Ezra 5 - Siswati 1996 Bible

¹ Ngasona leso sikhatsi baphrofethi lababili, boHagayi naZakhariya, umsa wa-Ido, bacala kukhulumela Nkulunkulu waka-Israyeli emaJudeni naseJerusalema.

² Watsi kube Zerubhabheli, umsa waSalatiyeli, naJeshuwa, umsa waJosadaki, baweve lamavi, bacala kuyakha kabusha indlu yaNkulunkulu eJerusalema. Labaphrofethi baNkulunkulu babenabo, babasita.

³ Ngasona leso sikhatsi Thathenayi, umbusi waseNshonalanga Yufrathe, naShethari Boznayi kanye nebangani babo bahamba baya kubo, bafike bababuta batsi: “Ngubani lona loninike leligunya lekwakha kabusha lelithempeli nelekuvusetela lesakhiwo?”

⁴ Babuya bababuta batsi: “Bobani emabito alamadvodza lakha lendlu?”

⁵ Kodvwa liso laNkulunkulu lalibelusile baholi bakaJuda, abazange bayekeliswe, kwaze kwabhalelwa Dariyusi umbiko, kwalindzelwa imphendvulo leyayibhalwe nguye phansi.

⁶ Lena kwaba nguyona ncwadzi leyabhalwa boThathenayi, umbusi waseNshonalanga Yufrathe, naShethari Boznayi kanye nebangani babo lababetiphatsimandla taseNshonalanga Yufrathe, tayitfumela kuDariyusi.

⁷ Lombiko wawufundzeka kanje: “KuDariyusi, inkhosi! “Sengatsi kungaba nekuthula.

⁸ “Inkhosi kufanele yati kutsi sihambile saya esifundzeni sakaJuda, ethempelini laNkulunkulu lomkhulu. Bantfu balakha ngematje lamakhulu, bafaka netingodvo kulolubondza lwalo. Lomsebenti wentiwa ngenkhutsalo, kantsi futsi uchubeka kahle kakhulu.

⁹ “Labaholi sibabutile satsi: ‘Ngubani lona loninike leligunya lekwakha kabusha lelithempeli kanye nekuvusetela lesakhiwo?’

¹⁰ Siphindze sababuta nemabito abo, khona sitekuwabhala phansi sikwatise emabito ebaholi babo.

¹¹ “Bona basiphendvule batsi: ‘Tsine sitinceku taNkulunkulu welizulu nemhlaba, silakha kabusha lelithempeli lelineminyaka leminyenti lakhiwa lacedvwa yinkhosi lenkhulu yaka-Israyeli.

¹² Kodvwa ngenca yekutsi bobabe batfukutselisa Nkulunkulu wasezulwini, wabe sewubanikela esandleni saNebukhadnezari, umKhaledi, inkhosi yaseBhabhulona, lowalibhidlita lelithempeli watfumba labantfu wabayisa eBhabhulona.

¹³ “ ‘Noko ngemnyaka wekucala waKhuresi, inkhosi yaseBhabhulona, Khuresi wakhipha umtsetfo kutsi lelithempeli lakhiwe kabusha.

¹⁴ Waze wakhulula ngisho netimphahla tegolide netesiliva Nebukhadnezari labetitsetse ethempelini eJerusalema watimikisa khona lena ethempelini eBhabhulona. “ ‘Khuresi, inkhosi, watinika indvodza lekwakutsiwa nguSheshbasari, labesayibeke kutsi ibe ngumbusi,

¹⁵ wayitjela watsi: “Tsatsa letimphahla uhambe nato ufike utibeke ethempelini eJerusalema; wakhe kabusha indlu yaNkulunkulu endzaweni yayo.”

¹⁶ Ngako loSheshbasari waya lapho wafike wabeka tisekelo tendlu yaNkulunkulu eJerusalema. Kusukela ngalelo langa kuze kube ngulamuhla seloku liyakhiwa, kodvwa noko lisengakapheli.’

¹⁷ “Ngako-ke nakukuhle enkhosini, ake kuphenyisiswe emilandvweni yebukhosi eBhabhulona kutewutfolakala kahle kutsi Khuresi, inkhosi, wawukhipha ngempela yini lomtsetfo wekutsi yakhiwe kabusha lendlu yaNkulunkulu eJerusalema. Inkhosi itawube seyiyasatisa sincumo sayo ngalendzaba.”