Hagayi 1 - Siswati 1996 Bible

Umlayeto waSimakadze ngekwakhiwa kabusha kwelithempeli

¹ Ngemnyaka wesibili wekubusa kwenkhosi Dariyusi ngelilanga lekucala lenyanga yesitfupha, livi laSimakadze lefika ngaHagayi, umphrofethi, kuZerubhabheli, umsa waSheyaltiyeli, umbusi wakaJuda, nakuJeshuwa, umsa waJehosadaki, umPhristi Lomkhulu, latsi:

² “Naku lokushiwo nguSimakadze longuSomandla, utsi: Labantfu batsi: ‘Sikhatsi asikefiki sekutsi kwakhiwe kabusha indlu yaSimakadze.’ ”

³ Livi laSimakadze lase liyefika ngemphrofethi Hagayi, latsi:

⁴ “Ngabe kambe ngiso yini lesi sikhatsi sekutsi nihlale etindlini letihlotjiswe kahle kakhulu, kube kantsi indlu yaSimakadze yona ibukeka itindzala nje?”

⁵ Manje-ke, naku lokushiwo nguSimakadze longuSomandla, utsi: “Cabangisisani ngetindlela tenu.

⁶ Nihlanyele kakhulu, navuna kuncane. Niyadla, anesutsi; niyanatsa, kodvwa anikholwa. Niyembatsa, kodvwa anifutfumali. Niyahola imali yenu, niyifake esipatjini lesinetimbobo.”

⁷ Naku lokushiwo nguSimakadze longuSomandla, utsi: “Cabangisisani ngetindlela tenu.

⁸ Khuphukelani etintsabeni niyewugawula khona tingodvo nitekwakha lendlu, kuze nami ngitewutijabulisa kuyo, ngidvunyiswe,” kusho Simakadze.

⁹ “Benilindzele sivuno lesikhulu, kodvwa navuna kuncane. Loko lenikubuyise ekhaya ngikuphuphutsile, kwahamba. Leni?” kusho Simakadze longuSomandla. “Ngenca yendlu yami lesolomane ihleti itindzala, ngalesikhatsi lapho kungulowo nalowo wenu aphishaneke ngeyakhe indlu.

¹⁰ Ngako-ke ngenca yenu emazulu ayigodlile imvula, nemhlaba wagodla sivuno sawo.

¹¹ Ngehlisela somiso emasimini, nasetintsabeni, nasetikwalokutinhlavu, nakulo liwayini lelisha, nakuwo emafutsa, nakuko konkhe lokuvetwa ngumhlaba, etikwebantfu nemihlambi, nasetikwemisebenti yonkhe yetandla tenu.”

Bantfu balalela umlayeto waSimakadze

¹² Ngako-ke boZerubhabheli, umsa waSheyaltiyeli, naJeshuwa, umsa waJehosadaki, umPhristi Lomkhulu, nayo yonkhe insali yesive yalilalela livi laSimakadze Nkulunkulu wabo nemavi emphrofethi Hagayi, ngobe Simakadze longuNkulunkulu wabo abemtfumile. Bantfu base badvumisa Simakadze.

¹³ Hagayi, sitfunywa saSimakadze, wetfula nasi simemetelo saSimakadze kubantfu, watsi: “Nginani, kusho Simakadze.”

¹⁴ Ngako Simakadze wavuselela umoya waZerubhabheli, umsa waSheyaltiyeli, umbusi wakaJuda, nemoya waJeshuwa, umsa waJehosadaki, umPhristi Lomkhulu, nemoya wayo yonkhe insali yesive. Beta bafike bacala kusebenta, bakha indlu yaSimakadze longuSomandla Nkulunkulu wabo,

¹⁵ ngelilanga lema-24 lenyanga yesitfupha ngemnyaka wesibili wekubusa kwenkhosi Dariyusi.