Eksodusi 39 - Siswati 1996 Bible

Kutfungwa kwetembatfo tebaphristi

¹ Batfunga tembatfo letihlotjiswe kahle tebaphristi ngensontfo leluhlata njengesibhakabhaka, nalebukhwebeletane, nalebovu ngalokutopele, lekwakufanele batembatse nabakhonta endzaweni lengcwele. Batfunga tembatfo letingcwele ta-Aroni, njengobe Simakadze abeyale Mosi.

² Benta sidziya ngemtiya welineni lecolisakele nangensontfo leluhlata njengesibhakabhaka, nalebukhwebeletane, nalebovu ngalokutopele, naleyigolide.

³ Bakha ngcwengcwe ngegolide, base bamsika imicwana yekwelukwa kanye nemitiya yelineni lecolisakele nensontfo leluhlata njengesibhakabhaka, nalebukhwebeletane, nalebovu ngalokutopele, umsebenti wengcweti lenebuciko.

⁴ Sidziya basenta saba nemichilo lemibili ngala nangale yekusibophela nekusihlanganisa emahlombe.

⁵ Lelibhande lelalelukiwe ngebungcweti leliselukhalweni balenta laba yintfo yinye nalesidziya, lentiwa ngemicwana yegolide, nensontfo lebukhwebeletane, naleluhlata njengesibhakabhaka, nalebovu ngalokutopele, nemitiya yelineni lecolisakele, njengobe Simakadze abeyale Mosi.

⁶ Benta ematje e-oniksi bawahlelisa bawephetsa ngegolide emaceleni, bawabhala ngekucopha emabito emadvodzana aJakobe.

⁷ Lamatje bawanamatsisela emichilweni yemahlombe yalesidziya, njengobe Simakadze abeshito kuMosi. Lamatje aba sikhumbuto ngemadvodzana aJakobe.

Kutfungwa kwesembatfo sesifuba

⁸ Batfunga sembatfo sesifuba ngebungcweti lobabusetjentiswe ekutfungeni sidziya; basitfunga ngalokuyigolide, nangalokubukhwebeletane, nangalokubovu ngalokutopele, nangemitiya yelineni lecolisakele, siphindvwe kabili sisikhwama.

⁹ Imihlubulo yaso yayilingana ndzawo tonkhe, umunye wawungemasentimitha labengaba ngema-22 budze, nemasentimitha labengaba ngema-22 bubanti.

¹⁰ Banamatsisela kuso imigca lemine yematje laligugu; emgceni wekucala banamatsisela isadiyusi, nethophazi, nerubhi;

¹¹ emgceni wesibili banamatsisela simaragidu, nesafire, nedayimani;

¹² emgceni wesitsatfu banamatsisela ihiyakinte, ne-agathe, ne-amethiste;

¹³ emgceni wesine banamatsisela ikhrisolithe, ne-oniksi, nejasiphi. Onkhe bawanamatsisela, base bawephetsa ngegolide.

¹⁴ Kulelo nakulelo litje kulawa lali-12 bekubhalwe ngekucopha libito lendvodzana yaJakobe. Ngulelo nalelo litje labekwa luphawu ngekucoshwa kwelibito lesive setive letili-12 taka-Israyeli.

¹⁵ Sembatfo sesifuba basentela imigaco leyayephotselwe njengentsambo leyelukiwe yegolide lecengekile.

¹⁶ Bephetsa ngemicu lemibili yegolide, base batfungela emajiva lamabili egolide emakoneni lamabili langetulu esembatfweni sesifuba.

¹⁷ Lemigaco lemibili yegolide bayibophela kulamajiva lamabili lasemakoneni esembatfo sesifuba.

¹⁸ Letinye tihloko talemigaco batibophela kulemiphetfo lemibili, ngalendlela taba ngembili emichilweni yemahlombe.

¹⁹ Benta emajiva lamabili egolide bawatfungela emakoneni lamabili langaphansi kulesembatfo sesifuba, ngekhatsi macondzana nesidziya.

²⁰ Benta lamanye emajiva lamabili egolide, bawatfungela ngaphansi kulemichilo lemibili yesidziya, ngembili kwaso, eceleni kwemtfungo, ngetulu kwalelibhande lelelukwe kahle.

