Esta 6 - Siswati 1996 Bible

Inkhosi ibeka Modekhayi esikhundleni

¹ Kulobo busuku abuzange sebehle butfongo enkhosini, ngako yatfumela kutsi akulandvwe emabhuku emilandvo yembuso ifundzelwe.

² Lendzawo leyafundvwa yayinemlandvo lapho kwakubhalwe kutsi Modekhayi wavumbulula lisu letindvuna letimbili letatigadza iminyango yenkhosi, boBikthani naThereshi.

³ Inkhosi yabuta yatsi: “Modekhayi sambonga ngekumnika mvuzo muni ngalesento lesi?” Letinceku tatsi: “Kute lentelwa kona.”

⁴ Inkhosi yabuta yatsi: “Kukhona yini lomunye wetindvuna tami lolapha esigodlweni?” Ngaleso sikhatsi Hamani abengena esibuyeni sendlunkhulu ete enkhosini kutewucela kutsi Modekhayi alengiswe entsanjeni leyase ilungiselwe yena.

⁵ Ngako letinceku taphendvula tatsi: “Hamani ukhona la ngephandle, umele kutawukhuluma nawe.” Inkhosi yatsi: “Mngeniseni.”

⁶ Ngako Hamani wangeniswa, inkhosi yakhuluma kuye, yatsi: “Kukhona umuntfu lengifisa kumbonga kakhulu. Wena utsi ngingakukhombisa kanjani loko kumbonga kwami?” Hamani wacabanga watsi: “Konje ngubani nje inkhosi lengafisa kumbonga kakhulu ngaphandle kwami?”

⁷ Hamani wayiphendvula watsi: “Lomuntfu inkhosi lefisa kumbonga

⁸ ayimembese ngengubo yebukhosi leyembatfwa ngiyo, imekhwete ehhashini layo lelifakwe umchele webukhosi.

⁹ Lesinye setikhulu tayo letetsembekile asimembatsise lowo muntfu inkhosi letsandza kumbonga, bese sihamba embikwalo lelihhashi, lidzabule licotfote ekhatsi nelidolobha. Lesikhulu asihambe simemetela, sitsi: ‘Ase nibuke-ke kutsi inkhosi imentelani lowo muntfu lefisa kumbonga!’ ”

¹⁰ Inkhosi yatsi kuHamani: “Phutfuma, utsatse ingubo yebukhosi nelihhashi njengobe ushito, konkhe loko ukwente kuModekhayi, liJuda. Utamkhandza ahleti emphundvwini yendlunkhulu.”

¹¹ Ngako Hamani watsatsa lengubo yebukhosi wembatsisa Modekhayi, wamekhweta ehhashini lebukhosi, walihambela embili, ahamba amemetela atsi: “Ase nibuke-ke kutsi inkhosi imentelani umuntfu lefisa kumbonga!”

¹² Emvakwaloko Modekhayi wabuyela emphundvwini yendlunkhulu, kodvwa Hamani wabuyela ekhaya kakhe ajabhe, waze wembonya nebuso bakhe ngenca yekudliwa ngemahloni.

¹³ Wafike walandzisa umkakhe nebangani bakhe bonkhe lokwase kumehlele. Umkakhe Zereshi nalabangani bakhe bamtjela batsi: “Nangabe Modekhayi aliJuda, wena sewucalile kuwa, futsi ungeke umkhone. Nakanjani utakwehlula.”

¹⁴ Batsi basakhuluma tindvuna tenkhosi tefika setilandze Hamani ngekushesha kutsi aye edzilini, lakhe nenkhosi, lababelentelwe ngu-Esta.