Genesisi 48 - Siswati 1996 Bible

Jakobe ubusisa bo-Efrayimu naManase

¹ Emvakwaloko Josefa wabikelwa kutsi uyise uyagula. Ngako-ke Josefa wesuka watsatsa emadvodzana akhe omabili boManase na-Efrayimu, waya nawo kuyise.

² Wase uyabikelwa Jakobe kwatsiwa: “Indvodzana yakho, Josefa, seyifikile itekuvusela.” Israyeli waticinisa abuyisa emandla akhe, wavuka wahlala ngetibunu embhedzeni.

³ Jakobe wakhuluma kuJosefa watsi: “Nkulunkulu Somandla wabonakala kimi eLuzi, eveni laseKhenani wangibusisa,

⁴ watsi kimi: ‘Lalela la, ngitakwandzisa ngikwente ube tive letinyenti, lelive ngiliphe titukulwane takho emvakwakho. Liyawuba lato phakadze naphakadze.’ ”

⁵ Wachubeka watsi: “Lamadvodzana akho lamabili lowawatalelwa lapha eveni laseGibhithe ngisengakafiki mine, nguwona awami. Efrayimu naManase batawuba bami, njengobe Rubeni naSimeyoni babami.

⁶ Bantfwana lotawubatala emvakwabo batawuba bakho, hhayi bami; lifa labo liyawubitwa ngemagama alaba bomnakabo.

⁷ Loku ngikwenta ngenca yekudzabuka lengaba nako nangifelwa ngunyoko Rakheli, ngisesendleleni ngisuka eMesophothamiya sengitawufika e-Efratha, eveni laseKhenani. Ngamngcwaba e-Efratha.” Manje leyo ndzawo seyibitwa ngekutsi yiBhetlehema.

⁸ Israyeli nakabona emadvodzana aJosefa, wabuta watsi: “Bakabani labafana?”

⁹ Josefa waphendvula uyise watsi: “Ngemadvodzana ami, Nkulunkulu langiphe wona ngisekuleli laseGibhithe.” Israyeli watsi: “Ase uwaletse, khona ngitewabusisa.”

¹⁰ Emehlo a-Israyeli abengasaboni kahle, ngenca yebudzala, abesafifiyela. Ngako Josefa wawasondzeta kuye. Jakobe wawanga, wawagaca ngemikhono.

¹¹ Israyeli wakhuluma kuJosefa watsi: “Ngangingasacabangi kutsi ngiyawuphindze ngibubone buso bakho, kodvwa Nkulunkulu sewungivumele kutsi ngikubone, ngaze ngabona ngisho nebantfwabakho futsi.”

¹² Josefa wase uyawesusa emadvodzana akhe emadvolweni aJakobe, wakhotsama abhekise buso bakhe phansi.

¹³ Josefa wawatsatsa omabili wawabeka emaceleni a-Israyeli: Efrayimu angesancele, Manase ngesekudla.

¹⁴ Kodvwa Israyeli welula sandla sakhe sangesekudla wasibeka etikwa-Efrayimu, nome abengulomncane; sandla sakhe sangesancele waselula wasibeka etikwaManase, labelitubulo.

¹⁵ Jakobe wabe sewubusisa Josefa, watsi: “Shangatsi Nkulunkulu wabobabe, lowakhontwa bo-Abrahama na-Isaka, yena loNkulunkulu longihole kuyo yonkhe imphilo yami, kwaze kwaba ngulamuhla, angababusisa labafana.

¹⁶ Shangatsi lengilosi leyangiphephisa kuto tonkhe tingoti ingababusisa labafana. Shangatsi bangabitwa ngelibito lami, nangelibito labobabe Abrahama na-Isaka. Shangatsi bangandza, babe banyenti emhlabeni.”

¹⁷ Watsi kube Josefa abone kutsi uyise ubeke sandla sakhe sekudla etikwenhloko ya-Efrayimu, wakhubeka. Watsatsa sandla seyise sekudla etikwa-Efrayimu kuze asibeke etikwenhloko yaManase.

¹⁸ Wakhuluma kuyise watsi: “Cha, phela babe, lona nguyena alitubulo, beka sandla sakho sekudla etikwakhe.”

¹⁹ Kodvwa uyise wala, watsi: “Ngiyati, ndvodzana yami, ngiyati. Naye utaba sive, naye futsi utaba mkhulu. Kodvwa nome kunjalo, lona lomncane utawuba mkhulu kunaye, netitukulwane takhe tiyawuba tive letinkhulu.”

²⁰ Wababusisa ngalelo langa atsi: “Ema-Israyeli nakabusisa ayawubita emabito enu atsi: ‘Shangatsi Nkulunkulu angakwenta ufanane nabo-Efrayimu naManase.’ ” Wambeka kanjalo-ke Efrayimu kutsi abe ngetulu kwaManase.

²¹ Israyeli wakhuluma kuJosefa watsi: “Manje sengitawufa, kodvwa Nkulunkulu utawuba nani, aphindze anibuyisele eveni labokhokho benu.

²² Lelicele lentsaba iShekhemu lengalitsatsa ngenkemba yami nangebutjoki bami kuma-Amori, ngengeta ngekulinika wena, hhayi bomnakenu.”