Hezekeli 27 - Siswati 1996 Bible

Ingoma yesililo ngeThire

¹ Kwefika livi laSimakadze kimi, latsi:

² “Ndvodzana yemuntfu, dzindza sililo macondzana neThire.

³ Khuluma kuyo iThire, lengasesangweni lelibheke ngaselwandle, ingumhwebi webantfu basemaveni lagudla lwandle, utsi: ‘Naku lokushiwo yiNkhosi Simakadze, itsi: “ ‘Awu, Thire, ukhuluma utsi: “Ngimuhle ngiphelele.”

⁴ Indzawo yakho yekubusa yayisetilwandle letijulile; bakhi bakho benta buhle bakho baphelela, waba ngumkhumbi lomuhle.

⁵ Benta tonkhe tigodvo takho tetipheshula taseSeniri, balandza umsedari eLebanoni kutsi batekwakhela insika ngawo.

⁶ Ngema-okhi aseBhashani bakwentela emaphini ekugwedla. Ngetigodvo temsayipuresi lesuka elusentseni lwaseSiphrosi benta indzawo yakho yekuhambahamba emkhunjini, yahlotjiswa ngematinyo etindlovu.

⁷ Ilineni lecolisakele nalehlotjisiwe yaseGibhithe kwakungulona seyili lakho lelalisebenta njengesiboniso sakho; emathende akho abentiwe ngalokuluhlata njengesibhakabhaka nangalokubukhwebeletane lokuphuma etichingini tase-Elisha.

⁸ Emadvodza aseSidoni newase-Avadi bekunguwona madvodza ekugwedla umkhumbi wakho; emadvodza akho labetingcweti, wena Thire, abekhwele emkhunjini angematilosi akho.

⁹ Bongcongcoshe betingcweti taseGebali babekhwele emkhunjini babakhi bemikhumbi labahlalele kuvala timbobo. Yonkhe imikhumbi yaselwandle nebagibeli bayo beta nabo, batewutsengiselana nawe.

¹⁰ “ ‘Emadvodza asePheresiya, newaseLidiya, newasePhuthi abengemasotja emphini yakho. Agaca emahawu awo netimphantitje tawo kuwe, akuletsela ludvumo nekwatiwa.

¹¹ Emadvodza ase-Avadi newaseHeleki abesetibondzeni takho yonkhe indzawo; emadvodza aseGamadi abesemibhoshongweni yakho. Agaca emahawu awo etikwetibondza takho, befikisa buhle bakho ekupheleleni.

¹² “ ‘IThashishi yatsengiselana nawe ngenca yebunyenti bebunjinga bakho betimphahla; babeshintjiselana nawe ngesiliva, nangensimbi, nangemfimfi, nangemtfofu, ngetimphahla takho.

¹³ “ ‘BaseGrisi, nebaseThubhali kanye nebaseMesheki babetsenga timpahla takho; babeshintjiselana nawe ngetigcili nangetintfo telitfusi ngetimphahla takho.

¹⁴ “ ‘Emadvodza aseBhethi Togama ashintjiselana nawe ngemahhashi emisebenti, newemphi nangeminyuzi ngetimphahla takho.

¹⁵ “ ‘Emadvodza aseDedani atsengiselana nawe, nemave lamanyenti langaselwandle abekutsengisela kakhulu; abuyisela kuwe ematinyo etindlovu netigodvo letimnyama temsimbithi.

¹⁶ “ ‘Base-Aramu babetsengiselana nawe ngenca yebunyenti bemikhitsito yakho, babekutsengisela timphahla takho ngematje laligugu laluhlata, nangetindvwangu letibukhwebeletane, naletihlotjisiwe, nangelineni lecolisakele, nangekhorali, nangemarubhi.

¹⁷ “ ‘Bahwebi bakaJuda nebaka-Israyeli babetsengiselana nawe; babekutsengisela timphahla takho ngakolo labephuma eMinithi, nangabojece, nangeluju lwetinyosi, nangemafutsa, nangebhalisamu.

¹⁸ “ ‘BaseDamaseko nabo babekutsengisela kakhulu ngemikhitsito yakho nangebunjinga bakho lobukhulu betinhlobonhlobo tetimphahla letitsengiswako, bona-ke babekutsengisela tona ngeliwayini laseHelboni nangensontfo yaseSahari.

