Hezekeli 24 - Siswati 1996 Bible

Libhodo lekupheka lelihhevukile

¹ Ngemnyaka wemfica, enyangeni yelishumi, ngelilanga lelishumi, livi laSimakadze lefika kimi, latsi:

² “Ndvodzana yemuntfu, libhale phansi lelilanga, lelilanga lona leli, ngobe inkhosi yaseBhabhulona seyivimbetele iJerusalema ngalo lelilanga.

³ Tjela lendlu lehlubukako nankhu umzekeliso, utsi: ‘Naku lokushiwo yiNkhosi Simakadze, itsi: “ ‘Beka etiko lelibhodo lekupheka; libeke etiko, bese utsela emanti ekhatsi kulo.

⁴ Faka ekhatsi kulo lamacatsa enyama, tonkhe letitfo letikhetsekile, umlente nemkhono. Ligcwalise ngalancono alamatsambo,

⁵ khetsa telikhetselo emhlambini wetimvu. Fumbela tinkhuni ngaphansi kwalo wentele lamatsambo, ubase kuze kubile, upheke lamatsambo lasebhodweni.

⁶ “ ‘Ngobe naku lokushiwo yiNkhosi Simakadze, itsi: “ ‘Maye kulelo dolobha lekucitsa ingati, kulelo bhodo lese linetincwencwe, letincwencwe talo tingeke tisesuka. Khipha kulo licatsa ngalinye ngalinye ngaphandle kwekuwentela inkatho.

⁷ “ ‘Ngobe lengati leliyicitsile isekhatsi kulo: Layitsela edvwaleni lelingenalutfo; alizange liyitsele emhlabatsini, lapho beyitawumbonywa khona lutfuli.

⁸ Kuze nginyakatise lulaka ngitikhiphele nesibhongo, ngabeka ingati yalo edvwaleni lelingenalutfo, kuze ingetiwumbonyeka.

⁹ “ ‘Ngako-ke, naku lokushiwo yiNkhosi Simakadze, itsi: “ ‘Maye kulelo dolobha lekucitsa ingati! Nami futsi ngiyawufumbela tinkhuni timponge.

¹⁰ Ngako fumbela tinkhuni, ulumeke umlilo. Yipheke kahle lenyama, uyihlanganise netinandzisi; nalamatsambo adzimate ashe.

¹¹ Ubobe sewubeka lelibhodo lelingenalutfo etikwemalahle, lize lishise nelitfusi lalo limanyatele, kuze kutsi nekungcola kwalo kuncibilike, netincwencwe talo tize tishe tiphele.

¹² Liyikhinyabete yonkhe imitamo; tincwencwe talo letinkhulu atikesuswa ngisho nangemlilo.

¹³ “ ‘Manje kungcola kwakho luntjingintjingi lwenkhanuko yakho. Ngobe ngetama kukugeza, kodvwa wangete wavuma kugezwa kulokungcola kwakho, ungeke uphindze uhlanteke, luze lubotje lulaka lwami kuwe.

¹⁴ “ ‘Mine Simakadze sengikhulumile. Sikhatsi sami sesifikile sekutsi ngikwente. Ngingeke ngisatibamba; ngingeke ngisaba nesihawu, futsi nenhlitiyo yami ingeke isabohla. Uyakwehlulelwa ngangekutiphatsa kwakho nangekwetento takho, kusho iNkhosi Simakadze.’ ”

Kufa kwemfati waHezekeli

¹⁵ Livi laSimakadze lefika kimi, latsi:

¹⁶ “Ndvodzana yemuntfu, ngekugadla kanye nje sengitawususa kuwe loko lokuyinjabulo yemehlo akho. Noko ungalili, futsi ungasidzindzi sililo nome ukhale tinyembeti.

¹⁷ Bubula nje uthule; ungamlileli lowo lofile. Umshuculo wakho awuhlale uboshelwe enhloko, netincabule takho tihlale etinyaweni takho; ungalimbonyi lingentansi lebuso bakho, futsi ungakudli kudla kwelisiko kwalabalilako.”

¹⁸ Ngako ngakhuluma kubantfu ekuseni, kwatsi entsambama umkami wafa. Ngakusasa ekuseni ngenta njengobe ngangitjeliwe.

¹⁹ Bantfu bangibuta, batsi: “Ungete wasitjela yini kutsi letintfo tiphatselene ngani natsi?”

²⁰ Ngako ngakhuluma kubo ngatsi: “Livi laSimakadze lefika kimi, latsi:

²¹ ‘Khuluma kulendlu yaka-Israyeli, utsi: Naku lokushiwo yiNkhosi Simakadze, itsi: Indzawo yami lengcwele sengitayingcolisa, lenqaba lenitigcabha ngayo, injabulo yemehlo enu, intfo lehawukelwa ngumphefumulo wenu. Emadvodzana nemadvodzakati lenawashiya emuva atawubulawa ngenkemba.

²² Nani niyawukwenta njengobe nami ngentile. Aniyikulimbonya lingentansi lebuso benu, kantsi futsi ningeke nikudle kudla kwelisiko kwalabalilako.

²³ Imishuculo yenu nitakuyiyekela ibesetinhloko tenu netincabule tenu tisetinyaweni tenu. Ningeke nizile nome nilile, kodvwa niyawukondza ngenca yetono tenu, nibubule lomunye kulomunye.

²⁴ Hezekeli utakuba sibonakaliso kini; niyawukwenta njengobe naye entile. Nakwenteka-ke loku, ngulapho-ke niyawukwati khona kutsi mine ngiyiNkhosi Simakadze.’

²⁵ “Wena-ke, ndvodzana yemuntfu, ngalelilanga lengiyawutsatsa ngalo inqaba yabo, kujabula kwabo neludvumo lwabo, injabulo yemehlo abo, nesifiso senhlitiyo yabo, kanye nemadvodzana nemadvodzakati abo,

²⁶ ngalelo langa umkhoseli uyawuta kuwe atekutjela letindzaba.

²⁷ Ngaleso sikhatsi umlomo wakho uyawuvuleka; uyawukhuluma naye ungasabindzi. Ngako uyawuba sibonakaliso kubo, futsi-ke bayawukwati kutsi mine nginguSimakadze.”