Hezekeli 2 - Siswati 1996 Bible

Kubitwa kwaHezekeli nguNkulunkulu kutsi atewuba ngumphrofethi

¹ Wakhuluma kimi, watsi: “Ndvodzana yemuntfu, sukuma ume ngetinyawo takho, ngitawukhuluma nawe.”

² Watsi asakhuluma, Moya wangena kimi wangisukumisa, ngema ngetinyawo tami, ngamuva akhuluma kimi.

³ Watsi: “Ndvodzana yemuntfu, ngikutfumela kuma-Israyeli, esiveni lesihlubukako nalesingihlubukile; bona naboyise solomane bayangihlubuka kuze kube ngulamuhla.

⁴ Lesive lengikutfumela kuso sinenkhani nenhloko lelukhuni. Khuluma kuso, utsi: ‘Naku lokushiwo yiNkhosi Simakadze.’

⁵ Nome bayakulalela nome abakulaleli, ngobe phela bayindlu lenenkhani, kodvwa bayawukwati kutsi bekunemphrofethi emkhatsini wabo.

⁶ Wena-ke, ndvodzana yemuntfu, ungabesabi ngisho nemavi abo. Ungesabi ngisho nome tinchachabutane nemanyeva sekukutungeletile, yebo, nome sewuhlala emkhatsini wabofecela. Ungakwesabi loko labakushoko, futsi ungesatjiswa ngibo, lite nome bayindlu yekuhlubuka nje.

⁷ Kufanele wena ukhulume emavi ami kubo, nome bayakulalela nome abakulaleli, ngobe banenkhani.

⁸ Kodvwa wena, ndvodzana yemuntfu, lalela loko lengikushoko kuwe. Ungahlubuki njengalendlu lehlubukako; vula umlomo wakho udle loko lengikunika kona.”

⁹ Ngase ngiyabuka, ngabona sandla selulelwe ngakimi. Ekhatsi kuso kwakunencwadzi legocotwako,

¹⁰ layisombulula embikwami. Ngala nangale kwayo kwakubhalwe emavi ekulila, newekukhala kanye newelusizi.