Eksodusi 38 - Siswati 1996 Bible

Kwakhiwa kwelilati lekushisa iminikelo

¹ Besaleli wakha lilati lekushisa iminikelo; walakha ngemgamba. Lelilati lalinemihlubulo lelinganako: budze lalingemasentimitha labengaba ngema-220, nebubanti lobabungemasentimitha labengaba ngema-220, nekuphakama lingemasentimitha labengaba li-130.

² Wenta emakona lamane aba netimphondvo lapha ngetulu, watihlanganisa taba yintfo yinye nelilati; konkhe loko kwembeswa ngelitfusi.

³ Tonkhe timphahla letihambisana nalelilati watakha ngelitfusi, taba nguleti: emabhodo ekucitsa umlotsa, nemafosholo, nemigezelo, netintsi tekuhloma inyama, nemakesi.

⁴ Wakha umhlobiso welitfusi losasisefo, wawakha ngekuwuvunulisa ngaphansi kwalomtsandvo welilati loselukhalweni lwalo.

⁵ Wakha emajiva lamane ekwetfwala lelilati, wawakhela emakoneni omane.

⁶ Wakha timboko ngemgamba, watembesa ngelitfusi,

⁷ wafaka letimboko kulamajiva ngala nangale kwelilati. Lelilati lalakhiwe ngemapulango, lingekhatsi lalo lingumhubhe.

Kwakhiwa umgezelo ngelitfusi

⁸ Besaleli wakha umgezelo kanye nesibunu sawo, kokubili wakwembesa ngelitfusi; wakwakha ngetibuko tebafati lababekhonta ekungeneni kwelithende lekuhlangana.

Sibuya selithende lekuhlangana

⁹ Sibuya selithende lekuhlangana Besaleli wasakha ngetindvwangu letatilenga, takhiwe ngemitiya yelineni lecolisakele. Ngaseningizimu lesibuya sasingemamitha labengaba ngema-46 budze.

¹⁰ Lesibuya sasinetinsika letatingema-20, timiswe emasekweni elitfusi langema-20, emahhuka nemigcala yetinsika leyayentiwe ngesiliva.

¹¹ Nangasenyakatfo lesibuya sasinjalo: sasingemamitha labengaba ngema-46 budze, letindvwangu tatilengiswe etinsikeni letingema-20 letimiswe emasekweni elitfusi labengema-20; emahhuka nemigcala yetinsika yayentiwe ngesiliva.

¹² Ngasenshonalanga wenta sibuya setindvwangu lesasingemamitha labengaba ngema-23 budze, tindvwangu taso talengiswa etinsikeni letilishumi etikwemaseko lalishumi; emahhuka nemigcala yato yayentiwe ngesiliva.

¹³ Ngasemphumalanga lapho kwakunelisango ngakhona bubanti besibuya baba ngemamitha labengaba ngema-23.

¹⁴ Kulenga kwaletindvwangu ngala kwemnyango wakwenta kwaba ngemamitha labengaba sitfupha nemasentimitha labengaba ngema-60 bubanti, tihhukwe etinsikeni letintsatfu letisinyiswe emasekweni lamatsatfu.

¹⁵ Nangale kwemnyango bekulenga tindvwangu letatingemasentimitha labengaba ngema-60 bubanti; tatilengiswe etinsikeni letintsatfu letatisinyiswe emasekweni lamatsatfu.

¹⁶ Tonkhe letindvwangu letatitungelete lesibuya tatakhiwe ngemitiya yelineni lecolisakele.

¹⁷ Emaseko aletinsika abengewelitfusi, kodvwa emahhuka aletinsika nemigcala yato bekukwesiliva, netihloko taletinsika betembeswe ngesiliva. Tonkhe letinsika talesibuya tatinemigcala yesiliva.

¹⁸ Indvwangu yesivalo emnyangeni wesibuya yayakhiwe ngemitiya yelineni lecolisakele, ihlotjiswe ngensontfo lenembala loluhlata njengesibhakabhaka, nalobukhwebeletane, nalobovu ngalokutopele, loko kwaba ngumsebenti wengcweti yetekuhlobisa. Lendvwangu yayingemamitha labengaba yimfica bubanti, nemamitha labengaba mabili kuphakama, ilingana naletindvwangu talesibuya.

¹⁹ Yayilengiswe etinsikeni letine letatisinyiswe emasekweni lamane; konkhe kwakwentiwe ngelitfusi. Kodvwa emahhuka aletinsika, nalemigcala yato bekukwesiliva, netihloko taletinsika tatembeswe ngesiliva.

²⁰ Tonkhe tiphunti telithende lekukhontela kanye netesibuya salo tatentiwe ngelitfusi.

Tinsinjana letatisetjentiswa ethendeni lekukhontela

²¹ Nalu luhla lwebungako betintfo letatisetjentiswa ekwakheni lithende lekukhontela laSimakadze, lapho kwakuhlala khona tibhelekeca tematje letimbili letatibhalwe imiyalo lelishumi. Mosi wayala kutsi loluhla lwetimphahla lubhalwe ngemaLevi labephetfwe ngu-Ithamari, umsa wa-Aroni, umphristi.

²² Besaleli, umsa wa-Uri, lotalwa nguHure, wesive sakaJuda, wakwenta konkhe loko Simakadze labekushito kuMosi.

²³ Umsiti wakhe kwakungu-Oholiyabi, umsa wa-Ahisamaki, wesive sakaDani. Yena-ke abengumbati, nemsunguli wemihlobiso, nemhlobisi ngensontfo leluhlata njengesibhakabhaka, nalebukhwebeletane, nalebovu ngalokutopele, nangemitiya yelineni lecolisakele.

²⁴ Igolide yonkhe leyayisetjentiswe ekwakheni lithende lelingcwele leyayinikelwe, yayinesisindvo lesasingemakhilogremu labengaba yinkhulungwane, ngesikalo lesisemtsetfweni.

²⁵ Sisindvo sesiliva leyayikhishwa ngulabo lababebalwa sasingemakhilogremu labengaba ti-3 430 ngekwesikalo lesisemtsetfweni.

²⁶ Ngulowo nalowo labengene elubalweni abekhipha sikalo lesisemtsetfweni, kusukela eminyakeni lengema-20 budzala kuye etulu: kwakungemadvodza lati-603 550 lebengenele lolubalo.

²⁷ Isiliva lenesisindvo lesasingemakhilogremu labengaba ti-3 400 yasetjentiswa ekwakheni emaseko lalikhulu elithende lelingcwele kanye newendvwangu yalo. Isiliva yalelo nalelo seko yayinesisindvo lesasingemakhilogremu labengaba ngema-34.

²⁸ Isiliva leyasala yayingemakhilogremu labengaba ngema-30, Besaleli wayisebentisa ekwakheni emahhuka etinsika, nasekwembeseni tihloko taletinsika kanye nemigcala yato.

²⁹ Litfusi lelalinikelwe kuSimakadze lalinesisindvo lesasingemakhilogremu labengaba ti-2 425.

³⁰ Litfusi walisebentisa ekwakheni emaseko elisango alelithende lekuhlangana, nelilati lelitfusi kanye nemhlobiso walo losasisefo, kanye nako konkhe lokwakuhambisana nalo,

³¹ nemaseko elisango lesibuya netiphunti tonkhe telithende lekukhontela kanye netiphunti letatitungeleta sibuya.