Genesisi 38 - Siswati 1996 Bible

Juda naThamari

¹ Ngaso leso sikhatsi Juda wesuka kubomnakabo wayawuhlala naHira, indvodza yase-Adulamu.

² Asekhona lapho wabonana nentfombi yemKhenani leyayibitwa ngekutsi nguShuwa, wayiteka,

³ yakhulelwa, yatalela Juda indvodzana, wayetsa libito watsi ngu-Era.

⁴ LomkaJuda waphindze wakhulelwa, wamtalela lenye futsi indvodzana, wayetsa libito watsi ngu-Onani.

⁵ Waphindza lenye futsi indvodzana, wayetsa libito watsi nguShela. BoJuda babeseKhesibi ngesikhatsi italwa lendvodzana.

⁶ Juda watsatsela Era, litubulo lakhe, umfati labebitwa ngekutsi nguThamari.

⁷ Kodvwa Era, litubulo laJuda, watiphatsa kabi embikwaSimakadze. Ngako-ke Simakadze wambulala.

⁸ Juda wase utsi ku-Onani, umnakabo-Era: “Ngena lomfelokati wemnakenu, wente lokufanele njengemkhula wakho, utalele umufi bantfwana.”

⁹ Kodvwa Onani, njengobe abati kutsi utabe utalele umnakabo, inhlanyelo yakhe abeyicitsela phansi njalo nje nakalala nalomkhula wakhe.

¹⁰ Simakadze watfukutsela ngaleso sento sa-Onani, ngako naye wambulala.

¹¹ Juda wakhuluma kumalukatana wakhe, Thamari, watsi: “Ncandzeka ubuyele kini, ekhaya leyihlo, uhlale khona ungumfelokati kuze kukhule Shela, indvodzana yami.” Loko abekusho ngobe abesaba kutsi naye angahle afe njengabomnakabo. Ngako-ke Thamari wahamba wabuyela ekhaya kubo, wayawuhlala khona.

¹² Emvakwesikhatsi lesidze umkaJuda, indvodzakati yaShuwa, wafa. Kwatsi kube kuphele sikhatsi sekulila, Juda naHira wase-Adulamu benyuka baya kubagundzi betimvu eThimna.

¹³ Lomunye watjela Thamari watsi: “Uyihlotala uyakhuphuka uya eThimna kuyewugundza timvu takhe.”

¹⁴ Ngako-ke Thamari wakhumula inzilo yakhe, watimbonya ngendvwangu wase uhlala esangweni lase-Enayimu, emgwacweni lophambukela eThimna. Abesati kutsi Shela abesakhulile, kodvwa abesengakanikwa kutsi amteke.

¹⁵ Watsi nakambona Juda, wacabanga kutsi yingwadla, ngobe abetimbonye buso.

¹⁶ Waphambuka waya kuye wafike watsi: “Kota ngitewulala nawe.” Abengati kutsi lowo kwakungumalukatana wakhe. Thamari watsi: “Wena utanginikani nangilala nawe?”

¹⁷ Waphendvula watsi: “Ngitakunika lizinyane lembuti lelisemhlambini wami.” Thamari watsi: “Kulungile-ke, unganginika sibambiso, uze ungitfumelele lelo zinyane.”

¹⁸ Juda wabuta watsi: “Sibambiso sini lengingakunika sona?” Wamphendvula watsi: “Indandatho leneluphawu lwakho, nentsambo yakho, neludvondvolo lwakho lolusesandleni sakho.” Wamnika. Wangena, walala naye; Thamari wakhulelwa.

¹⁹ Wesuka lapho Thamari wahamba, wayisusa leveyili, wembatsa inzilo yakhe yebufelokati.

²⁰ Juda wase utfumela lomngani wakhe Hira wase-Adulamu, kutsi amikise lelizinyane abuye nalesibambiso kulomfati, kodvwa akazange amtfole.

²¹ Wabuta kulamadvodza aleyo ndzawo, watsi: “Iphi lengwadla beyilapha endleleni ngase-Enayimu?” Baphendvula batsi: “Kute ingwadla leke yaba khona lapha.”

²² Wancandzeka wabuyela kuJuda wafike watsi: “Ngehlulekile kuyitfola lengwadla, nemadvodza aleyo ndzawo atsi kute ingwadla leke yaba khona lapho.”

²³ Juda wamphendvula watsi: “Yiyekele itigcine leto tintfo, singaze sibe yinhlekisa kubantfu. Ngetamile kuyitfumelela lelizinyane, kodvwa wena wehlulekile kuyitfola.”

²⁴ Emvakwetinyanga letintsatfu wabikelwa Juda kwatsiwa: “Thamari, malukatana wakakho ugwadlile, manje nje sewutetfwele.” Juda waphendvula watsi: “Mkhipheni, nimshise aze afe.”

²⁵ Kwatsi kube akhishelwe ngaphandle, watfumela livi kuyisetala lelitsi: “Umnikati waletimphahla nguye longitfolise lesisu. Ngiyakucela kutsi utibukisise ubone kutsi tabani letimphahla: indandatho leneluphawu lwakhe, nalentsambo, naloludvondvolo.”

²⁶ Juda watibona letimphahla kutsi takhe wase utsi: “Akanacala lomakoti. Ngimi lengingawufezanga umsebenti wami ngekutsi ngimnike indvodzana yami Shela.” Juda akazange aphindze alale naye futsi.

²⁷ Watsi nasabeleka, kwatfolakala kutsi esiswini sakhe kunemaphahla.

²⁸ Watsi nasabeleka, lelinye lakhipha umkhono, umbelekisi walibamba walibekisa, walegabisa lucotfo lolubovu, wase utsi: “Nali lelitelwe kucala.”

²⁹ Kodvwa lawufinyeta lomkhono walo, kwase kuphuma umnakabo kucala. Lombelekisi wase utsi: “Sewuphuma ngekufohla!” Ngako-ke wametsa libito watsi nguPheresi.

³⁰ Emvakwakhe lomnakabo waphuma seloku agabe lolo lucotfo lolubovu esandleni, wametsa libito watsi nguZera.