Hezekeli 1 - Siswati 1996 Bible

Hezekeli wembulelwa Nkulunkulu kwekucala Sihlalo sebukhosi saNkulunkulu

¹ Ngemnyaka wema-30, enyangeni yesine, ngelilanga lesihlanu, ngangisesemkhatsini walababetfunjiwe, ngasemfuleni iKhebari, kwavuleka emazulu, ngabona imibono yaNkulunkulu.

² Kwatsi mhlazana tisihlanu enyangeni, ngemnyaka wesihlanu inkhosi Jehoyakhini yatfunjwa,

³ kwefika livi laSimakadze kumphristi Hezekeli, umsa waBuzi, ngasemfuleni iKhebari eveni lemaBhabhulona. Ngulapho-ke lapho sandla saSimakadze sasisetikwakhe khona.

⁴ Ngabuka, ngabona sivunguvungu sichamuka ngasenyakatfo, bekulifu lelikhulukati linebumanyamanya bembane, lalitungeletwe kukhanya lokumengetelako. Ekhatsi enkhabeni yalomlilo kwakukhona lokwakufanana nelitfusi lelimanyatelako,

⁵ ekhatsi kulowo mlilo kukhona lokwakufanana netidalwa letine letiphilako. Tatibonakala tinesimo semuntfu,

⁶ kodvwa nguleso naleso sasinebuso lobune netimphiko letine.

⁷ Tatinemilente lecondzile; tinyawo tato tatifanana netelitfole timanyatela njengelitfusi lelilolongiwe.

⁸ Ngaphansi kwetimphiko tato kulemihlubulo yato lemine tatinetandla temuntfu. Totine tatinebuso netimphiko,

⁹ letimphiko tato tatitsintsana. Nguleso naleso sidalwa sasihamba sicondze embili; tatingagucuki ngesikhatsi natihamba.

¹⁰ Buso bato babubukeka kanje: Nguleso naleso kuletidalwa letine sasinebuso bemuntfu, ngesekudla kwaso sinebuso belibhubesi, ngesancele sinebuso benkhomo, ngemuva sinebuso belusweti.

¹¹ Babunjalo-ke buso bato. Timphiko tato tatendlalekele etulu; sisinye sasinetimphiko letinye letimbili, lunye luphiko lutsintsana neluphiko lwalesinye sidalwa ngala nangale, bese kutsi leti letinye timphiko letimbili tembese umtimba waso.

¹² Nguleso naleso sasihamba sicondze embili. Njalo nje lapho kuya khona Moya, nato tatiya khona; tatingagucuki ekuhambeni kwato.

¹³ Simo saletidalwa letiphilako sasifanana nemalahle lavutsako emlilo nome tinjengetidlwane. Umlilo wawehla wenyuka lapha emkhatsini waletidalwa. Lomlilo wawumanyatela, kuphuma umbane kuwo.

¹⁴ Letidalwa tatigijima tiye emuva nasembili, njengekubaneka kwembane.

¹⁵ Ngatsi ngisabuka kuletidalwa letiphilako, ngabona lisondvo emhlabatsini emhlubulweni waleso naleso sidalwa lesinebuso lobune.

¹⁶ Kubonakala nekwakhiwa kwalamasondvo kwakume kanje: Abemanyatela njengekhrisolithe, onkhe omane abefanana. Ngulelo nalelo sondvo lalibukeka lakheke njengelisondvo leligabance kulelinye lisondvo.

¹⁷ Njengobe abehamba nje abengahamba acondze kunome nguyiphi indzawo kuleti letine, lapho letidalwa tatibheke ngakhona; lamasondvo abengagucuki, nakuhamba letidalwa.

¹⁸ Emarimu alamasondvo abephakeme esabeka, omane abegcwele emehlo yonkhe indzawo.

¹⁹ Kwakutsi letidalwa letiphilako natihamba, nalamasondvo lasemihlubulweni yato ahambe; tatitsi natiphakama emhlabatsini letidalwa letiphilako, nalamasondvo nawo aphakame.

²⁰ Nome ngukuphi lapho Moya abengaya khona naletidalwa tatiya khona, nalamasondvo abeyaye aphakame kanye nato, ngobe lomoya waletidalwa letiphilako wawukulamasondvo.

²¹ Tatitsi natihamba letidalwa, nawo ahambe; natima letidalwa, nalamasondvo eme, atsi dvu; titsi letidalwa natiphakama emhlabatsini, nalamasondvo aphakame kanye nato, ngobe umoya waletidalwa letiphilako wawukulamasondvo.

²² Lokwakwendlaleke ngetulu kwetinhloko taletidalwa kwakuyintfo leyayifanana nemkhatsi, kucwebetela njengangcocwane, futsi kwesabeka.

²³ Ngaphansi kwalomkhatsi timphiko tato tatendlalekele kuyawutsintsana todvwana, nguleso naleso sasinetimphiko letimbili letatembese umtimba waso.

²⁴ Tatitsi natihamba letidalwa, ngive umsindvo wetimphiko tato unjengekudvuma kwemanti lagijimako, nanjengeliphimbo laSomandla, nanjengemdvumo wemphi. Tatitsi natima, tehlise timphiko tato.

²⁵ Kwase kufika livi liphuma ngetulu kwalomkhatsi lowawusetikwetinhloko tato, ngesikhatsi tima, timphiko tato setehlile.

²⁶ Ngetulu kwalomkhatsi lowawusetikwetinhloko tato bekunentfo leyayifanana nesihlalo sebukhosi lesakhiwe ngesafire, ngetulu kwalesihlalo sebukhosi kwakunentfo leyayinesimo lesasifanana nesemuntfu.

²⁷ Ngabona kutsi kusukela kuloko lokwakubonakala shangatsi kulukhalo lwakhe kuya ngenhla kwalo abefanana nelitfusi lelimanyatelako, kube shangatsi ligcwele umlilo, bese kutsi kusuka elukhalweni kuye phansi abefanana nemlilo. Abetungeletwe kukhanya lokumanyatelako.

²⁸ Lokukhanya kwakumtungeletile njengemushi wenkosazana ubonakala emafini, ngelilanga lekuna kwemvula. Loku bekukubonakala lokwakubonakalisa bukhosi baSimakadze. Ngatsi kube ngikubone konkhe loku, ngawa ngibhekise buso bami phansi, ngase ngiva livi lalokhulumako.