Genesisi 26 - Siswati 1996 Bible

Isaka uhlala eGerari

¹ Kwase kwaba khona lenye indlala eveni, kungesiyo lena leyaka yaba khona ngetikhatsi tabo-Abrahama. Isaka-ke wase uyesuka uya eGerari ka-Abimeleki, inkhosi yemaFilisti.

² Simakadze wabonakala ku-Isaka watsi: “Ungehleli eGibhithe. Ubohlala eveni lengitakukhombisa lona.

³ Hlalahlala kulelive, ngitawuba nawe ngikubusise, ngobe onkhe lamave ngitawuwanika wena netitukulwane takho. Ngitasifeza setsembiso sami lengasenta kuyihlo Abrahama.

⁴ Titukulwane takho ngiyawutandzisa tibe ngangetinkhanyeti tesibhakabhaka. Onkhe lamave ngiyakuwanika titukulwane takho. Tive tonkhe temhlaba tiyawubusiswa ngetitukulwane takho,

⁵ njengobe Abrahama wangihlonipha, wagcina imiyalo yami, nemitsetfo yami, netimiso tami.”

⁶ Ngako-ke Isaka wahalala eGerari.

⁷ Kwatsi nakabutwa ngemadvodza aleyo ndzawo ngemfati wakhe, yena watsi ngudzadzewabo. Abengeke avume kutsi ngumkakhe, ngobe abesaba emadvodza aleyo ndzawo kutsi angahle ambulale ngenca yaRebheka. Phela Rebheka abemuhle, abukeka.

⁸ Isaka wahlala sikhatsi lesidze kuleyo ndzawo. Ngalelinye lilanga Abimeleki, inkhosi yemaFilisti, yatsi ihlola ngelifasitelo, yabona Isaka anga Rebheka, umkakhe.

⁹ Ngako-ke Abimeleki wabita Isaka wambuta watsi: “Kantsi vele ngumkakho yini lo! Kepha ukwentelani lokuhambe utsi ngudzadzewenu?” Isaka wamphendvula watsi: “Kungobe bengicabanga ngitsi: ‘Ngingahle ngife ngenca yaRebheka!’ ”

¹⁰ Abimeleki watsi kuye: “Yini-ke lena lose uyente la kitsi? Buka-ke, ngobe lenye indvodza beyingahle ilale naye kalula nje lomkakho; ngaleyo ndlela bewutawube sewusiletsele licala.”

¹¹ Ngako-ke Abimeleki wabayala bonkhe bantfu bakhe watsi: “Lowo lotsintsa lendvodza nome lomkayo utawubulawa.”

Emandla a-Isaka nekuphikisana ngemitfombo

¹² Isaka walima kulelo live, kulowo mnyaka wavuna ngalokuphindvwe kalikhulu, ngobe Simakadze wambusisa,

¹³ waceba, wachubeka wanotsa, waze waba yinjinga lenkhulu.

¹⁴ Abenetimphahla letinyenti, imihlambi yetimvu, netinkhomo, anemuti lomkhulu, netisebenti letinyenti, kangangekutsi emaFilisti adzimate aba nemona ngaye.

¹⁵ Ngako emaFilisti ase atigcibedzela ngemhlaba tonkhe ticobho letatimbiwe tisebenti ta-Abrahama asekhona; phela, Abrahama bekunguyise wa-Isaka.

¹⁶ Abimeleki wakhuluma ku-Isaka, watsi: “Suka, uhambe la eveni letfu; ngobe sewunemandla kakhulu kunatsi.”

¹⁷ Isaka wesuka lapho, wahamba waya eSigodzini saseGerari, lapho afike wahlala khona.

¹⁸ Isaka waphindze watimba ticobho temanti letatimbiwe ngu-Abrahama, uyise asekhona; ngobe phela emaFilisti abetigcibedzela emvakwekufa kwa-Abrahama. Leticobho Isaka watetsa emabito letatetsiwe ngawo nguyise.

¹⁹ Kepha tatsi tisebenti ta-Isaka natimba esigodzini, takhandza sicobho lesasinemanti lamnandzi.

²⁰ Belusi baseGerari bacabana nebelusi ba-Isaka, batsi: “Lamanti ngewetfu!” Ngako lesicobho wasetsa libito watsi yi-Eseki, ngobe baphikisana naye ngaso.

²¹ Bemba lesinye futsi sicobho. Naso baphikisana ngaso futsi, ngako wasetsa watsi yiSitna.

²² Wesuka lapho wayakumba lesinye sicobho, sona-ke abazange baphikisane ngaso, ngako wasetsa watsi yiRehobothi, atsi: “Njengobe Simakadze sewusentele indzawo, sitakwandza sibe tinjinga kulelive.”

Isaka eBherisheba

²³ Isaka wesuka lapho, waya eBherisheba.

²⁴ Simakadze wabonakala kuye ngabona lobo busuku, watsi: “NginguNkulunkulu weyihlo Abrahama; ungesabi, ngobe nginawe, ngiyakukubusisa ngandzise titukulwane takho ngenca yenceku yami Abrahama.”

²⁵ Ngako Isaka wakha lilati lapho, wakhuleka kuSimakadze, wemisa lithende lakhe khona lapho. Tisebenti ta-Isaka tase timba sicobho khona lapho.

Sivumelwane sa-Abimeleki na-Isaka

²⁶ Abimeleki wesuka eGerari, waya ku-Isaka ahamba na-Ahuzathi, umeluleki wakhe, naPhikoli, indvuna yemabutfo akhe.

²⁷ Isaka watsi kubo: “Niteleni la kimi, kantsi niyangitondza, futsi nine nangicosha nasemkhatsini wenu?”

²⁸ Bamphendvula batsi: “Manje sekusikhanyele kutsi Simakadze unawe. Ngako-ke sitsi: Akube nesifungo emkhatsini wakho natsi. Asente sivumelwane nawe,

²⁹ sekutsi ungeke usentele lokubi, njengobe natsi singakakuphatsi kabi nje; sikuphetse kahle, sakuhambisa ngekuthula. Sekuyakhanya kutsi Simakadze ukubusisile.”

³⁰ Isaka wase ubentela lidzili; badla banatsa.

³¹ Ekuseni kuseluvivi ngakusasa bavuka benta sivumelwane lomunye kulomunye, basibeka luphawu ngesifungo. Isaka wabavalelisa, bahamba ngekuthula.

³² Ngalo lelo langa tisebenti ta-Isaka teta kuye tamtjela ngesicobho letase tisimbile tatsi: “Sesiwatfolile emanti.”

³³ Lesicobho wasetsa watsi yiSheba; ngako-ke libito lalelo dolobha sekwaba yiBherisheba kuze kube ngulamuhla.

Bafati ba-Esawu lababebetive

³⁴ Kwatsi Esawu nasaneminyaka lengemashumi lamane, watsatsa umfati, libito lakhe bekunguJudithi, indvodzakati ya-Beri, umHethi; wabuye watsatsa naBhasemathi, indvodzakati ya-Eloni, umHethi.

³⁵ Labalukatana bayenta yaba lusizi imphilo yabo-Isaka naRebheka.