Genesisi 23 - Siswati 1996 Bible

Kufa kwaSara

¹ Sara waphila iminyaka leli-127.

² Sara wafela eKhiriyathi Abha, lekuyiHebroni, eveni laseKhenani. Abrahama wakhalela umkakhe, Sara.

Abrahama utsenga lithuna

³ Abrahama wasishiya sidvumbu semkakhe, wesuka waya kumaHethi, wefika watsi:

⁴ “Ngisihambi nemchamuki la emkhatsini wenu. Ngicela ningitsengisele indzawo yekungcwaba, khona ngitewungcwaba lesidvumbu semkami.”

⁵ EmaHethi aphendvula Abrahama atsi:

⁶ “Ase usilalele, mnumzane, wena usikhulu lesinemandla la emkhatsini wetfu. Lomkakho ungamngcwaba nome ngangukuliphi kulamathuna etfu. Kute la emkhatsini wetfu longete akunika lithuna nome akuphatamise ekungcwabeni lomkakho.”

⁷ Abrahama wasukuma wewakhotsamela lamaHethi, lekwakubantfu bakuleyo ndzawo.

⁸ Watsi kubo: “Nanitsandza kutsi ngimngcwabe, esuke embikwami, ngisiteni ningicelele ku-Efroni, umsa waSowari,

⁹ kutsi angitsengisele umhume wakhe waseMakhaphela, lesekugcineni kwensimi yakhe. Ngicela angitsengisele ngentsengo lefanele, utewuba wami ube yindzawo yekungcwaba.”

¹⁰ Efroni labehleti emkhatsini wemaHethi waphendvula Abrahama eva onkhe emaHethi labengena esangweni lelidolobha,

¹¹ watsi: “Cha, nkhosi yami, asungilalele: Ngiyakunika lensimi kanye nalomhume lokuyo, ngikunika embikwebantfu bakitsi, ngitsi: Lomkakho mngcwabe khona.”

¹² Abrahama wabakhotsamela bantfu bakulelo live.

¹³ Wakhuluma ku-Efroni embikwalabo bantfu, watsi: “Ase ungilalele, ngitakunika intsengo yalensimi, ngicela uyemukele kimi, khona ngitawungcwaba khona umkami.”

¹⁴ Efroni waphendvula Abrahama watsi:

¹⁵ “Nkhosi yami, asungilalele: Lesicakwana singabita lemashekheli esiliva langema-400. Pho, kuyini loko kuwe nakimi? Mngcwabe kuyo leyo ndzawo lomkakho.”

¹⁶ Bo-Abrahama na-Efroni bavumelana. Abrahama wase ukalela Efroni isiliva labesavele akhulume ngayo embikwemaHethi. Kwaba ngemashekheli esiliva langema-400, lekwakusilinganiso lesasisemtsetfweni webatsengisi bangaleso sikhatsi.

¹⁷ Ngako-ke insimi ya-Efroni leyayiseMakhaphela ngasemphumalanga neMamre, leyayinemhume nato tonkhe tihlahla letatikuyo, yonkhe leyo ndzawo,

¹⁸ yetfulwa ku-Abrahama embikwemaHethi, nabo bonkhe lababesesangweni lalelo dolobha.

¹⁹ Emvakwaloko Abrahama wangcwaba umkakhe Sara emhumeni wensimi yaseMakhaphela, ngasemphumalanga neMamre, eHebroni, eveni laseKhenani.

²⁰ Lensimi kanye nemhume emaHethi akunika Abrahama kutsi kube yindzawo yakhe yekungcwaba.