Hezekeli 31 - Siswati 1996 Bible

IGibhithe ilinganiswa nemsedari

¹ Ngemnyaka weli-11, enyangeni yesitsatfu, ngelilanga lekucala, livi laSimakadze lefika kimi, latsi:

² “Ndvodzana yemuntfu, khuluma kuFaro, inkhosi yaseGibhithe, nakuletihlwele takhe temabutfo, utsi: “ ‘Ngubani nje longalinganiswa nawe ngekuhlonipheka?

³ Cabanga nge-Asiriya, leyake yaba ngumsedari waseLebanoni, lewawunemagala lamahle wengamele lihlatsi; waphakamela etulu kakhulu, sihloko sawo sasingetulu kwemacembe lahlangene.

⁴ Emanti awunisela, tiyalu letijulile tawukhulisa, waba mudze; imifudlana yato yayigeleta ngala nangala kwawo, emanti ageleta ngemisele yawo ayawunisela tonkhe tihlahla tesiganga.

⁵ Ngako wakhula waya etulu, wengca tonkhe tihlahla tesiganga; emagala awo lamakhulu andza, yebo, emagala akhula aba madze, enaba ngenca yekutfola emanti lamanyenti.

⁶ Tonkhe tinyoni tasemoyeni takhela tidleke tato emagaleni awo lamakhulu, netilwane tonkhe tesiganga tatalela ngaphansi kwemagala awo; tive tonkhe letikhulu tahlala ngaphansi kwemtfunti wawo.

⁷ Bewuhlonipheka ngebuhle bawo, nemagala awo lamakhulu lenebe, ngobe timphandze tawo tatishone phansi, taya lapho kunemanti lamanyenti khona.

⁸ Imisedari leyayisengadzeni yaNkulunkulu ayizange ikhone kulinganiswa nawo, ngisho netihlahla tetipheshula tatingeke tilingane nemagala awo lamakhulu, ngisho netihlahla tepleni tatingeke tilinganiswe nemagala awo, kute sihlahla engadzeni yaNkulunkulu lebesingalinganiswa nebuhle bawo.

⁹ Ngawenta waba muhle ngemagala lamanyenti, wahawukelwa ngito tonkhe tihlahla tase-Edeni ensimini yaNkulunkulu.

¹⁰ “ ‘Ngako-ke naku lokushiwo yiNkhosi Simakadze, itsi: Njengobe wawuphakeme, wengamele onkhe emacembe lahlangene, nanjengobe bewutigcabha ngalobudze bawo,

¹¹ ngawuniketela etandleni tembusi wetive, kuze kutsi yena atewuphatsa ngaleyo ndlela yebubi bawo. Ngawukhweshisela eceleni,

¹² kwase kutsi tive tangaphandle letinelunya kakhulu tawujuba, tase tiyawushiya. Emagala awo lamakhulu awela etintsabeni nasetigodzini tonkhe; emagala awo asala phansi ephukile kuto tonkhe tihosha telive. Tonkhe tive temhlaba taphuma ngaphansi kwemtfunti wawo, tawushiya.

¹³ Tonkhe tinyoni tasemoyeni tahlala etikwalesihlahla lesiwile, nato tonkhe tilwane tesiganga tabasemkhatsini walamagala awo.

¹⁴ Ngako-ke kute letinye tihlahla letingasemantini letiyawuphakama tiye etulu ngekutigcabha, tiphakamisele tihloko tato tengamele emacembe lahlangene. Kute letinye tihlahla letiniselwa kahle letiyawuke tikhule tibe tidze ngangaleso sihlahla; tonkhe timiselwe kufa, tiye ngaphansi kwemhlaba, emkhatsini webantfu lababhubhako, kanye nalabo labehlela emgodzini.

¹⁵ “ ‘Naku lokushiwo yiNkhosi Simakadze, itsi: Ngalelo langa lomsedari lowehliselwa ngalo ethuneni ngambonya tiyalu letingaphansi kwemhlaba ngekuwulilela; ngavimbela imifudlana yato, kwatsi lamanti ato lamanyenti ema, angete ageleta. Ngenca yawo iLebanoni ngayembatsisa lusizi, kwatsi tonkhe tihlahla tesiganga tabuna.

¹⁶ Tive ngatitfutfumelisa ngemsindvo wekuwa kwawo ngesikhatsi ngiwehlisela ethuneni kanye nalabo labehlela emgodzini. Ngako tonkhe tihlahla tase-Edeni, telikhetselo naletinhle kakhulu taseLebanoni, tonkhe tihlahla letatiniselwa kahle, tadvudvuteka emhlabeni longaphansi.

¹⁷ Labo labebahlala emtfuntini wawo, tihlobo tawo emkhatsini wetive, nabo behlela nawo ethuneni, bahlangana nalabo lababulewe ngenkemba.

¹⁸ “ ‘Ngutiphi taletihlahla tase-Edeni letingalinganiswa nawe ngebukhatikhati nangekuhlonipheka? Noko nawe, futsi, utakwehliswa kanye naletihlahla tase-Edeni niye emhlabeni longaphansi; uyawulala emkhatsini walabebangakasokwa, kanye nalababebulewe ngenkemba. “ ‘Lona nguFaro nato tonkhe tihlwele takhe temabutfo, kusho iNkhosi Simakadze.’ ”