Ezra 8 - Siswati 1996 Bible

Bantfu lababuya ekutfunjweni

¹ Lawa ngemadvodza labebaholi bemindeni, nalabo lababhaliswa kanye nabo labaphuma kanye nami eBhabhulona ngesikhatsi sekubusa kwenkhosi Athazeksesi:

² Wetitukulwane takaFinehasi bekunguGeshomu; wetitukulwane taka-Ithamari kunguDanyela; wetitukulwane takaDavide kunguHathushi,

³ umsa waShekhaniya. Wetitukulwane takaPharoshi bekunguZakhariya, lowabhaliswa kanye nemadvodza lali-150.

⁴ Wetitukulwane takaPhahathi Mowabi bekungu-Eliyoyenayi, umsa waZerahiya, lowabhaliswa kanye nemadvodza langema-200.

⁵ Wetitukulwane takaZathu bekunguShekhaniya, umsa waJahaziyeli, lowabhaliswa kanye nemadvodza langema-300.

⁶ Wetitukulwane taka-Adini bekungu-Ebedi, umsa waJonathani, lowabhaliswa kanye nemadvodza langema-50.

⁷ Wetitukulwane taka-Elamu bekunguJeshaya, umsa wa-Athaliya, lowabhaliswa kanye nemadvodza langema-70.

⁸ Wetitukulwane takaShefathiya bekunguZebadiya, umsa waMikhayeli, lowabhaliswa kanye nemadvodza langema-80.

⁹ Wetitukulwane takaJowabe bekungu-Obadiya, umsa waJehiyeli, lowabhaliswa kanye nemadvodza langema-218.

¹⁰ Wetitukulwane takaBani bekunguShelomithi, umsa waJosifiya, lowabhaliswa kanye nemadvodza lali-160.

¹¹ Wetitukulwane takaBebayi bekunguZakhariya, umsa waBebayi, lowabhaliswa kanye nemadvodza langema-28.

¹² Wetitukulwane taka-Azgadi bekunguJohanani, umsa waHakhatani, lowabhaliswa kanye nemadvodza lali-110.

¹³ Wetitukulwane taka-Adonikamu, lababa bekugcina, emabito abo bekubo-Elifeleti, naJehuweli kanye naShemaya, lababhaliswa kanye nemadvodza langema-60.

¹⁴ Wetitukulwane takaBikvayi bekubo-Uthayi naZakhuri, lababhaliswa kanye nemadvodza langema-70.

Kutfolakala kwemaLevi, atfolwa ngu-Ezra

¹⁵ Ngabahlanganisela ngasemseleni logeletela e-Ahava, samisa lapho emalanga lamatsatfu. Ngatsi nangihlolisisa kulabantfu, ngakhandza kunebaphristi kuphela, emaLevi angekho.

¹⁶ Ngase ngibita Eliyezeri, na-Ariyeli, naShemaya, na-Elnathani, naJaribi, na-Elnathani, naNathani, naZakhariya, kanye naMeshulamu, lababebaholi, bebakanye nebafundzisi lekwakuboJoyaribi na-Elnathani.

¹⁷ Ngabe sengibatfumela ku-Ido, umholi waseKhasifiya. Ngabatjela kutsi kufanele bakhulumeni ku-Ido kanye nebantfu bakubo, lekwakutisebenti telithempeli eKhasifiya, kuze batewusiletsela tisebenti tendlu yaNkulunkulu wetfu.

¹⁸ Njengobe sandla lesihle saSimakadze sasisetikwetfu, basiletsela Sherebiya, indvodza leyayinelikhono ekwenteni tintfo. Abengewetitukulwane taMahali, umsa waLevi, umsa wa-Israyeli, nemadvodzana aSherebiya, kanye nabomnakabo, emadvodza lali-18 asawonkhe, lenyuka nawo.

¹⁹ Batfumela naboHashabiya, naJeshaya, betitukulwane taMerari, bomnakabo netihlobo tabo, emadvodza langema-20.

²⁰ Baphindze baletsa tisebenti telithempeli letingema-220, bokhokho babo lababevele bemiswe nguDavide netindvuna takhe kutsi basite emaLevi. Bonkhe babhaliswa ngemabito abo.

