Genesisi 16 - Siswati 1996 Bible

Hagari na-Ishmayeli

¹ Sarayi, umka-Abrama, abengenamntfwana. Abenesisebenti lesasingumGibhithe lesasibitwa ngekutsi nguHagari.

² Sarayi watsi ku-Abrama: “Ase ubuke, Simakadze ungimile intalo. Ngena kulesisebenti sami, mhlawumbe ngitawutfola ngaso bantfwana.” Abrama walilalela livi laSarayi.

³ Abrama asahlale iminyaka lelishumi eveni laseKhenani, Sarayi, umka-Abrama, watsatsa Hagari, sisebenti sakhe lesasingumGibhithe, wasinika Abrama kutsi sibe ngumkakhe.

⁴ Abrama wangena kuHagari; Hagari wase uyakhulelwa. Watsi kube Hagari abone kutsi sewukhulelwe, wase wedzelela loSarayi.

⁵ Sarayi wakhuluma ku-Abrama watsi: “Nguwe lofanele kulungisa letintfo lesetonakala. Ngimi lengakunika loHagari, kodvwa utsite kube abone kutsi sewukhulelwe, wase uyangedzelela. Simakadze akasehlulele abone kutsi ngubani lowonile emkhatsini wakho nami.”

⁶ Abrama watsi kuSarayi: “Lalela la, Hagari sisebenti sakho, uphetfwe nguwe. Mphatse njengekubona kwakho.” Sarayi wase umphatsa ngelulaka loHagari, wadzimate Hagari wabaleka.

⁷ Ingilosi yaSimakadze yakhandza Hagari ngasesicojeni semanti, ehlane, endleleni leya eShuri,

⁸ yatsi: “Hagari, sisebenti saSarayi, uphumaphi? Uyaphi?” Waphendvula watsi: “Ngibalekela Sarayi, umphatsi wami.”

⁹ Ingilosi yaSimakadze yatsi kuye: “Ncandzeka, buyela kuSarayi, umphatsi wakho, ufike utitfobe ngaphansi kwakhe.”

¹⁰ Ingilosi yaSimakadze yachubeka yatsi: “Intalo yakho ngitayandzisa kakhulu kangangekutsi kute loyawuba nemandla ekuyibala.”

¹¹ Ingilosi yachubeka yatsi kuye: “Ase ubuke nje, sewukhulelwe, utawutala indvodzana uyetse libito utsi ngu-Ishmayeli, ngobe Simakadze ukuvile kuhlupheka kwakho.

¹² Uyawuba ngumuntfu lonjengembongolo yesiganga, aphambane naye wonkhe umuntfu, bonkhe bantfu baphambane naye. Uyawuhlala ngekuchukulutana netihlobo takhe.”

¹³ Ngako-ke wase wetsa loSimakadze lowakhuluma kuye watsi: “UnguNkulunkulu longibonako,” ngobe watsi: “Kambe ngabe ngibone Nkulunkulu ngabuye ngaphilela kutsi ngikhulume ngaloko?”

¹⁴ Ngiko nje lomtfombo losemkhatsini weKhadeshi neBheredi ubitwa ngekutsi yiBheri Lahayi Rohi lokusho kutsi: “Umtfombo waLophilako Longibonako.”

¹⁵ Hagari watalela Abrama indvodzana; Abrama wayetsa libito watsi ngu-Ishmayeli.

¹⁶ Abrama abesaneminyaka lengema-86, mhlazana Hagari amtalela Ishmayeli.