Hezekeli 13 - Siswati 1996 Bible

Siphrofetho lesimelene nebaphrofethi labadvuna bemanga

¹ Livi laSimakadze lefika kimi, latsi:

² “Ndvodzana yemuntfu, phrofetha umelane nebaphrofethi baka-Israyeli labaphrofethako nyalo. Khuluma kulabo labaphrofetha loko labakususela emicabangweni yabo, utsi: ‘Vanini livi laSimakadze!

³ “ ‘Naku lokushiwo yiNkhosi Simakadze, itsi: Maye kulabo baphrofethi labatilima, labalandzela umoya wabo, babe bangakaboni lutfo!

⁴ Awu, Israyeli, baphrofethi bakho bafanana netimphungutja letisemfuhlululwini.

⁵ Anikenyukeli etulu etikhaleni letiselubondzeni lwendlu yaka-Israyeli, kutsi nitivale khona lutakuma lucine lulungele imphi ngelilanga laSimakadze.

⁶ Imibono yabo iyinkhohliso, nekubhula kwabo kungemanga. Bakhuluma batsi: “Kusho Simakadze,” abe Simakadze angazange asabatfume; kunjalo nje, babheke kutsi lamavi abo agcwaliseke.

⁷ Ngitsi kubo: Anizange niyibone yini imibono leyinkhohliso nekubhula lokungemanga ngesikhatsi nitsi: “Kusho Simakadze”, nome ngingakaze ngikhulume?

⁸ “ ‘Ngako-ke naku lokushiwo yiNkhosi Simakadze, itsi: “Ngenca yemavi enu layinkhohliso nangemibono yenu lengemanga, ngimelene nani,” kusho iNkhosi Simakadze.

⁹ Sandla sami siyawumelana nebaphrofethi lababona imibono leyinkhohliso, baphengule lokungemanga. Bangeke babe belibandla lebantfu bami nome babhaliswe etincwadzini tebantfu bendlu yaka-Israyeli, futsi bangeke bangene eveni lema-Israyeli. Ngulapho-ke niyawungati khona kutsi mine ngiyiNkhosi Simakadze.

¹⁰ “ ‘Njengobe bedukisa bantfu bami, batsi: “Kuthula”, kube kute naloko kuthula, nangenca yekutsi nakwakhiwa lubondza lolulula, bona baluhuca ngemcakaco,

¹¹ ngako-ke batjele labo labaluhuca ngemcakaco kutsi lutakuwa lolubondza. Imvula lenkhulu itakuna, futsi ngitawutfumela sangcotfo lesitawutfululekela phansi, kuvungute imimoya lenemandla.

¹² Nase luwa lolubondza, bantfu bangeke yini banibute batsi: “Uphi lomcakaco beniluhuce ngawo?”

¹³ “ ‘Ngako-ke naku lokushiwo yiNkhosi Simakadze, itsi: Ngiyawudedela sivunguvungu lesinemandla ngenca yelulaka lwami, ngentfukutselo lenkhulu ngitfulule sangcotfo, nemvula lenkhulu iyakwehla ngentfukutselo yami lenkhulu yembhubhiso.

¹⁴ Ngiyakuluhhihlitela phansi lolubondza loluhucwe ngemcakaco, ngiludzilite lube litsafa, kuze tisekelo talo tisale ebaleni. Ngesikhatsi naluwa, nani niyawubhujiswa kulo. Ngulapho-ke niyawukwati khona kutsi mine nginguSimakadze.

¹⁵ Ngako lulaka lwami ngiyakulusebentisa ekulweni nelubondza nasekulweni nalabo labaluhuce ngemcakaco. Ngiyawukhuluma kini ngitsi: “Lubondza alusekho, kanjalo nalabo labaluhucile abasekho,

¹⁶ kanye nebaphrofethi baka-Israyeli labaphrofetha kuyo iJerusalema, babona nemibono yekuthula kwayo, kube kona kungekho kuthula, kusho iNkhosi Simakadze.” ’ ”

Siphrofetho lesimelene nebaphrofethi labasikati bemanga

¹⁷ “Nyalo-ke, ndvodzana yemuntfu, bhekisa buso bakho kuwo emadvodzakati esive sakini laphrofetha loko lokusuka emicabangweni yawo. Phrofetha umelane nawo,

¹⁸ utsi: ‘Naku lokushiwo yiNkhosi Simakadze, itsi: Maye kubo bonkhe labo labasikati labegaba imitsi yekuhhungula etihlakaleni tetandla, bente imiyeko lemihibahiba ngebudze lobehlukene, bentele kumbonya tinhloko tabo, khona batekwetsiya bantfu. Ningatetsiya yini timphilo tebantfu bami, kodvwa nine nisindze?

¹⁹ Nine ningihlambalatile emkhatsini wesive sami, ngobe nicondze kutfola emabinta lambalwa nje ebhali netingebhuta letimbalwa tesinkhwa. Ngekukhuluma emanga esiveni sami, lesilalela emanga, nibabulele labo lebekufanele bangafi, nasindzisa lebekufanele bafe.

²⁰ “ ‘Ngako-ke naku lokushiwo yiNkhosi Simakadze, itsi: Ngimelene nalobutsi benu bekuhhungula lenihhungula ngabo bantfu nibetsiye njengetinyoni, futsi ngitabudzabula lapho emikhonweni yenu. Ngiyawubakhulula labo bantfu lese nibetsiye njengetinyoni.

²¹ Ngiyakuyidzabula lemiyeko yenu ngisindzise sive sami etandleni tenu, singeke siphindze sibe yimphango yemandla enu. Ngulapho-ke niyakungati khona kutsi mine nginguSimakadze.

²² Njengobe nibajabhisile labalungile ngalamanga enu, ngibe mine ngingakabadzabukisi, nangenca yekutsi nikhutsate lababi kutsi bangaphendvuki etindleleni tabo letimbi kuze basindzise timphilo tabo,

²³ ngako-ke ningeke nisayibona imibono leyinkhohliso, ningabe nisabhula ngekubhula lokungemanga. Ngiyakubasindzisa bantfu bami etandleni tenu. Ngulapho-ke niyawungati khona kutsi mine nginguSimakadze.’ ”