Hezekeli 12 - Siswati 1996 Bible

Umphrofethi anjengemkhoseli

¹ Livi laSimakadze lefika kimi, latsi:

² “Ndvodzana yemuntfu, uhlala emkhatsini wesive lesihlubukako. Banemehlo ekubona kodvwa ababoni, banetindlebe tekuva kodvwa abeva, ngobe basive lesihlubukako.

³ “Ngako-ke, wena ndvodzana yemuntfu, bopha timphahla takho tekutfunjwa, phuma lapho ukhona, uphume emini babuka, uye kulenye indzawo. Mhlawumbe batakucondzisisa loko, lite nome bayindlu lehlubukako.

⁴ Kutawutsi emini babuka, ukhiphe lomtfwalo wakho wetimphahla takho sewuvele ulungele kuya ekutfunjweni. Kutawutsi kusihlwa, basabuka, uphume uhambe njengalabo labaya ekutfunjweni.

⁵ Batawutsi basabukile, umbe lubondza ulubhobose imbobo, bese uphuma kuyo lembobo kanye netimphahla takho.

⁶ Tetjatse ehlombe lakho babukile uhambe nato nakucala kuhwalala, buso bakho ubumbonyile, khona ungetulibona live, ngobe sengikwente sibonakaliso kuyo indlu yaka-Israyeli.”

⁷ Ngako ngenta njengobe ngangitjeliwe. Kwatsi emini ngakhipha timphahla tami letase tingumtfwalo wekuya ekutfunjweni. Kwase kutsi kusihlwa ngemba ngabhobosa lubondza ngetandla tami. Ngatsatsa timphahla tami nakucala kuhwalala, ngatetjatsa ehlombe babukile.

⁸ Ekuseni livi laSimakadze lefika kimi, latsi:

⁹ “Ndvodzana yemuntfu, ayikakubuti yini lendlu yaka-Israyeli lehlubukako, kutsi: ‘Wentani?’

¹⁰ “Khuluma kubo, utsi: ‘Naku lokushiwo yiNkhosi Simakadze, itsi: Lelivi lesiphrofetho limacondzana nenkhosi leseJerusalema kanye nayo yonkhe indlu yaka-Israyeli lelapho.’

¹¹ Khuluma kubo, utsi: ‘Mine ngisibonakaliso kini.’ “Njengobe ngentile nje, kuyakwenteka kanjalo nakubo. Bayakuya ekutfunjweni batitfunjwa.

¹² “Lenkhosi lesemkhatsini wabo iyakwetjatsa timphahla tayo ehlombe kusihlwa ihambe, kuyawumbiwa imbobo elubondzeni, imbelwe yona, kutsi itewuphuma kuyo. Iyawumbonya buso bayo, khona ingetilibona lelive.

¹³ Ngiyakuyetsiya ngelinetha lami, futsi iyawubanjwa kulolo lugibe lwami; ngiyakuyiyisa eBhabhulona, eveni lemaKhaledi, kodvwa ngeke ilibone, ngulapho iyawufela khona.

¹⁴ Ngiyawubasakatela emimoyeni, bonkhe labo labayisingatsile, tisebenti tayo nawo onkhe emabutfo ayo, ngiyawubacosha ngenkemba.

¹⁵ “Bayawukwati kutsi mine nginguSimakadze, nase ngibahlakatele emkhatsini wetive, ngibasakatele emaveni ngemave.

¹⁶ Kodvwa ngiyawubaphephisa labambalwa babo enkembeni, nasendlaleni kanye nasesifweni lesibulalanako, kuze kutsi kuleto tive lapho baya khona bativume tonkhe tento tabo letimbi letisinengiso. Ngulapho-ke bayawungati khona kutsi mine nginguSimakadze.”

Sibonakaliso semphrofethi lotfutfumelako

¹⁷ Livi laSimakadze lefika kimi, latsi:

¹⁸ “Ndvodzana yemuntfu, tfutfumela nawudla kudla kwakho; yebo, utfutfumele ngekwesaba usanatsa emanti akho.

¹⁹ Khuluma kulabantfu balelive, utsi: ‘Naku lokushiwo yiNkhosi Simakadze ngalabo labahlala eJerusalema naseveni lema-Israyeli, itsi: Bayawudla kudla kwabo baseluvalweni, banatse emanti abo bangasenatsemba, ngobe live labo liyakwemukwa konkhe lelinako ngenca yebudlova babo bonkhe labahlala kulo.

²⁰ Lamadolobha lanebantfu ayawudzilitelwa phansi, nalelive libe lihlane. Ngulapho-ke niyawungati khona kutsi mine nginguSimakadze.’ ”

Saga lesitsandzeka kakhulu kubantfu nelivi lelingatsandzeki kakhulu kubantfu

²¹ Livi laSimakadze lefika kimi, latsi:

²² “Ndvodzana yemuntfu, saga sini lesi leninaso lapha eveni laka-Israyeli, lesitsi: ‘Emalanga ayendlula, yonkhe imibono igucuka ibe lite’?

²³ Khuluma kubo, utsi: ‘Naku lokushiwo yiNkhosi Simakadze, itsi: Ngitasicedza lesaga, bangaphindzi basikhulume lapha ka-Israyeli.’ Khuluma kubo, utsi: ‘Emalanga asasondzele lapho yonkhe imibono iyawugcwaliseka.

²⁴ “ ‘Ngobe sekuyawubate imibono yemanga nekubhula lokutsandzekako emkhatsini wesive saka-Israyeli.

²⁵ Kodvwa mine, Simakadze, ngiyawukhuluma loko lengikutsandzako, futsi kuyagcwaliseka ngaphandle kwekulibala. Ngobe ngemalanga enu, ninendlu lehlubukako, ngiyawukufeza konkhe lengikukhulumile, kusho iNkhosi Simakadze.’ ”

²⁶ Livi laSimakadze lefika kimi, latsi:

²⁷ “Ndvodzana yemuntfu, indlu yaka-Israyeli itsi: ‘Lombono lawubonako ngeweminyaka leminyenti kusukela nyalo, futsi uphrofetha ngetintfo letiyakwenteka kadzeni.’

²⁸ “Ngako-ke khuluma kubo, utsi: ‘Naku lokushiwo yiNkhosi Simakadze, itsi: Kute nalinye lemavi ami leliyawulibala, konkhe lengikushoko kuyawugcwaliseka, kusho iNkhosi Simakadze.’ ”