Hezekeli 30 - Siswati 1996 Bible

Simakadze utawujezisa iGibhithe

¹ Kwefika livi laSimakadze kimi, latsi:

² “Ndvodzana yemuntfu, phrofetha, utsi: ‘Naku lokushiwo yiNkhosi Simakadze, itsi: “ ‘Lilani nitsi: “Maye ngalelo langa!”

³ Ngobe lilanga selisedvute, lilanga laSimakadze selisondzele, lilanga lemafu, sikhatsi sekubhubha kwetive.

⁴ Inkemba iyawubefikela baseGibhithe, nebuhlungu benhlitiyo buyawubehlela baseKushe. Ngesikhatsi lasebagwaziwe bawa eGibhithe, umcebo wayo uyawutfunjwa, netisekelo tayo tiyawucheketwa ekhatsi.

⁵ “ ‘Tonkhe tihlabani letaticashiwe: taseKushe netasePhuthi, netaseLidiya, netakuyo yonkhe i-Arabiya, netaseLibhiya kanye nebantfu belive lesivumelwane sami nabo bayakuwa ngenkemba kanye nebaseGibhithe.

⁶ “ ‘Naku lokushiwo nguSimakadze, utsi: “ ‘Labo labalekelelana nebaseGibhithe, bayakuwa, nemandla ayo letigabatisa ngawo ayawukwehluleka. Bayakuwela ekhatsi kuyo ngenkemba, kusukela eMigdoli kuye e-Aswani, kusho iNkhosi Simakadze.

⁷ Ngulapho-ke bayawuba lihlane emkhatsini wemave langemahlane. Emadolobha abo ayawubasemkhatsini wemadolobha lasabhidlitiwe.

⁸ Ngulapho-ke bayawukwati khona kutsi mine nginguSimakadze, nangilumeka umlilo eGibhithe nabo bonkhe labasitana nayo bayawupitjitwa.

⁹ “ ‘Ngalelo langa kuyawuphuma titfunywa kimi, tiphume ngemikhumbi tiyekwesabisa baseKushe, kuze baphelelwe kutamasa kwabo. Bayakwehlelwa kwesaba lokukhulu, mhlazana baseGibhithe behlelwa sehlakalo, ngobe ngempela siyawufika.

¹⁰ “ ‘Naku lokushiwo yiNkhosi Simakadze, itsi: “ ‘Ngiyawuticedza leticumbi taseGibhithe, ngitibulale ngesandla saNebukhadnezari, inkhosi yaseBhabhulona.

¹¹ Yena nemphi yakhe, bantfu labanelunya lolukhulu etiveni tonkhe, bayawuletfwa batewubhubhisa live. Bayawukhokha tinkemba tabo batibhekise eGibhithe, bagcwalise live ngetidvumbu talabagwaziwe.

¹² Ngiyakomisa imifudlana yaseNayili, ngitsengise live kubantfu lababi; ngetandla tebachamuki live ngiyawulibhubhisa nako konkhe lokukulo. Mine Simakadze sengikhulumile.

¹³ “ ‘Naku lokushiwo yiNkhosi Simakadze, itsi: “ ‘Ngiyawutibhubhisa tithico, ngiticedze tonkhe titfombe eMemfisi. Akusayikuba nambusi eGibhithe, futsi ngiyawusakata kwesaba kulo lonkhe live.

¹⁴ IPhathrosi ngiyakuyenta ibe lihlane, iSoyani ngiyilumeke ngemlilo, iThebesi ngiyehlisele sijeziso.

¹⁵ Ngiyawutfululela lulaka lwami etikwePhelusiyumi, lekunguyona nqaba yaseGibhithe, futsi ngincamule ticumbi tebantfu baseThebesi.

¹⁶ Ngiyawulumeka umlilo eGibhithe; iPhelusiyumi iyawujilajileka ngenca yebuhlungu. IThebesi iyawuhlaselwa ifohlwe; iMemfisi iyawukhukhulwa.

¹⁷ Emajaha aseHeliyopholisi newaseBubastisi ayakuwa ngenkemba, nemadolobha cobo lwawo ayawutfunjwa.

¹⁸ Lilanga liyawuba bumnyama eThaphanesi, mhlazana ngigamula lijoko laseGibhithe; lapho-ke emandla ayo letigabatisa ngawo ayawuphela. Iyawusibekelwa ngemafu, netabelo tayo tiyawutfunjwa.

¹⁹ Ngako ngiyakwehlisela sijeziso eGibhithe, futsi bayawukwati kutsi mine nginguSimakadze.’ ”

Kwephulwa kwemandla enkhosi yaseGibhithe

²⁰ Ngemnyaka weli-11, enyangeni yekucala, ngelilanga lesikhombisa, livi laSimakadze lefika kimi, latsi:

²¹ “Ndvodzana yemuntfu, ngiwephulile umkhono waFaro, inkhosi yaseGibhithe. Bewungakaboshelwa kutsi uphiliswe, futsi ungakasinyiswa nangetindvuku kuze ucine ngalokwenele kutsi ubambe inkemba.

²² Ngako-ke naku lokushiwo yiNkhosi Simakadze, itsi: Ngimelene naFaro, inkhosi yaseGibhithe. Ngiyakuyephula yomibili imikhono yakhe, wona lona losengakephuki kanye nalona losewephukile, ngidzilite inkemba esandleni sakhe.

²³ BaseGibhithe ngiyawubasakatela etiveni ngetive, ngibasakatele emaveni ngemave.

²⁴ Ngiyakuyicinisa imikhono yenkhosi yaseBhabhulona, ngifake inkemba yami esandleni sayo, kodvwa yona imikhono yaFaro ngiyakuyigamula. Uyawububula embikwenkhosi yaseBhabhulona njengemuntfu phaca logwaziwe.

²⁵ Ngiyakuyicinisa imikhono yenkhosi yaseBhabhulona, kodvwa imikhono yaFaro iyawulenga ijikite. Ngulapho-ke bayawukwati khona kutsi mine nginguSimakadze, mzukwana ngibambisa inkhosi yaseBhabhulona inkemba yami ngesandla sayo, iyijikitisele bona baseGibhithe.

²⁶ BaseGibhithe ngiyakubahlakatela, etiveni ngetive, ngibasakatele emaveni ngemave. Ngulapho-ke bayawukwati khona kutsi mine nginguSimakadze.”