Hezekeli 11 - Siswati 1996 Bible

Kwehlulelwa kwebaholi baka-Israyeli

¹ Moya wangiphakamisa wangiyisa esangweni lendlu yaSimakadze lelalibheke ngasemphumalanga. Ekungeneni kwalelisango bekunemadvodza langema-25, emkhatsini wawo ngabona naJazaniya, umsa wa-Azuri, naPhelatiya, umsa waBhenaya, lekwakubaholi besive.

² Simakadze wakhuluma kimi, watsi: “Ndvodzana yemuntfu, laba bantfu labakha luzungu lwebubi baphindze beluleke ngalokubi kulelidolobha.

³ Batsi: ‘Kungeke yini kusheshe kube sikhatsi sekwakha tindlu? Lelidolobha lilibhodo lekupheka, tsine-ke siyinyama.’

⁴ Ngako-ke, phrofetha umelane nabo; phrofetha, ndvodzana yemuntfu.”

⁵ Ngako Moya waSimakadze wehlela etikwami, wangitjela kutsi angitsi: “Naku lokushiwo nguSimakadze, utsi: Loku nguloku lenikushoko ninendlu yaka-Israyeli, kodvwa ngiyakwati loko lokusetingcondvweni tenu.

⁶ Nibulele bantfu labanyenti kulelidolobha, titaladi talo natigcwalisa ngetidvumbu.

⁷ “Ngako-ke naku lokushiwo yiNkhosi Simakadze, itsi: Letidvumbu talabo lenibabulele lapho tiyinyama, lelidolobha lona lilibhodo, kodvwa ngitanikhipha kulo.

⁸ Niyayesaba inkemba; ngiyakunehlisela inkemba, kusho iNkhosi Simakadze.

⁹ Ngitanikhipha kulelidolobha, ngininiketele etandleni tebetive nginijezise.

¹⁰ Nitawubulawa ngenkemba, bese ngehlisela sigwebo kini ngaseminyeleni yaka-Israyeli. Ngulapho-ke niyawungati khona kutsi mine nginguSimakadze.

¹¹ Lelidolobha lingeke libe libhodo kini, nani futsi ningeke nibe yinyama lekulo, ngiyakwehlisela sigwebo kini ngaseminyeleni yaka-Israyeli.

¹² Ngulapho-ke niyawungati khona kutsi mine nginguSimakadze, ngobe anikatilandzeli timiso tami, nemitsetfo yami anikayigcini, kodvwa nisuke nalingisa letive letinitungeletile.”

¹³ Ngatsi ngisaphrofetha, Phelatiya, umsa waBhenaya, wafa. Ngawa ngebuso bami bubheke phansi, ngakhala kakhulu, ngatsi: “Hhawu, Nkhosi, Simakadze! Lensali yaka-Israyeli utayibhubhisa yonkhe yini?”

Setsembiso sekubuyiselwa kwa-Israyeli

¹⁴ Livi laSimakadze lefika kimi, latsi:

¹⁵ “Ndvodzana yemuntfu, bomnakenu, yebo, bomnakenu lekutihlobo takho tengati kanye nayo yonkhe indlu yaka-Israyeli, ngulabo bantfu baseJerusalema labakhulume ngabo, batsi: ‘Labatfunjiwe bakhashane kakhulu naSimakadze, lelive selinikwe tsine kutsi libe lifa letfu.’

¹⁶ “Ngako-ke tsani: ‘Naku lokushiwo yiNkhosi Simakadze, itsi: Nome ngibatfumele khashane emkhatsini wetive, ngabasakatela emaveni, noko kwesikhashana bengiyindzawo yabo lengcwele kulawo mave lapho bebakhona khona.’

¹⁷ “Ngako-ke tsani: ‘Naku lokushiwo yiNkhosi Simakadze, itsi: Ngitanibutsa kuto tonkhe tive nginibuyise, nisuke kuwo onkhe lawo mave lebenginisakatele kuwo, ngiyawuphindze futsi ngininike lelive laka-Israyeli.’

¹⁸ “Bayawubuyela kulo, besuse tonkhe letitfombe talo letimbi kanye netithico letinengekako.

¹⁹ Ngiyawubanika inhlitiyo yinye, ngifake umoya lomusha ekhatsi kubo; ngiyakuyisusa kubo inhlitiyo yabo yelitje, ngibanike inhlitiyo yenyama.

²⁰ Bayawube sebalandzela timiso tami, banakekele kugcina imitsetfo yami. Bayawuba bantfu bami, mine ngibe nguNkulunkulu wabo.

²¹ Kodvwa-ke labo labanetinhlitiyo letitinikele etitfombeni letingemanyala nakuto tithico letinengekako, ngiyakwehlisela etikwetinhloko tabo loko labakwentile, kusho iNkhosi Simakadze.”

Kusuka kwenkhatimulo yaNkulunkulu eJerusalema

²² Kwabe sekutsi emakherubhi labenemasondvo emihlubulweni yawo, endlala timphiko tawo, inkhatimulo yaSimakadze wema-Israyeli yayisetikwawo.

²³ Inkhatimulo yaSimakadze yakhuphukela etulu isuka ngekhatsi kwalelidolobha, yema ngetulu kwentsaba lengasemphumalanga kwalo.

²⁴ Moya wangiphakamisa wangimikisa kulabo labebatfunjelwe eBhabhulona ngisembonweni lengangiwunikwe nguMoya waNkulunkulu. Lombono lengangiwubonile wenyuka wesuka kimi,

²⁵ ngabe sengitjela lababetfunjiwe konkhe loko Simakadze labengikhombise kona.