Genesisi 21 - Siswati 1996 Bible

Kutalwa kwa-Isaka

¹ Simakadze wabusisa Sara njengobe abeshito. Simakadze wentela Sara loko abemetsembise kona.

² Sara wakhulelwa, watalela Abrahama indvodzana ngesikhatsi lesasikhonjwe nguNkulunkulu. Abrahama abesamdzala kakhulu.

³ Abrahama wayetsa libito watsi ngu-Isaka lendvodzana yakhe labeyitalelwe nguSara.

⁴ Abrahama wayisoka indvodzana yakhe lengu-Isaka seyinemalanga lasiphohlongo budzala, njengobe Nkulunkulu abemyalile.

⁵ Abrahama abesaneminyaka lelikhulu budzala, ngesikhatsi kutalwa indvodzana yakhe Isaka.

⁶ Sara watsi: “Nkulunkulu ungiphe luhleko, bonkhe labayivako lendzaba bayawuhleka njengami.”

⁷ Wachubeka watsi: “Ngubani nje labengahle asho ku-Abrahama kutsi Sara uyawuse amunyise bantfwana? Noko sengimtalele indvodzana ebudzaleni bakhe.”

⁸ Umntfwana wakhula, kwatsi mhlazana alunyulwa Abrahama wenta lelikhulu lidzili.

Hagari na-Ishmayeli bayacoshwa

⁹ Ngalelinye lilanga Sara wabona indvodzana yaHagari, umGibhithe, labeyitalele Abrahama, yeyisa Isaka, indvodzana yakhe.

¹⁰ Ngako-ke wase utsi ku-Abrahama: “Sicoshe lesigcilikati nalendvodzana yaso, ngobe indvodzana yalesigcilikati akufanele ibe yindlalifa kanye nendvodzana yami Isaka.”

¹¹ Loku kwamkhatsata kakhulu Abrahama, ngobe bekuphatselene nalendvodzana yakhe.

¹² Kodvwa Nkulunkulu watsi ku-Abrahama: “Ungakhatsateki ngenca yalomfana nangenca yalesigcilikati sakho. Loko lokushiwo nguSara kuwe kwente njengobe akutjelile, ngobe titukulwane takho tiyawubitwa nga-Isaka.

¹³ Ngiyakwenta sive nangendvodzana yesigcilikati sakho, ngobe nayo iyintalo yakho.”

¹⁴ Ngakusasa ekuseni Abrahama wavuka kuseluvivi, watsatsa sinkhwa nesigubhu semanti wakwetjatsisa Hagari, wamnika nemntfwana wabahambisa. Wahamba-ke Hagari azulazula ehlane laseBherisheba.

¹⁵ Atsi kube aphele lamanti esigujini, wabeka umntfwana ngaphansi kwalesinye sihlahla.

¹⁶ Wase uhamba libanga lemjikijelo, wayawuhlala khona acabanga atsi: “Ngingeke ngikumele kubuka umntfwanami afa.” Asahleti phansi afulatsele lomfana, tehla tinyembeti, wakhala kabuhlungu.

¹⁷ Nkulunkulu wakuva kukhala kwalomfana; ingilosi yaNkulunkulu yakhuluma isezulwini, yatsi kuHagari: “Hagari, uhlushwa yini? Ungesabi, ngobe Nkulunkulu sewulivile livi lalomfana lapho akhona.

¹⁸ Sukuma, utsatse lomntfwana, umgone, ngobe ngitakumenta abe sive lesikhulu.”

¹⁹ Nkulunkulu wawavula emehlo aHagari, wabona sicobho semanti, waya kuwo wafike wagcwalisa sigubhu ngemanti, wanatsisa lomntfwana.

²⁰ Nkulunkulu waba naye lomntfwana. Wakhula, akhulela ehlane, waba yingcweti kutebutjoki.

²¹ Ngesikhatsi ahlala ehlane lasePharani, unina wamtsatsela umfati labengumGibhithe.

Sivumelwane emkhatsini wa-Abrahama na-Abimeleki

²² Ngaso leso sikhatsi Abimeleki waya ku-Abrahama ahamba naPhikoli, indvuna yemabutfo akhe, wafike watsi: “Nkulunkulu unawe kuko konkhe lokwentako.

²³ Ngako ase ufunge la kimi embikwaNkulunkulu kutsi ungeke ungiyenge mine, nebantfwabami, netitukulwane tami, kepha ngekwemusa wami lengiwente kuwe, wente nakimi nakulo lelive lokhosele kulo.”

²⁴ Abrahama watsi: “Ngiyafunga.”

²⁵ Abrahama wase ubeka sikhalo sakhe ku-Abimeleki macondzana nemtfombo wemanti lowawuchwagwe tisebenti ta-Abimeleki.

²⁶ Abimeleki watsi: “Hhawu, nami ngiyayicabuka nje lendzaba. Angati kutsi kwentiwe ngubani loko, nawe awuzange sewungitjele, kantsi futsi angizange sengive ngako.”

²⁷ Abrahama wase upha Abimeleki timvu netinkhabi, benta sivumelwane bobabili.

²⁸ Abrahama wakhetsa emazinyane etimvu lamasikati lasikhombisa emhlambini wakhe.

²⁹ Abimeleki wabuta Abrahama watsi: “Usho kutsini ngalokukhetsa lamazinyane etimvu lamasikati lasikhombisa?”

³⁰ Abrahama waphendvula watsi: “Yemukela lamazinyane lasikhombisa etimvu la esandleni sami, kube bufakazi bami kutsi lomtfombo wembiwa ngimi.”

³¹ Ngako-ke leyo ndzawo yabitwa ngekutsi yiBherisheba; ngobe ngulapho benta khona sifungo bobabili.

³² Batsi kube basente lesivumelwane eBherisheba, bo-Abimeleki nendvuna yakhe, Phikoli, besuka kuleyo ndzawo babuyela eveni lemaFilisti.

³³ Abrahama wahlanyela sihlahla selitamariske eBherisheba. Wadvumisa Simakadze, Nkulunkulu waphakadze.

³⁴ Abrahama wahlala eveni lemaFilisti sikhatsi lesidze.