Genesisi 8 - Siswati 1996 Bible

Kuphela kwazamcolo

¹ Nkulunkulu wamkhumbula Nowa, netilwane tonkhe, kanye nato tonkhe tifuyo labenato emkhunjini. Nkulunkulu waletsa umoya waphuphutsa etikwemhlaba, emanti etja.

² Tiyalu temhlaba tavaleka, emafasitelo elizulu avaleka, imvula yahhamuka.

³ Emanti aya ngekuya etja emhlabeni. Emvakwemalanga lali-150 emanti ancipha.

⁴ Ngelilanga leli-17, enyangeni yesikhombisa umkhumbi watinta etikwetintsaba tase-Ararathi.

⁵ Emanti achubeka nekwetja, kwadzimate kwatsi ngelilanga lekucala enyangeni yelishumi, tihloko tetintsaba tavela tabonakala.

⁶ Ekupheleni kwemalanga langema-40 Nowa walivula lelifasitelo labelakhile.

⁷ Watfumela lihubhulu, kodvwa alizange libuye, lazulazula kwaze kwasha emanti emhlabeni.

⁸ Wase utfumela lituba kutsi liyewuhlola kutsi emanti asanciphile yini emhlabatsini.

⁹ Kepha lituba lehluleka kutfola indzawo, ngisho neyekubeka lunyawo lwalo, lancandzeka labuyela kuye emkhunjini, ngobe emanti abesemanyenti emhlabeni wonkhe. Ngako welula sandla sakhe walitsatsa, walingenisa emkhunjini kuye.

¹⁰ Walindza emalanga lasikhombisa, waphindze watfumela lituba walikhipha emkhunjini.

¹¹ Lituba lancandzeka lefika kuye kusihlwa liphetse licembe lesihlahla semncumo lelalisandza kukhiwa. Ngako Nowa wati kutsi emanti asetjile emhlabeni.

¹² Waphindze walindza emalanga lasikhombisa, wase utfuma lituba futsi; alizange liphindze libuye.

¹³ Ngemnyaka wakhe wema-601, mhlazana lulunye enyangeni yekucala emanti abesashile emhlabeni. Nowa walususa luphahla lwemkhumbi, wahlola, wabona umhlabatsi sewomile.

¹⁴ Mhlazana tingema-27 enyangeni yesibili umhlaba wase womile.

¹⁵ Nkulunkulu wakhuluma kuNowa, watsi:

¹⁶ “Phuma emkhunjini wena, nemkakho, nemadvodzana akho, nebafati bemadvodzana akho.

¹⁷ Phuma kanye nato tonkhe tilwane letiphilako letinawe tayo yonkhe inhlobo: tinyoni, netifuyo, nato tonkhe tilwane letihamba ngesisu, khona titekwandza emhlabeni titalane tigcwalise umhlaba.”

¹⁸ Ngako-ke Nowa waphuma nemkakhe, nemadvodzana akhe, nebafati bemadvodzana akhe.

¹⁹ Tonkhe tilwane, ngisho naletihamba ngesisu, nato tonkhe tinyoni, konkhe lokuhamba emhlabatsini kwaphuma ngetinhlobo tako emkhunjini.

Umnikelo waNowa nesetsembiso saNkulunkulu

²⁰ Nowa wakhela Nkulunkulu lilati, watsatsa kuto tonkhe tifuyo letihlambulukile nakuto tonkhe tinyoni letihlambulukile, wanikela kuNkulunkulu umnikelo wekushiswa elatini.

²¹ Nkulunkulu waliva leliphunga lelinuka lusi lolumnandzi, watsi enhlitiyweni yakhe: “Ngingeke ngiphindze ngiwucalekise umhlabatsi ngenca yemuntfu, ngobe imizindlo yenhlitiyo yemuntfu mibi kwasebusheni bakhe. Ngingeke ngiphindze ngikubhubhise konkhe lokuphilako, njengobe ngentile.

²² “Yingci nawusekhona umhlaba, kuhlanyela nekuvuna, kucandza nekushisa, lihlobo nebusika, imini nebusuku kungeke kuncamuke.”