Hezekeli 28 - Siswati 1996 Bible

Siphrofetho lesimelene nenkhosi yaseThire

¹ Kwefika livi laSimakadze kimi, latsi:

² “Ndvodzana yemuntfu, shano kumbusi waseThire, utsi: ‘Naku lokushiwo yiNkhosi Simakadze, itsi: “ ‘Ukhuluma ngekutigcabha enhlitiyweni yakho, utsi: “Mine ngingunkulunkulu; ngihlala esihlalweni sebukhosi sankulunkulu ekhatsi nekhatsi elwandle.” Kodvwa ungumuntfu, awusiye nkulunkulu, nome nje uticabanga kutsi uhlakaniphe njengankulunkulu.

³ Uhlakaniphile yini kunaDanyela? Kute yini imfihlo lengakakhanyi kuwe?

⁴ Ngekuhlakanipha kwakho nangekucondza kwakho utibutsele wena bunjinga, netindvundvuma tegolide netesiliva etingungwini takho tengcebo.

⁵ Ngebuchwephesha bakho ekutsengiseni ubandzisile bunjinga bakho; nangenca yebunjinga bakho inhlitiyo yakho seyikhukhumukiswe ngumgcabho.

⁶ “ ‘Ngako-ke naku lokushiwo yiNkhosi Simakadze, itsi: “ ‘Njengobe uticabanga kutsi uhlakaniphile, uhlakaniphe njengankulunkulu,

⁷ ngako-ke ngitawuvusa tive tikuhlasele, tive letinelulaka nelunya kakhulu, tiyawukhokha tinkemba tato titibhekise ngasebuhleni bakho nangasekuhlakanipheni kwakho, tigwaze bukhatikhati beludvumo lwakho.

⁸ Bayawukwehlisela phansi emgodzini, uyawufa kabuhlungu ekhatsi nekhatsi kwetilwandle.

⁹ Uyawube usasho yini kutsi: “Ngingunkulunkulu mine” ebukhoneni balabo labakubulalako? Noko uyawuba ngumuntfu nje, hhayi nkulunkulu, etandleni talabo labayawube bakubulala.

¹⁰ Uyawufa kufa kweligwala etandleni tebachamuki. Sengikhulumile, kusho iNkhosi Simakadze.’ ”

Kuwa kwenkhosi yaseThire

¹¹ Kwefika livi laSimakadze kimi, latsi:

¹² “Ndvodzana yemuntfu, dzindza sililo ngenkhosi yaseThire, utsi kuyo: ‘Naku lokushiwo yiNkhosi Simakadze, itsi: “ ‘Wena bewusibonelo sekuphelela, ugcwele kuhlakanipha, futsi uphelele ngebuhle.

¹³ Wawuse-Edeni, sivandze saNkulunkulu. Wawuhlotjiswe ngawo onkhe ematje laligugu: ngemarubhi, nangemathophazi, nangema-emeraldi, nangemakhrisolithe, nangema-oniksi, nangemajasiphi, nangemasafire, nangemathekhosi, nangemabherili. Kwekuhlanganisa lamatje akho laligugu nekwekuwanamatsisela kwakwentiwe ngegolide. Kwalungiswa kahle konkhe loko ngelilanga lowadalwa ngalo.

¹⁴ Wagcotjwa waba likherubhi lelingumelusi, ngobe ngakugcobela kona loko. Wawusentsabeni lengcwele yaNkulunkulu; wawuhambahamba emkhatsini wematje emlilo.

¹⁵ Wawungasoleki etindleleni takho kusukela ngelilanga lowadalwa ngalo, kwadzimate kwaba ngumhlazana bubi butfolakala kuwe.

¹⁶ Ngekutsengisa kwakho lokunyenti wagcwala budlova, wase uyona. Ngako ngakulahla ngobe ungcolile ngekwemtsetfo, ngakususa entsabeni yaNkulunkulu, ngakucosha, awu, kherubhi lelalingumelusi, wesuka emkhatsini wematje emlilo.

¹⁷ Inhlitiyo yakho yakhukhumuka ngenca yebuhle bakho, wona buhlakaniphi bakho ngenca yekucwebetela kwakho. Ngako ngase ngikulahlela emhlabeni, ngakwenta inhlekisa embikwemakhosi.

¹⁸ Utingcolisile tindzawo takho letingcwele ngetono takho letinyenti nangekungetsembeki kwakho ekutsengiseni kwakho. Ngako ngase ngenta kutsi kuphume umlilo kuwe, waphuma wadla wena, ngakwehlisa waba ngumlotsa emhlabatsini, embikwabo bonkhe lababekubukile.

¹⁹ Tonkhe tive letatikwati, timangele ngawe; ngobe sewufike ekugcineni lokubi, futsi ngeke uphindze ube khona.’ ”

Siphrofetho lesimelene neSidoni

²⁰ Kwefika livi laSimakadze kimi, latsi:

²¹ “Ndvodzana yemuntfu, bhekisa buso bakho ngaseSidoni; uphrofethe umelane nayoy,

²² utsi: ‘Naku lokushiwo yiNkhosi Simakadze, itsi: “ ‘Awu, Sidoni, ngiyemelana nawe, futsi ngitawutibutsela ludvumo ngawe. Bayawukwati kutsi mine nginguSimakadze, nangehlisela sijeziso etikwakho, ngitikhombise mine ngingcwele ekhatsi kuwe.

²³ Ngiyawutfumela sifo lesibulalanako etikwakho, ngigeletise ingati etitaladini takho. Labahlatjiwe bayawusacatekela ekhatsi kuwe, inkemba iyawukuhlasela macala onkhe. Ngulapho-ke bayawukwati khona kutsi mine nginguSimakadze.’ ”

Ema-Israyeli ayawubusiswa

²⁴ “ ‘Bantfu baka-Israyeli abaseyikuba nabo bomakhelwane labanetinhlitiyo letedzelelako, labangemanyeva lanesitfozi nalacijile. Ngulapho-ke bayawukwati khona kutsi mine ngiyiNkhosi Simakadze.

²⁵ “ ‘Naku lokushiwo yiNkhosi Simakadze, itsi: Nangibutsa sive saka-Israyeli etiveni, lapho besihlakatelwe khona, ngiyawutibonakalisa ngingcwele emkhatsini waso embikwetive. Siyawube sesihlala eveni lelingelaso, lengaliniketa inceku yami Jakobe.

²⁶ Siyawuhlala lapho siphephile, sakhe tindlu, sihlanyele emasimi emagelebisi; sona siyawuhlala siphephile, nase ngehlisela sijeziso kubo bonkhe bomakhelwane baso labasidlela umona. Ngulapho-ke bayawukwati khona kutsi mine nginguSimakadze Nkulunkulu wabo.’ ”