutawuphela emalanga langema-390 wetfwele sono sendlu yaka-Israyeli.

⁶ “Utawutsi ungakucedza loku, uphindze ulale phansi futsi, ngemhlubulo wakho wangesekudla, wetfwale sono sendlu yakaJuda. Ngikumisele emalanga langema-40, lilanga lilinye limele umnyaka munye.

⁷ Gucula buso bakho ububhekise ngasekuvinjetelweni kweJerusalema, nangemkhono lohlutjuliwe phrofetha umelane nabo.

⁸ Wena ngitakubopha ngetindophi, kuze ungetiwukhona kugucuka kulomhlubulo uye kulomunye, uze ucedze lawo malanga ekuvimbetela kwakho.

⁹ “Tsatsa kolo nebhali, emabhontjisi netinhlumaya, nemabele nesipileti, ukufake esitjeni sekuphatsa, bese utentela sinkhwa. Kufanele udle sona kulamalanga langema-390 lotawulala ngawo ngemhlubulo wakho.

¹⁰ Kala kudla lokungemagremu langema-230 lekufanele ukudle njalo nje ngelilanga, ukudle ngetikhatsi letimisiwe.

¹¹ Ubophindze futsi ukale tinkomishi letimbili letinkhulu temanti lekufanele uwanatse ngetikhatsi letimisiwe.

¹² Lokudla ubokudla njenganawudla licebelengwane lebhali; ubokupheka embikwebantfu babuka, lomlilo uwubase ngemigodvo yebantfu leyomile.”

¹³ Simakadze watsi: “Ngalendlela bantfu baka-Israyeli bayakudla kudla lokungcolile emkhatsini wetive, lapho ngiyawubacoshela khona.”

¹⁴ Mine ngaphendvula ngatsi: “Cha, Nkhosi Simakadze! Mine angizange sengitingcolise. Kusukela kwasebusheni bami kuze kube ngunyalo angizange sengiyidle ingcuba nome inyama yesilwane lesibulewe tilwane tesiganga. Akuzange sekungene nyama lengcolile ngekwemtsetfo kulomlomo wami.”

¹⁵ Wakhuluma watsi: “Kulungile. Ngitakuvumela kutsi usebentise emalongo etinkhomo esikhundleni sewemuntfu ekuphekeni lesinkhwa sakho.”

¹⁶ Wachubeka watsi kimi: “Ndvodzana yemuntfu, ngitawunciphisa kutfolakala kwekudla lapha eJerusalema. Bantfu bayawudla kudla kwekwemukeliswa bancenekile, banatse nemanti ekwemukeliswa bakhatsatekile,

¹⁷ ngobe kudla nemanti kuyawube kweswelekile. Bayawumangala nababonana, bayawukondza babe tingodvo ngenca yesono sabo.”