¹⁹ “ ‘BakaDani nemaGriki ase-Uzali babetsenga timphahla takho ngensimbi lebunjiwe, nangetinandzisi ikhasiya nekhalamusi.

²⁰ “ ‘BaseDedanki bona babetsengiselana nawe ngetingubo tetihlalo temahhashi.

²¹ “ ‘Base-Arabiya nabo bonkhe labakhulu baseKhedari bekunguwona makhasimende akho lamakhulu, bona-ke babetsengiselana nawe ngemazinyane etimvu, nangetihhanca tetimvu kanye netimbuti.

²² “ ‘Bahwebi baseSheba nebaseRama babetsengiselana nawe; ngetimphahla takho tekutsengiswa babekunika tinhlobonhlobo tetinongo leticolisakele, netematje laligugu, negolide.

²³ “ ‘BaseHarani, nebaseKhane, nebase-Edeni kanye nebahwebi baseSheba, nebase-Asiriya, nebaseKhilmadi nabo babetsengiselana nawe.

²⁴ Emakethe yakho babetsengiselana nawe ngekwekwembatsa lokuhle, nangetindvwangu letiluhlata njengesibhakabhaka, nangetintfo letihlotjisiwe, nangematjalo langemabhadvubhadvu, nangetimvakazi letephotfwe kahle tase tifinywa lifindvo lelihle nalelicinile.

²⁵ “ ‘Imikhumbi yaseThashishi nguyona yetfwala timphahla takho letitsengiswako. Wena wetfwele uyasesa imitfwalo lematima ekhatsi nekhatsi elwandle.

²⁶ Bagwedli bakho bemikhumbi bakuvakashisa etilwandle letijulile. Kodvwa umoya wasemphumalanga uyawukucoba ube timvutfu ekhatsi emajukujukwini elwandle.

²⁷ Bunjinga bakho, netimphahla takho tekutsengiswa, nematilosi akho, nebashayei bakho bemikhumbi, nebalungisi bemikhumbi, nebahwebi bakho, nawo onkhe emasotja akho, nabo bonkhe labanye labasemikhunjini bayawushona phansi ekhatsi emajukujukwini elwandle, mhlazana kubhidlika umkhumbi wakho.

²⁸ Emave langaselwandle ayawutfutfumela, ngesikhatsi sekukhala kwematilosi akho.

²⁹ Bonkhe labasebentisa emaphini ekugwedla imikhumbi bayakuyishiya imikhumbi yabo. Ematilosi nabo bonkhe bashayeli bemikhumbi bayakuma elusentseni lwelwandle.

³⁰ “ ‘Bayawuphakamisa emavi abo bakhale kabuhlungu ngenca yakho. Bayawutsela lutfuli etinhloko tabo batigicite emlotseni.

³¹ Bayawuhhula tinhloko tabo ngenca yakho, bembatse emasaka. Bayawukukhalela tinyembeti ngemiphefumulo ledzabukile nangekulila lokumunyu.

³² Bayawukhihla lesikhulu sililo ngesikhatsi babubula bakhala ngenca yakho, batsi: “Ngubani nje lowake wathuliswa njengeThire, letungeletwe lwandle?”

³³ Ngesikhatsi timphahla takho tekutsengiswa tisatfunyelwa elwandle, kwakusitakala tive letinyenti; ngebunjinga bakho lobunyenti nangetimphahla takho tekutsengiswa wawanjingisa emakhosi emhlaba.

³⁴ Manje sewucitfwe lwandle, lwakufaka emajukujukwini emanti; timphahla takho letitsengiswako nabo bonkhe lonabo sekushone kanye nawe phansi ekujuleni.

³⁵ Bonkhe labahlala emaveni langaselwandle bayamangala ngawe; emakhosi abo ayatfutfumela ngenca yeluvalo, nebuso bawo sebuhhwabile ngenca yekwesaba.

³⁶ Bahwebi emkhatsini wetive bayekhuta bababate ngenca yakho; sewufike ekwephetseni lokwetfusanako, futsi ungeke uphindze ube khona.’ ”