Habakhuki 1 - Siswati 1996 Bible

¹ Leli livi lelembulelwa Habakhuki, umphrofethi.

Kukhonona kwaHabakhuki

² Awu, Simakadze, kuyawudzimate kube ngunini solo ngikhala ngicela lusito, kodvwa wena solomane ungalaleli? Kuyawudzimate kube ngunini ngimemeta ngikhala kuwe ngitsi: “Budlwangudlwangu!” kodvwa wena ungasindzisi?

³ Wentelani kutsi ngibone bubi lobungaka? Ukubeketelelani kuhlushwa kwalabacindzetelekile? Imbhubhiso nebudlwangudlwangu busembikwami njalo; kukhona kulwa nekubanga lokunyenti.

⁴ Ngako-ke umtsetfo sewuchwale waze waba butsakatsaka, akusehlulelwa ngebucotfo. Lababi behlula labalungile, kuze kutsi bucotfo bemtsetfo buphanjukiswe.

Imphendvulo yaNkulunkulu

⁵ “Bukani tive letinye, nicaphelisise, nimangale nife. Ngobe ngitakwenta intfo emalangeni enu, intfo leningasoze nayikholwa, nome beningatjelwa.

⁶ Ngobe bukani-ke, ngivusa baseBhabhulona, leso sive lesingenamusa, nalesiphulukundlelako, lesidzabula wonkhe umhlaba sitewuphanga tindzawo tekuhlala letingasito taso.

⁷ Basive lesesatjwako nalesitfutfunyelelwako, bona bangumtsetfo wabo cobo lwabo, batibabatela bona ludvumo lwabo.

⁸ “Emahhashi abo agijima kwendlula tingwe, esabeka kwendlula timphisi ebusuku. Emasotja abo lagibela emahhashi agijima ashiye inyosi. Bagibeli babo bemahhashi bachamuka khashane. Bandiza njengelusweti naluhlwitsa kudla.

⁹ “Bonkhe beta basahlose kulwa nekubhubhisa. Emabutfo abo agijima ashulungane njengemoya waselugwadvule, abutse batfunjwa njengesihlabatsi.

¹⁰ BaseBhabhulona basive lesiphukuta emakhosi, sihlekise ngebabusi. Siwahleka onkhe emadolobha latinqaba; sakha lutsango lwemhlabatsi lwekuvimbetela, siwahlasele siwadle.

¹¹ Bese sishulungana sendlulele embili njengemoya, emadvodza lanemacala, lamandla awo angunkulunkulu wawo.”

Kukhonona kwaHabakhuki kwesibili

¹² Awu, Simakadze, awusiye yini wena wasendvulo? Nkulunkulu wami, wena Longcwele wami, singeke sife. Awu, Simakadze, ubeke bona baseBhabhulona kutsi behlisele kitsi sijeziso. Awu, dvwala letfu, umise bona kutsi batewusishaya.

¹³ Emehlo akho ahlanteke kakhulu kutsi angabuka bubi; ungeke ukubeketelele kuhlushwa kwalabacindzetelwe. Manje-ke ubabeketelelani laba labambulutako? Ubindzeleni ngesikhatsi lababi bamita labo labalunge kwengca bona?

¹⁴ Bantfu ubaphatselani njengetinhlanti taselwandle, babe njengetilwanyakatana letinwabutelako letingenambusi?

¹⁵ BaseBhabhulona babadvonsa bonkhe ngemadweba, bababamba ngemanetha abo, bababutsele ndzawonye, enetheni labo lekuhudvula; bajabula ngaloko, futsi batsakasa.

¹⁶ Ngako-ke benta umhlatjelo emanetheni abo ekuhudvula, bashisele imphepho emanetheni abo ekuhudvula, ngobe ngalamanetha abo badla ngaloludzala, batijabulise ngekudla kudla lokukhetsekile.

¹⁷ Kungabe batawuchubeka yini, batfulule emanetha abo, babhubhise tive ngelunya?