Habakhuki 3 - Siswati 1996 Bible

Umthandazo waHabakhuki

¹ Umthandazo waHabakhuki, umphrofethi, ngeShigiyonothi.

² Awu Simakadze, ngivile ngeludvumo lwakho; ngimangaliswa tento takho, wena Simakadze. Phindza utivusetele nangalamalanga etfu, tente tatiwe nangaletikhatsi tetfu. Elulakeni lwakho khumbula umusa.

³ Nkulunkulu uchamuka eThemani, Longcwele wesuka eNtsabeni iPharani. Cabanga. Inkhatimulo yakhe isibekela emazulu, ludvumo lwakhe lugcwalisa umhlaba.

⁴ Kucwebetela kwakhe kunjengekuphuma kwelilanga; kubaneka imisebe etandleni takhe, lapho kufihlakele khona emandla akhe.

⁵ Sishayo sihamba embikwakhe, mashayacotfule wesifo ulandzela etinyatselweni takhe.

⁶ Nakema, kunyikanyika umhlaba, nakabuka, kutfutfumela tive. Tintsaba takudzala tiyahhihlika, nemagcuma akadzenidzeni ayagocana. Tindlela takhe taphakadze naphakadze.

⁷ Ngabona emathende aseKushani aselusizini, nemakhaya akaMidiyani ayatfutfumela.

⁸ Awu, Simakadze, kungabe bewuyitfukutselele yini imifula? Kungabe lulaka lwakho belumelene nemifudlana yini? Walutfukutselela yini lwandle ngesikhatsi ugibele emahhashi akho, netincola takho tekuncoba?

⁹ Wagwabula butjoki bakho, wabita imicibisholo leminyenti. Cabanga. Wadzabula umhlaba ngemifula,

¹⁰ tintsaba takubona tatfutfumela. Kwendlula tikhukhula temanti, kujula kwabhodla, kwaphakamisela emagagasi ako etulu.

¹¹ Lilanga nenyanga kwema emazulwini ngekumanyatela kwemicibisholo yakho legijimako nangekubaneka kwekumanyatela kwesikhali sakho.

¹² Ngelulaka wahambahamba wadzabula umhlaba, ngentfukutselo wagcobagcoba tive.

¹³ Waphumela kutawukhulula bantfu bakho, nekutawusindzisa logcotjiwe wakho. Wambhubhisa umholi waseveni lalababi, wabahlubula kusukela etinweleni tenhloko kuye etintwaneni tetinyawo. Cabanga.

¹⁴ Wamhlaba ngesakhe sikhali enhloko, ngesikhatsi emabutfo akhe aphutfuma aphuma atsi atesihlakata, asivutela tince shangatsi asatawudla labamphofu lababebhacile.

¹⁵ Wagcobagcoba lwandle ngetinselo temahhashi akho, abhodla emanti lamakhulu.

¹⁶ Ngeva, nenhlitiyo yami yabhakuta, netindzebe temlomo wami tavevetela ngalomsindvo, kubola kwakhasabela ematsanjeni ami, imilente yami yachachatela. Noko ngiyakulilindzela ngekubeketela lilanga lesehlakalo leliyawusifikela sive lesisihlasele.

¹⁷ Nome sihlahla semkhiwa singahlumi, nemagelebisi kute esihlahleni semvini, nome umncumo ungatseli, nemasimi angasatitseli tivuno, nome sekute timvu esibayeni, netinkhomo sekute esibayeni,

¹⁸ noko ngitawujabula ngaSimakadze, ngijabulele Nkulunkulu, uMsindzisi wami.

¹⁹ Simakadze loyiNkhosi ungemandla ami; wenta tinyawo tami tibe njengetenyamatane, ungenta ngihambe ngiphephile etindzaweni letiphakeme. Lemhlabelisi wetemiculo. Elugujini lwami lolunetintsambo.