Ezra 1 - Siswati 1996 Bible

Umtsetfo waKhuresi wekubuyisela emaJuda eJerusalema

¹ Ngemnyaka wekucala wekubusa kwaKhuresi, inkhosi yasePheresiya, kuze kugcwaliseke livi laSimakadze lelakhulunywa nguJeremiya, Simakadze watsintsa inhlitiyo yaKhuresi, inkhosi yasePheresiya kutsi ente simemetelo kulo lonkhe lelingaphansi kwakhe, nekutsi asibhale phansi atsi:

² “Naku lokushiwo nguKhuresi, inkhosi yasePheresiya, utsi: “ ‘Simakadze, Nkulunkulu welizulu, unginike yonkhe imibuso yemhlaba, wangiyala nekutsi ngimakhele lithempeli lakhe eJerusalema kulakaJuda.

³ Ngulowo nalowo wesive sakhe losemkhatsini wenu shangatsi Simakadze angaba naye, ahambe aye eJerusalema kaJuda, akhe lithempeli laSimakadze, Nkulunkulu wema-Israyeli, Nkulunkulu loseJerusalema.

⁴ Nakukhona umuntfu loyinsali yebatfunjwa lodzinga lusito ngekubuyela emuva, makhelwane wakhe akamsite. Kufanele labo bantfu basitwe ngesiliva, nangegolide, nangetimphahla, nangetifuyo kanye nangeminikelo yesihle yelithempeli laNkulunkulu waseJerusalema.’ ”

⁵ Kwatsi baholi bemindeni yakaJuda neyakaBhenjamini, nebaphristi, nemaLevi, nabo bonkhe Nkulunkulu latsintsa tinhlitiyo tabo kutsi bahambe bayewulakha lithempeli laSimakadze, batilungiselela kwenyukela eJerusalema.

⁶ Bonkhe bomakhelwane babo babasita ngetintfo tesiliva, netegolide, nangetimphahla, nangetifuyo, nangetipho letiligugu kanye nangeminikelo yesihle.

⁷ Ngetulu kwaloko Khuresi, inkhosi, watikhipha tonkhe leto timphahla betitelithempeli laSimakadze, letatitfunjwe nguNebukhadnezari eJerusalema, asatibeke ethempelini lankulunkulu wakhe.

⁸ Khuresi, inkhosi yasePheresiya, watfuma Mithredathi, umgcini wetimali, kutsi atimikise. Mithredathi watibala tonkhe, wase utetfula kuSheshbasari, umbusi wakaJuda.

⁹ Nase tibalwa, kwatfolakala leti: tindishi tegolide letatingema-30, netindishi tesiliva letatiyinkhulungwane, nemapani esiliva labengema-29,

¹⁰ netitja tegolide letatingema-30, netitja letincane tesiliva letatingema-410, naletinye timphahla letatiyinkhulungwane.

¹¹ Sekukonkhe kwaba timphahla letatiti-5 400 tegolide netesiliva. Sheshbasari tonkhe letimphahla watiletsa ahamba nebatfunjwa nabaphuma eBhabhulona baya eJerusalema.