Eksodusi 33 - Siswati 1996 Bible

Simakadze ubatjela kutsi abatfutse

¹ Simakadze wakhuluma kuMosi, watsi: “Tfutsa kulendzawo wena nebantfu lobakhiphe eveni laseGibhithe, niye eveni lengafunga ngetsembisa kulinika Abrahama, na-Isaka, na-Jakobe, ngatsi: ‘Lelive ngiyawulipha titukulwane tenu.’

² Ngitawutfumela ingilosi yami ihambe embikwenu ngikhiphe emaKhenani, nema-Amori, nemaHethi, nemaPheresi, nemaHivi, nemaJebhusi.

³ Hambani niye kulelive leligcwele lubisi neluju lwetinyosi; kodvwa mine ngingeke ngihambe nani ngenca yebulukhuni benhloko yenu; ngingahle nginibhubhise nonkhana endleleni.”

⁴ Batsi kube bantfu beve onkhe lamavi labuhlungu, bakhala bonkhe, bayikhumula imihlobiso yabo.

⁵ Simakadze wakhuluma kuMosi, watsi: “Khuluma kulama-Israyeli utsi ngitsi: ‘Nine nibantfu labanenhlitiyo lelukhuni; nangingake ngihambe nani umzuzu ube munye nje, nginganibhubhisa niphele nya. Khumulani lemihlobiso yenu, khona ngitanitjela kutsi ngitakwentani ngani!’ ”

⁶ Ngako batsi kube batfutse eNtsabeni iSinayi abaphindzanga bayegabe imihlobiso futsi.

Lithende lekuhlangana

⁷ Mosi abevame kumisa lithende ngephandle kwenkambu, abelibita ngekutsi lithende lekuhlangana. Ngulowo nalowo labefuna kubuta intsandvo yaSimakadze abevele aphumele ngaphandle kwenkambu ethendeni lekuhlangana.

⁸ Abetsi Mosi nakaya kulo, bonkhe bantfu bavuke, beme eminyango yemathende abo bambuke aze ayewungena kulo.

⁹ Abetsi Mosi angangena kulo, bese kwehla insika yelifu, ifike ime ekungeneni kwalelithende lekuhlangana, bese-ke Simakadze ukhuluma naMosi.

¹⁰ Bonkhe bantfu babetsi bangayibona lensika yelifu ime ekungeneni kwelithende lekuhlangana bakhotsame, bakhonte, ngulowo nalowo emnyango welithende lakhe.

¹¹ Simakadze abekhuluma naMosi buso nebuso, njengemuntfu akhuluma nemngani wakhe. Mosi nasabuyele enkambu, lelibhungu lelalingumsiti wakhe, lelalinguJoshuwa, umsa waNuni, lalisala lingesuki kulelithende lekuhlangana.

Simakadze wetsembisa kuhamba nesive sakhe

¹² Mosi wakhuluma kuSimakadze, watsi: “Wena watsi kimi: ‘Khipha labantfu,’ kodvwa awuzange ungilayele kutsi utangitfuma nabani. Yebo, washo kona kimi watsi: ‘Ngiyalati libito lakho, futsi uzuze umusa emehlweni ami.’

¹³ Ngako-ke, nangabe ngizuze umusa emehlweni akho, ngiyakucela kutsi ungikhombise tindlela takho, kuze wena ngikwati kahle, ngichubeke kuzuza umusa emehlweni akho. Ukhumbule futsi kutsi labantfu basive sakho.”

¹⁴ Simakadze wamphendvula watsi: “Ngiyawuhamba nawe, ngikuphe kuphumula.”

¹⁵ Mosi waphendvula watsi: “Nangabe ungeke uhambe natsi, ungacali usitfutse lapha.

¹⁶ Nawungahambi natsi, kutawubonakala kanjani kutsi ngizuze umusa emehlweni akho, mine nalesive sakho? Kuhamba kwakho nami nalesive sakho ngiko lokufanele kusente sehluke emkhatsini wetive tonkhe temhlaba.”

¹⁷ Simakadze wakhuluma kuMosi, watsi: “Ngitakwenta loku lokushito, ngobe uzuze umusa emehlweni ami, futsi ngikwati kahle.”

¹⁸ Mosi wakhuluma watsi: “Ngicela ungikhombise inkhatimulo yebukhosi bakho.”

¹⁹ Simakadze waphendvula watsi: “Ngitakwenta kutsi inkhatimulo yebuhle bami bendlule embikwakho ngimemetele libito lami, Simakadze. Ngimentela umusa lowo lengimentela umusa, ngimhawukele lowo lengimhawukelako.

²⁰ Kodvwa ungeke ububone buso bami, ngobe kute umuntfu longabona buso bami abuye aphile.

²¹ Buka la: kunendzawo lapha ngakimi, lapho utakuma khona, etikwalelidvwala.

²² Nakwendlula inkhatimulo yami, ngitakufaka lapha emkhocweni walelidvwala, ngikumbonye ngesandla sami ngesikhatsi ngendlula.

²³ Ngitabe sengiyasisusa lesandla sami, ungibone lingemuva, kodvwa buso bami ungeke ububone.”