Hezekeli 10 - Siswati 1996 Bible

Kusuka kwenkhatimulo yaSimakadze ethempelini

¹ Ngabuka, ngabona lokwakufanana nesihlalo sebukhosi sesafire kusetikwemkhatsi lowawungetulu kwetinhloko temakherubhi.

² Simakadze wakhuluma kulendvodza leyayigcoke telineni, watsi: “Ngena lapha emkhatsini wemasondvo ngaphansi kwemakherubhi. Gcwalisa tandla takho ngemalahle lavutsako lasemkhatsini wemakherubhi, bese uwasakata etikwalelidolobha.” Ngatsi ngisabukile, yangena.

³ Emakherubhi-ke wona abeme ngaseningizimu nelithempeli ngesikhatsi lendvodza ingena, lifu lasibekela sibuya lesisekhatsi nendzawo.

⁴ Inkhatimulo yaSimakadze yase iyesuka etikwemakherubhi, yehlela emnyango welithempeli. Lifu lagcwalisa lithempeli, nesibuya sagcwaliswa bukhatikhati benkhatimulo yaSimakadze.

⁵ Umsindvo wetimphiko temakherubhi wawungevakala khashane, ngisho nasesibuyeni sangephandle, njengelivi laNkulunkulu Somandla, nakakhulumako.

⁶ Kwatsi Simakadze nakatjela lendvodza yetelineni, atsi: “Tsatsa umlilo lapha emkhatsini wemasondvo lasemkhatsini wemakherubhi,” lendvodza yangena yema eceleni kwelisondvo.

⁷ Lelinye lemakherubhi lelulela sandla salo kulomlilo lowawusemkhatsini wawo. Lahlaphuta lomunye wawo, lawubeka etandleni talendvodza yetelineni, leyawutsatsa yaphumela nawo ngephandle.

⁸ Ngaphansi kwemaphiko emakherubhi kwakubonakala intfo leyayifanana netandla temuntfu.

⁹ Ngabuka, ngabona eceleni kwemakherubhi emasondvo lamane, lilinye licondzene nalinye lemakherubhi; lamasondvo abecwebetela njengekhrisolithe.

¹⁰ Macondzana nekubukeka kwawo, abefanana omane, lilinye lalifanana nelisondvo leligabance kulelinye lisondvo.

¹¹ Njengobe abehamba nje, abengahamba acondze kunome ngukuyiphi indzawo kuleti letine, lapho lamakherubhi abheke ngakhona; lamasondvo abengagucuki nakuhamba lamakherubhi. Lamakherubhi abebheka nome ngukuphi lapho kubheke ngakhona leli leliyinhloko, ngaphandle kwekugucuka nakahamba.

¹² Wonkhe umtimba wawo, ngisho nemihlane yawo kanye netandla tawo, netimphiko tawo tatigcwele emehlo yonkhe indzawo, futsi nawo lamasondvo awo lamane abegcwele emehlo.

¹³ Ngeva lamasondvo abitwa ngekutsi “ngemasondvo lashulunganako.”

¹⁴ Lilinye lalamakherubhi lalinebuso lobune: Bekucala buso kwakubuso belikherubhi, besibili kubuso bemuntfu, besitsatfu kubuso belibhubesi, besine kubuso belusweti.

¹⁵ Lamakherubhi ase ayaphakama. Loko-ke bekutidalwa letiphilako lengangitibone ngasemfuleni iKhebari.

¹⁶ Kwakutsi lamakherubhi nakanyakata ahamba, nalamasondvo lasemihlubulweni yawo ahambe, kutsi lamakherubhi nakavula timphiko tawo afuna kundiza, esuke emhlabatsini, lamasondvo angete esuka lapha emihlubulweni yawo.

¹⁷ Kwakutsi lamakherubhi nakemile, nalamasondvo eme, lamakherubhi nakaphakama nawo aphakame kanye nawo, ngobe lomoya waletidalwa letiphilako wawukuwo lamasondvo.

¹⁸ Inkhatimulo yaSimakadze yase iyesuka kulomnyango welithempeli, yaya yayakuma ngetulu kwalamakherubhi.

¹⁹ Ngatsi ngisabukile, emakherubhi ase avula timphiko tawo, esuka lapha emhlabatsini, atsi asaphakama, nalamasondvo aphakama kanye nawo. Efika ema emnyango welisango langasemphumalanga lelithempeli laSimakadze, nenkhatimulo yaNkulunkulu wesive sema-Israyeli yayisetikwawo.

²⁰ Loko-ke bekutidalwa letiphilako lengatibona ngaphansi kwaloNkulunkulu wema-Israyeli, ngasemfuleni iKhebari, ngase ngiyabona kutsi kwakungemakherubhi.

²¹ Lilinye lalinebuso lobune, netimphiko letine, nangaphansi kwetimphiko tawo kwakunentfo leyayifanana netandla temuntfu.

²² Buso bawo babufanana nebalawa lengangiwabone ngasemfuleni iKhebari. Ngulelo nalelo lahamba lacondza embili.