Eksodusi 34 - Siswati 1996 Bible

Ematje esibili labetibhelekeca

¹ Simakadze wakhuluma kuMosi, watsi: “Bata tibhelekeca letimbili tematje letifanana naleta takucala. Ngitawubhala kuto wona lawo mavi labesetibhelekeceni tekucala lowatiphihlita.

² Tilungiselele likusasa ekuseni, wenyuke ute lapha eNtsabeni iSinayi, utewutetfula lapha kimi esicongweni sentsaba.

³ Ungeti namuntfu, futsi kubete umuntfu lobonakala kulentsaba yonkhe. Timvu, netimbuti, netinkhomo tingeluselwa phansi kwayo lentsaba.”

⁴ Ngako-ke Mosi watibata letibhelekeca letimbili tematje, tafanana netekucala; wavuka lokwa ngeluvivi ngakusasa wenyuka iNtsaba iSinayi aphetse leto tibhelekeca letimbili ngetandla takhe, njengobe Simakadze abemyalile.

⁵ Simakadze wehla ngelifu wema naye khona lapho, wamemeta libito laSimakadze.

⁶ Simakadze wendlula embikwakhe wamemeta watsi: “Simakadze, Simakadze, Nkulunkulu lonesihawu nemusa; uyephuta kutfukutsela andze ngemusa nangekwetsembeka,

⁷ ubentela umusa labatinkhulungwane, atsetselele emaphutsa, nalokubi, netono. Kodvwa ngingeke ngihlale ngingamjezisi lonelicala; ngijezisa bantfwana nebatukulu ngetono tebatali babo, kuze kufikele esitukulwaneni sesitsatfu nesesine.”

⁸ Mosi washeshisa wakhotsamisa inhloko yakhe akhonta.

⁹ Wakhuluma watsi: “Simakadze, nangabe ngizuze umusa emehlweni akho, ngicela kutsi uhambe natsi, nome sisive lesinenhloko lelukhuni. Tsetselela kona netono tetfu, usente sibe lifa lakho.”

Kuvusetelwa kwesivumelwane

¹⁰ Simakadze wakhuluma kuMosi, watsi: “Ngenta sivumelwane-ke manje. Ngitakwenta imimangaliso embikwaso sonkhe sive sakho, lengazange seyentiwe emhlabeni nome ngukusiphi sive. Tonkhe tive lohlala emkhatsini wato tiyawubona tintfo letinkhulu letitakwentiwa ngimi, mine Simakadze, ngobe ngitanentela tintfo letesabekako emehlweni ato.

¹¹ Lalelani lemiyalo lengininika yona lamuhla. Ngitatidvungulula ngitikhiphe kulelive tonkhe letive: ema-Amori, nemaKhenani, nemaHethi, nemaPheresi, nemaHivi, nemaJebhusi.

¹² Nicaphele ningenti sivumelwane nebantfu labakulelive leniya kulo, ngobe loko kungahle kube lugibe kini.

¹³ Emalati abo nibowabhidlita, nephule tinsika tawo tematje, nibhidlite konkhe kwalo-Ashera longunkulunkulukati wabo.

¹⁴ “Ningamkhonti lomunye nkulunkulu, ngobe loSimakadze lobitwa ngekutsi nguSikhwele unguNkulunkulu lonesikhwele.

¹⁵ Ningenti ngisho nesivumelwane nalabantfu balelo live, ngobe nabagwadla ngekukhonta letithico tabo, banikele umhlatjelo kuto, batanimema bese nidla leminikelo yemihlatjelo yabo.

¹⁶ Emadvodzana enu ningawatsatseli bafati emadvodzakatini abo, ngobe uma labantfu sebaphinga nome bagwadla ngekukhonta letithico tabo, nalamadvodzana enu atawudvonseleka kuloko.

¹⁷ “Ningatenteli bonkulunkulu lababatwe ngensimbi.

