Genesisi 13 - Siswati 1996 Bible

Abrama naLoti bayehlukana

¹ Ngako-ke Abrama wakhuphuka eGibhithe, yena nemkakhe, nako konkhe labesanako, wahamba naLoti, baya ngaseningizimu neKhenani.

² Abrama abesacebe kakhulu: asanemfuyo, nesiliva, negolide.

³ Wesuka eningizimu neKhenani wacocoma ngekutfutsa, waze wefika ngaseBetheli. Waphindze wesuka lapho waya endzaweni lesemkhatsini weBetheli ne-Ayi, lapho abeke wemisa khona lithende kucala,

⁴ wakha nelilati. Abrama wafike lapho wakhuleka kuSimakadze.

⁵ Naye Loti, labehamba na-Abrama, abesanetimvu, netimbuti, netinkhomo kanye nemndeni wakhe netisebenti takhe.

⁶ Ngako-ke lelo live lalingeke lisabenela kahle-hle, ngobe timphahla tabo tase titinyenti kangangekutsi babengabe basahlala ndzawonye.

⁷ Kwavela kucabana emkhatsini webelusi baka-Abrama nebelusi bakaLoti. Ngaleso sikhatsi emaKhenani nemaPheresi abesahlala kulelo live.

⁸ Ngako Abrama watsi kuLoti: “Tsine nawe sitihlobo. Ngako-ke akukafaneli kutsi sicabane ngenca yekucabana kwebelusi betfu.

⁹ Angitsi uyalibona lonkhe lelive? Asehlukane. Nawukhetsa kuya ngesancele, mine ngitakuya ngesekudla; nawukhetsa kuya ngesekudla, mine ngitakuya ngesancele.”

¹⁰ Loti watsi naphakamisa emehlo akhe, wabona litsafa lelinesihlambo semfula iJordane, linemanti lenele yonkhe indzawo, kuze kuyewufika eSowari; lalinjengensimi yaSimakadze nanjengelive laseGibhithe. Ngalesikhatsi Simakadze abesengakayibhubhisi iSodoma neGomora.

¹¹ Ngako-ke Loti wakhetsa lonkhe litsafa lelalinesihlambo semfula iJordane, wacondza ngasemphumalanga. Kwaba kwehlukana kwabo-ke njalo.

¹² Abrama wahlala eveni laseKhenani, Loti yena wayawuhlala emkhatsini wemiti lesetsafeni lemfula, wemisa lithende lakhe edvute neSodoma.

¹³ Kepha bantfu baseSodoma babekhohlakele, bona kakhulu kuSimakadze.

Abrama uya eHebroni

¹⁴ Kwatsi Loti nasehlukene na-Abrama, Simakadze watsi ku-Abrama: “Phakamisa emehlo akho, ubuke ngasenyakatfo, nangaseningizimu, nangasemphumalanga, nangasenshonalanga.

¹⁵ Lonkhe lelive lolibonako ngitawulinika wena netitukulwane takho kuze kube phakadze.

¹⁶ Titukulwane takho ngiyawutenta tibe ngangelutfuli lwemhlaba, kangangekutsi nakukhona longabala lutfuli lwemhlaba, netitukulwane takho angatibala.

¹⁷ Sukuma, uhambe ulidzabule ekhatsi ngebudze nangebubanti balo lelive, ngobe ngitakunika lona.”

¹⁸ Ngako-ke, Abrama walitfutsa lithende lakhe walimisa ngasetihlahleni tema-okhi eMamre, leseHebroni; wafike lapho wakhela Simakadze lilati.