Ezra wahola bantfu ekuzileni nasekuthandazeni

²¹ Ngakhona lapho emseleni i-Ahava ngamemetela kutsi akuzilwe, khona sitewutitfoba embikwaNkulunkulu wetfu sicela kutsi asiphephise endleleni yetfu, nebantfwabetfu kanye nato tonkhe timphahla tetfu.

²² Nganginemahloni kutsi ngicele inkhosi kutsi isinike emasotja nalagibele emahhashi kutsi asiphekeletele kusivikela etitseni tetfu endleleni, ngobe sase sivele siyitjelile inkhosi ngaloko, satsi: “Sandla lesihle saNkulunkulu wetfu sisetikwalowo nalowo lomfunako, kodvwa intfukutselo yakhe iphambene nalabo labamlahlako.”

²³ Ngako sase siyazila, sancusa kuNkulunkulu wetfu ngaloku, wawuphendvula umthandazo wetfu.

Tipho telithempeli

²⁴ Ngabe sengikhetsa labali-12 bebaphristi lababebaholi, kwaba boSherebiya, naHashabiya kanye nalabalishumi lekwakubomnakabo.

²⁵ Ngawukala embikwabo babuka umnikelo lowawuyisiliva, negolide kanye netimphahla letatinikelelwe indlu yaNkulunkulu wetfu yinkhosi, nebeluleki bayo, netindvuna tayo kanye nawo onkhe ema-Israyeli labekhona lapho.

²⁶ Ngakala kwaba ngemathani labengaba ngema-22 esiliva, netimphahla tesiliva letatingemathani labengaba matsatfu nemakhilogremu langema-400,

²⁷ netitja tegolide letatingema-20 tingemakhilogremu labengaba siphohlongo nemagremu langema-500, netitja letimbili telitfusi lelilolongiwe, tiligugu njengegolide.

²⁸ Ngakhuluma kubo ngatsi: “Nine kanye naletimphahla seninikelwe kuSimakadze. Isiliva nalegolide sekungumnikelo wesihle lonikwe Simakadze Nkulunkulu waboyihlo.

²⁹ Ticizeni letimphahla, nize nifike nitikale emakamelweni endlu yaSimakadze eJerusalema embikwebaphristi labaphetse, nemaLevi kanye nebaholi baka-Israyeli.”

³⁰ Baphristi kanye nemaLevi emukela isiliva, negolide kanye netimphahla letingcwele bese tikaliwe kutsi titsatfwe timikiswe endlini yaNkulunkulu eJerusalema.

Kubuyela emuva eJerusalema

³¹ Ngelilanga leli-12 ngenyanga yekucala, satfutsa emseleni i-Ahava sacondza eJerusalema. Sandla saNkulunkulu wetfu sasisetikwetfu; wasivikela etitseni nasetigebengwini endleleni yetfu yonkhe.

³² Ngako eJerusalema sefika, saphumula lapho emalanga lamatsatfu.

³³ Ngelilanga lesine, sesisendlini yaNkulunkulu wetfu, sakala isiliva, negolide, netimphahla letingcwele etandleni taMeremothi, umsa wa-Uriya, umphristi. Eleyazare, umsa waFinehasi, abenaye kanye nemaLevi, boJozabadi, umsa waJeshuwa, naNohadiya, umsa waBinuwi.

³⁴ Konkhe kwabhaliswa ngenombolo nangesisindvo sako ngasona leso sikhatsi.

³⁵ Kwatsi bonkhe labo bebabuye ekutfunjweni banikela ngemhlatjelo wekushiswa kuNkulunkulu wema-Israyeli, kwaba: tinkunzi letili-12 tawo onkhe ema-Israyeli, netihhanca letatingema-96, nemazinyane etimvu lamadvuna langema-77, kwatsi umnikelo wesono waba tiphongo letili-12. Konkhe kwakukwemnikelo wekushiswa kuSimakadze.

³⁶ Baphindze betfula imitsetfo nemilayeto yenkhosi kubabusi baseNshonalanga Yufrathe, labavele basita labantfu emsebentini wendlu yaNkulunkulu.