Ezra 10 - Siswati 1996 Bible

Licebo lekucedza kwendziselana nebetive

¹ Watsi Ezra asathandaza, avuma tono akhala, atijika phansi embikwendlu yaNkulunkulu, sicumbi lesikhulu sema-Israyeli, emadvodza, nebafati kanye nebantfwana sabutsana kuye samtungeleta. Naso sasikhala kakhulukati.

² Kwatsi Shekhaniya, umsa waJehiyeli, lomunye wetitukulwane ta-Elamu, wakhuluma ku-Ezra watsi: “Asiketsembeki kuNkulunkulu wetfu ngekutsi siteke bafati baletive letisitungeletile. Kodvwa nome kunjalo, lisekhona litsemba ka-Israyeli.

³ Manje asente sivumelwane embikwaNkulunkulu wetfu kutsi sitewubancandzekisa bonkhe labafati nalabantfwana, njengobe lomholi wami eluleka kanye nalabo labesaba imiyalo yaNkulunkulu. Loko akwentiwe ngekulandzela umtsetfo.

⁴ Sukuma, lendzaba isetandleni takho. Sitakusekela, ngako mani sibindzi, ukwente.”

⁵ Ezra wasukuma, wafungisa baphristi, nemaLevi, nawo onkhe ema-Israyeli kutsi ente loko lekwase kunconyiwe. Bafunga.

⁶ Ezra wesuka embikwendlu yaNkulunkulu, wahamba waya endlini yaJehohanani, umsa wa-Eliyashibi. Ngesikhatsi aselapho akazange adle kudla, akazange anatse ngisho nemanti, ngobe abechubeka nekulilela kungetsembeki kwalabatfunjwa.

⁷ Kwaphuma livi lacondzana nabo bonkhe batfunjwa bakaJuda nebaseJerusalema kutsi bahlangane ndzawonye eJerusalema.

⁸ Wonkhe longetutibonakalisa angakapheli emalanga lamatsatfu, tonkhe timphahla takhe titawudliwa, kuye ngesincumo setindvuna nebaholi, yena-ke utawube sewuyacitfwa emkhatsini walabatfunjwa.

⁹ Kwatsi kungakapheli emalanga lamatsatfu, onkhe emadvodza akaJuda newakaBhenjamini ahlangana ndzawonye eJerusalema. Ngelilanga lema-20 enyangeni yemfica, bonkhe base bahleti ebaleni lelithempeli, bakhatsateke kakhulu ngalemvula leyayina, ikakhulu ngesimo salowo mhlangano.

¹⁰ Ezra, umphristi, wasukuma wakhuluma kulabantfu, watsi: “Aniketsembeki; niteke bafati betive, nengeta bubi etikwebubi baka-Israyeli.

¹¹ Manje vumani tono tenu kuSimakadze, Nkulunkulu waboyihlo, nente intsandvo yakhe. Tehlukaniseni kuletive letinitungeletile nakulabafati betive.”

¹² Sonkhe sive saphendvula ngalivi linye, samemeta satsi: “Ucinisile! Kufanele sente njengobe usho.

¹³ Kodvwa kunebantfu labanyenti lapha, kantsi futsi nelitulu liyana; ngako, singeke sikhone kuma lapha ngaphandle. Ngetulu kwaloko lendzaba ingeke icedvwe ngelilanga linye nome lamabili, ngobe sone kakhulu kuloko.

¹⁴ Tindvuna tetfu atente lomsebenti esikhundleni salo lonkhe lelibandla. Kutawube sekutsi ngulowo nalowo kulamadolobha etfu loteke umfati wetive ete ngaleso sikhatsi lesibekiwe akanye nebaholi nebehluleli balelo dolobha, kuze kutsi intfukutselo leyesabekako yaNkulunkulu wetfu kulendzaba isuke kitsi.”

¹⁵ Kwaba nguJonathani, umsa wa-Asaheli, naJahazeya, umsa waThikva, kuphela labaphambana nalesiphakamiso. Basekelwa nguMeshulamu naShabhethayi, umLevi.