¹⁸ “Ubowugcina uwugubhe uMkhosi Wesinkhwa Lesingenambiliso. Uyakudla sinkhwa lesite imbiliso emalanga lasikhombisa njengobe ngakuyala. Ubokwenta kusukela kulelo langa lelimisiwe ngenyanga ya-Abibi, lenaphuma ngayo eveni laseGibhithe.

¹⁹ “Onkhe ematubulo labafana ngewami, ngisho ematubulo lamadvuna etifuyo: tinkhomo, netimvu kwami.

²⁰ Litubulo lelidvuna lembongolo uyawulihlenga ngekunikela lizinyane lemvu esikhundleni salo; nangabe awulihlengi, ubolephula intsamo. Onkhe emadvodzana langematubulo uyakuwahlenga. “Kufanele kubete lovela embikwami angakaphatsi lutfo etandleni.

²¹ “Uyawusebenta emalanga lasitfupha, kodvwa ngelilanga lesikhombisa uyawuphumula, ngisho nangesikhatsi sekulima nesekuvuna.

²² “Ubowugubha uMkhosi Wekuvuna Kolo, lokunguMkhosi Wemaviki. Ubowugubha neMkhosi Wekubutsa ekupheleni kwemnyaka.

²³ “Katsatfu ngemnyaka bonkhe labadvuna bakho bayawutibonakalisa eNkhosini lenguSimakadze, Nkulunkulu wema-Israyeli.

²⁴ Ngobe ngiyawucitsa tive embikwakho ngandzise neminyele yakho; kute loyawuhawukela live lakho, ngetikhatsi tekwenyuka kwakho katsatfu ngemnyaka nawuyekutibonakalisa kuSimakadze, longuNkulunkulu wakho.

²⁵ “Unganikeli kimi ngengati yemhlatjelo nangemnikelo nome wani lonembiliso. Kubete inyama yemhlatjelo weliPhasika leyawusala ibe libhadlela.

²⁶ “Tilinga letinhle kakhulu temasimi akho tekwendvulelisa ubotiletsa endlini yaSimakadze longuNkulunkulu wakho. “Ungalipheki lizinyane lembuti nome lemvu elubisini lwenina.”

²⁷ Simakadze wakhuluma kuMosi, watsi: “Wabhale lamavi, ngobe lesivumelwane lesengisente nawe nema-Israyeli sisime kulamavi.”

²⁸ Mosi wahlala naSimakadze emalanga langema-40 nebusuku bawo; abengadli anganatsi. Wawabhala kuletibhelekeca tematje emavi alesivumelwane, laba ngimiyalo lelishumi.

Mosi wehla eNtsabeni iSinayi

²⁹ Ngesikhatsi Mosi ehla eNtsabeni iSinayi abephetse letibhelekeca letimbili tematje tinemiyalo lelishumi; abengati kutsi sikhumba sebuso bakhe siyakhatimula, ngobe phela abekhulume naNkulunkulu.

³⁰ Watsi kube Aroni nawo onkhe ema-Israyeli babone Mosi kutsi sikhumba sebuso bakhe siyakhatimula, besaba kusondzela kuye.

³¹ Kodvwa Mosi wababita, abita Aroni nebaholi bonkhe; bancandzeka babuyela kuye, Mosi wakhuluma nabo.

³² Emvakwaloko onkhe ema-Israyeli asondzela kuye, wase uwanika lemiyalo labeyinikwe nguSimakadze eNtsabeni iSinayi.

³³ Watsi kube Mosi acedze kukhuluma kubo, wabe sewumbonya buso bakhe ngendvwangu.

³⁴ Njalo nje Mosi abetsi nakangena ebukhoneni baSimakadze, lendvwangu ayisuse, aze aphume. Abetsi angaphuma, awatjele ema-Israyeli konkhe labetfunywe kutsi akwente.

³⁵ Ema-Israyeli abebona kutsi buso baMosi buyakhatimula, ngako Mosi abebumbonya ngendvwangu lobuso bakhe, aze aphindze angene kuyawukhuluma naSimakadze.