²¹ Babopha emajiva esembatfo sesifuba bawahlanganisa nemajiva esidziya ngentsambo leluhlata njengesibhakabhaka, loko kwenta kutsi sembatfo sesifuba sibe ngetulu kwelibhande, singaceki. Konkhe loko kwentiwa njengobe Simakadze abeyale Mosi.

Kutfungwa kwaletinye tembatfo tebaphristi

²² Umjiva wonkhe longetulu kwalesidziya welukwa ngendvwangu leluhlata njengesibhakabhaka.

²³ Imbobo yekufaka inhloko yephetfwa ngekugocotwa yatfungwa, khona ingetiwudzabuka.

²⁴ Emphetfweni wawo ngaphansi bahlobisa ngekutsi batungeletise emahananandza lentiwe ngemtiya welineni lecolisakele nangensontfo leluhlata njengesibhakabhaka, nalebukhwebeletane, nalebovu ngalokutopele.

²⁵ Bakha tinsimbi tegolide lecengekile, batitfungela emphetfweni wangaphansi kulomjiva tatungeleta, tabasemkhatsini walamahananandza.

²⁶ Insimbi yalandzelwa lihananandza wonkhe umphetfo wemjiva, kuze kukhontwe ngawo, njengobe Simakadze abeyale Mosi.

²⁷ Bo-Aroni nemadvodzana akhe babelukela babatfungela tingubo letingenamkhono ngendvwangu yelineni lecolisakele,

²⁸ nemishuculo yenhloko, netincotfo tayo, nemibekelo yendvwangu yelineni lecolisakele,

²⁹ nelibhande lelelukwe ngemtiya welineni lecolisakele, nangensontfo leluhlata njengesibhakabhaka, nalebukhwebeletane, nalebovu ngalokutopele; bakuhlobisa, njengobe Simakadze abeyale Mosi.

³⁰ Benta ngcwengcwe ngegolide lecengekile, umhlobiso longcwele, base babhala kuye ngekucopha emagama latsi: “Kwehlukaniselwe Nkulunkulu.”

³¹ Longcwengcwe bambophela emshuculweni ngentsambo leluhlata njengesibhakabhaka; konkhe loko bakwenta njengobe Simakadze abeyale Mosi.

Kucedzelwa kwemsebenti

³² Bawenta bawucedza wonkhe umsebenti wekwakha lithende lekukhontela, lekulithende lekuhlangana. Ema-Israyeli akwenta konkhe Simakadze labeyale Mosi kutsi kwentiwe.

³³ Baletsa kuMosi lithende lekukhontela nako konkhe lokuhambisana nalo: lithende, nemahhuka, netinsikabhaluko, nemakabha, netinsika, nemaseko;

³⁴ nesimbonyo setikhumba tetihhanca letishukiwe taguculwa taba bovu; nesimbonyo setikhumba temahhashi aselwandle letishukwe kahle; nendvwangu levimbe libhokisi lesivumelwane;

³⁵ libhokisi lesivumelwane lelalinetibhelekeca tematje, netimboko talo, nesihlalo semusa;

³⁶ litafula nako konkhe lokuhambisana nalo nesinkhwa sebukhona;

³⁷ lutsi lwetibane lwegolide lecengekile netibane talo, nalokuhambisana nalo, kanye nemafutsa ekukhanyisa;

³⁸ lilati legolide, nemafutsa emgcobo, nemphepho lenuka kamnandzi, nendvwangu yelisango lelithende;

³⁹ lilati lelitfusi, nemhlobiso walo welitfusi losasisefo, netimboko talo, nato tonkhe timphahla letihambisana nalelilati; nemgezelo nesibunu sawo;

⁴⁰ netindvwangu tesibuya, netinsika, nemaseko ato, nendvwangu yemnyango wesibuya, netintsambo taso, netiphunti taso; netimphahla tonkhe telithende lekukhontela, lithende lekuhlangana,

⁴¹ netembatfo letihlotjiswe kahle letisetjentiswa ekukhonteni endzaweni lengcwele, lekutembatfo letingcwele ta-Aroni, umphristi, kanye netembatfo temadvodzana akhe, labatisebentisa nabenta inkonzo yabo yebuphristi.

⁴² Ema-Israyeli enta konkhe njengobe Mosi abeyalwe nguSimakadze.

⁴³ Mosi wakuhlola konkhe wakubukisisa, wabona kutsi kwentiwe njengobe abelayelwe nguSimakadze. Ngako-ke Mosi wase uyababusisa.