Eksodusi 40 - Siswati 1996 Bible

Kumiswa nekunikelwa kwelithende lekukhontela

¹ Simakadze wakhuluma kuMosi, watsi:

² “Ngelilanga lekucala enyangeni yekucala ubomisa lithende lekukhontela, lekulithende lekuhlangana.

³ Ekhatsi kwalo ubobeka libhokisi lesivumelwane lelinemiyalo lelishumi, bese ulivimba ngendvwangu embikwalo.

⁴ Ubongenisa lelitafula, uhlelise kahle konkhe loko lokufanele kubekwe etikwalo. Ubongenisa nalolutsi lwetibane, bese ufaka letibane lapha kulo.

⁵ Lilati legolide lekushisela imphepho ubolibeka embikwalelibhokisi lesivumelwane, ulengise lendvwangu ekungeneni kwalelithende lekukhontela.

⁶ Embikwelithende lekukhontela ubobeka lilati lekushisela umnikelo.

⁷ Emkhatsini welithende lekuhlangana nelilati ubobeka umgezelo, uwugcwalise ngemanti.

⁸ Sibuya ubosakha, ufake nendvwangu ilenge emnyango waso.

⁹ “Lithende lekukhontela kanye nako konkhe lokuhambisana nalo ubobe sewuyakunikela ngekukugcoba ngemafutsa langcwele, kutawuba ngcwele.

¹⁰ Emvakwaloko lelilati lemnikelo wekushiswa nako konkhe lokuhambisana nako ubokugcoba ngemafutsa ukunikele kutawube sekuba ngcwele ngalokuphelele.

¹¹ Umgezelo kanye nesibunu sawo nako ubokugcoba ngemafutsa ukunikele kube ngcwele.

¹² “Uboletsa Aroni nemadvodzana akhe ekungeneni kwelithende lekuhlangana, ubatjele bafike batihlambulule lapho.

¹³ Ubogcokisa Aroni ngetembatfo tebuphristi, bese uyamgcoba abe ngcwele, khona atewungikhonta njengemphristi.

¹⁴ Uboletsa nalamadvodzana akhe nawo uwagcokise tingubo tawo letingenamkhono.

¹⁵ Nawo lamadvodzana ubowagcoba, njengobe ugcobe uyise, khona nawo atewungikhonta njengebaphristi. Lomgcobo utawubenta babe baphristi titukulwane ngetitukulwane.”

¹⁶ Mosi wakwenta konkhe loko njengobe Simakadze abemyalile.

¹⁷ Ngako-ke ngelilanga lekucala enyangeni yekucala emnyakeni wesibili baphumile eGibhithe lithende lekukhontela lemiswa laphela.

¹⁸ Mosi walakha lithende lekukhontela: wabeka emaseko alo, wemisa tinsikabhaluko talo netinsika talo, wafaka nemakabha alo.

¹⁹ Wase uyakumbonya konkhe loko ngetimbonyo leto letehlukene, njengobe Simakadze abemyalile.

²⁰ Watsatsa tibhelekeca tematje letimbili watifaka ebhokisini lesivumelwane. Wafaka letimboko kulamajiva alo, wase ulimbonya ngesihlalo semusa.

²¹ Libhokisi lesivumelwane walifaka ekhatsi ethendeni lekukhontela, walengisa indvwangu yekulifihla livalekile, njengobe Simakadze abemyalile.

²² Litafula walifaka ekhatsi ethendeni lekuhlangana ngasenyakatfo, ngaphandle kwendvwangu,

²³ wabeka etikwalo sinkhwa sebukhona, njengobe Simakadze abemyalile.

²⁴ Wabeka lutsi lwetibane ethendeni lekuhlangana ngaseningizimu macondzana nelitafula,

²⁵ wase ukhanyisa letibane embikwaSimakadze, njengobe Simakadze abemyalile.

²⁶ Lelilati legolide walibeka ethendeni lekuhlangana embikwayo lendvwangu,

²⁷ wase ushisa lemphepho lenuka kamnandzi, njengobe Simakadze abemyalile.

²⁸ Indvwangu wayilengisa ekungeneni kwelithende lekukhontela,

²⁹ kwase kutsi embikwalendvwangu wabeka lilati lekushisela umnikelo. Etikwalo wanikela ngemnikelo wekushiswa, nangemnikelo walokutinhlavu, njengobe Simakadze abemyalile.

³⁰ Wabeka umgezelo emkhatsini welithende lekuhlangana nelilati, wawugcwalisa ngemanti ekugeza.

³¹ Mosi, na-Aroni, nemadvodzana akhe babegezela kuwo tandla tabo netinyawo

³² njalo nje nabangena ethendeni lekuhlangana nome nabasondzela elatini, njengobe Simakadze abeyale Mosi.

³³ Mosi wakha sibuya, satungeleta lithende lekukhontela nelilati ndzawo tonkhe, walengisa indvwangu emnyango wesibuya. Ngako-ke Mosi wawucedza wonkhe umsebenti.

Lifu lisibekela lithende lekukhontela

³⁴ Lifu lasibekela lithende lekuhlangana, inkhatimulo yaSimakadze yagcwalisa lithende lekukhontela.

³⁵ Loko kwenta kutsi Mosi ehluleke kungena ethendeni lekuhlangana, ngobe lifu lase lilisibekele. Lithende lekukhontela lase ligcwele inkhatimulo yaSimakadze.

³⁶ Lalitsi lelifu lingaphakama, ema-Israyeli atfutse ayekucaba embili.

³⁷ Abengatfutsi nangabe lelifu lingakesuki etikwalelithende lekukhontela.

³⁸ Kulo lonkhe luhambo lwabo lifu laSimakadze emini lalibonakala etikwalelithende lekukhontela, kutsi ebusuku libe ngumlilo lovutsako etikwalo, onkhe ema-Israyeli abuka.