Habakhuki 2 - Siswati 1996 Bible

Imphendvulo yaNkulunkulu kuHabakhuki

¹ Ngitawuma embonisweni yami ngibuke, ngitimise kahle etingosini tami, ngitawubukisisa kahle ngitewubona kutsi Nkulunkulu utawutsini kimi, nekutsi ngitawuphendvula ngitsini ngalokukhonona.

² Simakadze wase uyaphendvula, watsi: “Bhala phansi lesembulo, usibhale sicace kuletibhelekeca, kuze kutsi kufundzeke kahle.

³ Ngobe lesembulo silindzele sikhatsi lesimisiwe; sikhuluma ngesiphetfo lesiphutfumako, futsi ngeke sibonakale singemanga. Nome sephutisa nje, silindzele, sona sitawufika nome kanjani, futsi ngeke sephute.

⁴ “Nasi sembulo: Lotiphakamisako angeke aphephe, kodvwa lolungile uyawuphila ngekukholwa kwakhe.”

Imbhubhiso yalabakhohlakele

⁵ Yebo, liwayini liyamyenga, ungumuntfu lotigcabhako, futsi akasenakuphumula. Njengobe ungugubhela kusakhe njengelidliza nanjengekufa akaze eneliseke, utibutsela kuye tonkhe tive, atfumbe bonkhe bantfu, babe bakhe.

⁶ “Abayikumchukuluta bonkhe yini ngemagama ekumeya, bahlekise ngaye batsi: ‘Maye kulowo lompongisa timphahla letebiwe, atinjingise ngekweba! Loku kutawuchubeka kuze kube ngunini?’

⁷ Labo lobakweledako abayiwuvuka masinyane yini? Abayiwuvuka bakwesabise yini? Lapho-ke uyawuba yimphango yabo.

⁸ Njengobe uphange tive letinyenti, letive letisele tiyawukuphanga nawe. Ngobe ucitse ingati yebantfu, wabhubhisa emave nemadolobha kanye nabo bonkhe labebahlala kuwo.

⁹ “Maye kulowo lowakha likhaya lakhe ngenzuzo lengakalungi, atakhele sidleke sakhe etulu ekuphakameni, kuze atewuphunyula etidladleni tembhubhiso.

¹⁰ Wakhe luzungu lwekubhubhisa tive letinyenti, wahlazisa indlu yakho; walahlekelwa nakuphila kwakho.

¹¹ Ematje elubondza ayawukhala ngetento takho, nemishayo yeluphahla iyawuklaza ivumelane nawo.

¹² “Maye kulowo lowakha lidolobha ngekucitsa ingati, emise lidolobha ngebugebengu!

¹³ Kungabe kambe Simakadze longuSomandla akakumisi yini engcondvweni yakhe kutsi kushikashikeka kwebantfu kungemafutsa nje ekubhebhetela umlilo, nekutsi tive tishikashikeke, titikhandlekele lite?

¹⁴ Ngobe umhlaba uyawugcwala kwati bukhosi baSimakadze, njengaloku emanti asibekela lwandle.

¹⁵ “Maye kulowo muntfu lonatsisa bomakhelwane bakhe tjwala, abutfululele kuso sikhumbasikhwama, banatse baze badzakwe, entele kutsi atewubukela imitimba yabo nase bangcunu.

¹⁶ Wena uyawudliwa ngemahloni esikhundleni sekudvunyiswa. Manje-ke selitfuba lakakho! Natsa nawe, ungcunuleke! Lendzebe lesuka esandleni saSimakadze sangasekudla seyijikela ngakuwe, nelihlazo liyawumbonya ludvumo lwakho.

¹⁷ Lobudlova lobente kuyo iLebanoni buyawukwehlula, nekubhubhisa kwakho tilwane kuyawukwesabisa. Ngobe ucitse ingati yebantfu, wabhubhisa emave nemadolobha kanye nabo bonkhe labebahlala kuwo.

¹⁸ “Sinamsebenti muni sithico, njengaloku sibatwe ngumuntfu nje? Yebo, sisitani sitfombe lesifundzisa emanga? Ngobe lowo losibatako wetsembela emsebentini wetandla takhe, wakha tithico letingeke tize tikhulume.

¹⁹ Nako kulowo muntfu losho esigodvweni atsi: ‘Phila!’ nome etjeni lelingenamphilo atsi: ‘Vuka!’ Lingasinika yini seluleko? Lembeswe ngegolide nangesiliva, kute umphefumulo kulo.

²⁰ “Kodvwa Simakadze usethempelini lakhe lelingcwele. Umhlaba wonkhe awuthule embikwakhe.”