¹⁶ Ngako titfunywa tavele tenta njengobe kwakuphakanyisiwe. Ezra, umphristi, wakhetsa emadvodza labetinhloko temindeni, kwaba yindvodza yinye kulolo nakulolo lusendvo ngemabito awo. Ngelilanga lekucala enyangeni yelishumi bahlala phansi bahlolisisa lawo macala,

¹⁷ kwatsi ngelilanga lekucala enyangeni yekucala babe sebacedzile kuhlolisisa ngawo onkhe lawo madvodza labeteke bafati betive.

Emadvodza labenebafati betive

¹⁸ Lolu kwaba luhla lwemadvodza lwetitukulwane tebaphristi lababenebafati betive: Etitukulwaneni takaJeshuwa, umsa waJosadaki, nabomnakabo bekuboMaseya, na-Eliyezeri, naJaribi kanye naGedaliya.

¹⁹ Bonkhe bahlanganisa tandla tabo betsembisa kubacosha labo bafati babo; macondzana naleso sono sabo ngulowo nalowo wakhipha sihhanca, saba ngumnikelo welicala.

²⁰ Etitukulwaneni taka-Imeri bekuboHanani naZebadiya.

²¹ Etitukulwaneni takaHarimu bekuboMaseya, na-Elija, naShemaya, naJehiyeli kanye na-Uziya.

²² Etitukulwaneni takaPhashuri bekubo-Eliyoyenayi, naMaseya, na-Ishmayeli, naNethaneli, naJozabadi kanye na-Elasa.

²³ KumaLevi bekuboJozabadi, naShimeyi naKhelaya, lekwakunguKhelita, naPhethahiya, naJuda kanye na-Eliyezeri.

²⁴ Kubahlabeli bekungu-Eliyashibi. Kubomahlalesangweni bekuboShalumi, naThelemi kanye na-Uri.

²⁵ Kulamanye ema-Israyeli: Etitukulwaneni takaPharoshi bekuboRamiya, naJiziya, naMalkhiya, naMiyamini, na-Eleyazare, naMalkhiya kanye naBhenaya.

²⁶ Etitukulwaneni taka-Elamu bekuboMathaniya, naZakhariya, naJehiyeli, na-Abdi, naJeremothi kanye na-Elija.

²⁷ Etitukulwaneni takaZathu bekubo-Eliyoyenayi, na-Eliyashibi, naMathaniya, naJeremothi, naZabadi kanye na-Aziza.

²⁸ Etitukulwaneni takaBebayi bekuboJehohanani, naHananiya, naZabhayi kanye na-Athlayi.

²⁹ Etitukulwaneni takaBani bekuboMeshulamu, naMaluki, na-Adaya, naJashubi, naSheyali kanye naJeremothi.

³⁰ Etitukulwaneni takaPhahathi Mowabi bekubo-Adna, naKhelali, naBhenaya, naMaseya, naMathaniya, naBesaleli, naBinuwi kanye naManase.

³¹ Etitukulwaneni takaHarimi bekubo-Eliyezeri, na-Ishiya, naMalkhiya, naShemaya, naShimeyoni,

³² naBhenjamini, naMaluki kanye naShemariya.

³³ Etitukulwaneni takaHashumi bekuboMathenayi, naMathatha, naZabadi, na-Elifeleti, naJeremayi, naManase kanye naShimeyi.

³⁴ Etitukulwaneni takaBani bekuboMadayi, na-Amramu, na-Uweli,

³⁵ naBhenaya, naBedeya, naKheluhi,

³⁶ naVaniya, naMeremothi, na-Eliyashibi,

³⁷ naMathaniya, naMathenayi kanye naJasu.

³⁸ Etitukulwaneni takaBinuwi bekuboShimeyi,

³⁹ naShelemiya, naNathani, na-Adaya,

⁴⁰ naMaknadebayi, naShashayi, naSharayi,

⁴¹ na-Azareli, naShelemiya, naShemariya,

⁴² naShalumi, na-Amariya kanye naJosefa.

⁴³ Etitukulwaneni takaNebo bekuboJeyiyeli, naMathithiya, naZabadi, naZebina, naJadayi, naJoweli kanye naBhenaya.

⁴⁴ Bonkhe laba babeteke bafati betive, labanye babo base batele ngisho nebantfwana kulabafati.